Փաստ ինֆո

Armsport.am-ի տեղեկացմամբ՝ բրիտանական givemesport.com-ն իր լայնածավալ հոդվածում անդրադարձել է Պրեմիեր լիգայի 11-րդ տուրի՝ «Սուոնսիի» դեմ հանդիպմանը «Մանչեսթեր Յունայթեդի» հայ կիսապաշտպան Հենրիխ Մխիթարյանի բացակայությանը։

«Հենրիխ Մխիթարյանը վերջապես վերադարձել էր «Մանչեսթեր Յունայթեդի» կազմ՝ դաշտ դուրս գալով «Ֆեներբահչեի» հետ խաղի երկրորդ կեսում։ Այնուամենայնիվ, ֆուտբոլիստը ստիպված էր Պրեմիեր լիգայի վերջին տուրի հանդիպմանը հետևել տրիբունայից, քանի որ Ժոզե Մոուրինյուն նրան կրկին դուրս թողեց հայտացուցակից։

Հենրիխի բացակայությունը հանդիպումներից դարձել է բազմաթիվ քննարկումների առիթ՝ առաջ քաշված տարբեր վարկածներով։ Սակայն այժմ հնարավոր այլ բացատրություն ունենք, թե ինչու է նա հայտնվել Մոուրինյուի սև ցուցակում։

Մխիթարյանը ձեռք էր բերվում որպես հիմնական կազմի ֆուտբոլիստ, ով կուժեղացներ թիմի հարձակման ներուժը։ Չնայած դրան՝ 27-ամյա ֆուտբոլիստը մասնակցել է ընդամենը 6 հանդիպման։ Փորձելով բացատրել այդ կանոնավոր բացակայությունները՝ խոսվել է սեփական ուժերի հանդեպ Հենրիխի անվստահության, վատ մարզավիճակի մասին, իսկ նրա հարմարվելն անգլիական ֆուտբոլին սպասվածից շատ ժամանակ է տևում։

Այժմ «The Times»-ի ֆուտբոլային թղթակիցների ղեկավար Օլիվեր Կայը մի քիչ լուսավորել է իրադրությունը՝ բացահայտելով, թե որ առումով է Մխիթարյանը հիասթափեցրել պորտուգալացի մասնագետին։

«Մխիթարյանը հիասթափված էր առաջին թիմում հայտնվելու հնարավորության բացակայությունից։ Իսկ Մոուրինյուն նույնն էր զգում Հենրիխի որոշ թիմակիցների ֆիզիկական հնարավորությունների վերաբերյալ»,- գրում է Կայը։

Ի տարբերություն հսկաներ Զլատան Իբրահիմովիչի ու Պոլ Պոգբայի՝ Մխիթարյանից երբեք չի ակնկալվել, որ նա կլինի գերակայող ֆիզիկական ուժը թիմի կիսապաշտպանությունում։ Նրա խաղն ավելի շատ նրբագեղ ու կատարյալ փոխանցումն է, քան մրցակցին ուժային պայքարում հաղթելը։

Սակայն, ակնհայտ է, որ Մոուրինյուն ամբողջ թիմից ակնկալում է «ֆիզիկական ուժի» որոշակի մակարդակ, և այս պահին «Բորուսիայի» նախկին աստղը չի բավարարում պորտուգալացու պահանջները։

«Մանչեսթեր Յունայթեդի» երկրպագուները վերջին շաբաթներին հուսալքված կերպով ցանկանում էին, որ Մխիթարյանն ավելի շատ խաղային ժամանակ ստանա ու չէին հասկանում նրա բացակայության պատճառը։ Այս թարմացումը թույլ է տալիս ենթադրել, որ ֆուտբոլիստը կարիք ունի վերանայել իր տեսակետը, եթե նա ցանկանում է առաջիկայում հայտնվել «կարմիր սատանաների» մեկնարկային կազմում։

Քանի դեռ Մխիթարյանը չի կարողանում մարզումներին ավելի ուժային պայքար ցուցադրել թիմակիցների նկատմամբ, նա շարունակելու է այդպես էլ պայքարել «Մանչեսթեր Յունայթեդում» փայլելու իր շանսը ստանալու համար»,- գրում է կայքը։

Աղբյուր` Փաստինֆո