Փաստ ինֆո

Հայաստանի Գավաթի խաղարկության քառորդ եզրափակչի՝ «Փյունիկի» հետ պատասխան խաղից հետո (0:1) «Ալաշկերտի» գլխավոր մարզչի պաշտոնից հրաժարական տվեց թիմի գլխավոր մարզիչ Աբրահամ Խաշմանյանը, ում անվան հետ էին կապված թիմի կարևորագույն հաղթանակները ու պատմական նվաճումները:

Խաղից հետո կայացած մամուլի ասուլիսից ակհայտ էր, որ որոշումը հապճեպ էր կայացվել, իսկ հետո պարզ դարձան պատճառները:

Հրաժարականից օրեր անց Խաշմանյանը նշեց, որ «Փյունիկից» կրած պարտությունից հետո թիմի սեփականատեր և նախագահ Բագրատ Նավոյանը մտել է հանդերձարան, տեղում ազատել է թիմի մի քանի ֆուտբոլիստների և անվստահություն է հայտնել իրեն՝ նշելով, որ հաջորդ խաղում թիմը կպատրաստի մեկ այլ մարզիչ:

Խաշմանյանի պարզաբանումից հետո խոսեց նաև Բագրան Նավոյանը, ով հայտարարեց, որ դժգոհ էր թիմի վերջին արդյունքներից, բայց Խաշմանյանից հրաժարական չի պահանջել, այլ ցանկացել է միայն, որ առաջիկա խաղում այլ մարզիչ գլխավորի թիմը:

Մինչև Խաշմանյանի հրաժարականը «Ալաշկերտը» երկրորդն էր Բարձրագույն խմբի մրցաշարային աղյուսակում և երկու միավոր էր զիջում առաջատար «Շիրակին», սեպտեմբերի 27-ին հաղթել էր Սուպերգավաթի խաղում, վերջին հինգ խաղերում տարել էր երկու հաղթանակ, գրանցել երկու ոչ-ոքի և մեկ պարտություն:

Armsport.am-ը վերհիշել է, թե ինչպիսին էր «Ալաշկերտը» Աբրահամ Խաշմանյանից առաջ և նրա գլխավորությամբ:

Նորաստեղծ ակումբը Հայաստանի Բարձրագույն խմբի առաջնությանը մասնակցում է 2013 թվականից: 2013/14 թվ. մրցաշրջանում թիմը 28 տուրից հետո վաստակած 23 միավորով եզրափակեց մրցաշարային աղյուսակը, իսկ պարտություններից որոշները ունեին ոչ ֆուտբոլային հաշիվ (5-րդ տուր. «Գանձասար» - «Ալաշկերտ»՝ 9:2, 14-րդ տուր. «Բանանց» - «Ալաշկերտ»՝ 7:0)

Երկար չստացվեց նաև թիմի ճանապարհը երկրի Գավաթի խաղարկության նորամուտում: Քառորդ եզրափակչում թիմը ճանապարհը զիջել «Գանձասարին» (0:1, 0:0):

Արդյունքներում կտրուկ բարելավում չնկատվեց նաև 2014/15 թվ. մրցաշրջանի մեկնարկում. Առաջին հինգ խաղերում 3 պարտություն, 2 ոչ-ոքի և 1 հաղթանակ՝ Արարատի նկատմամբ (3:2):

2014-ի սեպտեմբերի 10-ին թիմը գլխավորեց Աբրահամ Խաշմանյանը և հաջորդ իսկ խաղում «Ալաշկերտը» հաղթեց փոխչեմպիոն «Շիրակին» (2:0):

Խաշմանյանի գլխավորությամբ 2014/15 մրցաշրջանի մնացած 22 խաղերում թիմը տոնեց ևս 8 հաղթանակ, 7 խաղ ավարտեց ոչ-ոքի արդյունքով և կրեց 7 պարտություն, ինչը, բնական է, մինչև այդ թիմի լավագույն արդյունքն էր:

Համեմատության համար կարելի է հիշել 2013/14 թվականի արդյունքները. 28 խաղում 16 պարտություն, 6 հաղթանակ 6 ոչ-ոքի, գոլերի 38:69 հարաբերակցություն:

Բացի այդ, հաջող ստացվեց թիմի ելույթը նաև երկրի Գավաթի խաղարկությունում: Քառորդ եզրափակիչ փուլում «Ալաշկերտը» երկու անգամ հաղթեց «Արարատին» (2:0, 4:3) և դուրս եկավ կիսաեզրափակիչ, որտեղ մրցակիցը ապագա չեմպիոն և գավաթակիր «Փյունիկն» էր: «Փյունիկը» առաջին խաղում հաղթեց 3:1 հաշվով և չնայած պատասխան խաղում «Ալաշկերտի» 1:0 հաշվով տոնած հաղթանակին՝ դուրս եկավ եզրափակիչ ու հաղթեց «Միկային» (3:1):

2014/15-ին նախորդող 2013/14 մրցաշրջանի Գավաթի խաղարկությունում Ալաշկերտը պայքարը թողել էր արդեն քառորդ եզրափակիչ փուլից, սեփական հարկի տակ Միկային նվազագույն հաշվով հաղթելուց հետո թիմը հյուրընկալվելիս 3:0 հաշվով պարտություն էր կրել:

Երկրի չեմպիոն և գավաթակիր հռչակվեց Փյունիկը, իսկ Բարձրագույն խմբի մրցաշարային աղյուսակում 4-րդ հորիզոնականը զբաղեցրած Ալաշկերտը Աբրահամ Խաշմանյանի գլխավորությամբ՝ առաջին անգամ իր պատմության մեջ Եվրոպա լիգայի խաղարկությունում հանդես գալու իրավունք ստացավ: Գրեթե բոլորը Ալաշկերտին ջախջախիչ հաշվով պարտություն էին կանխագուշակում շոտլանդիայի գավաթակիր «Սենթ Ջոնսթոնի» հետ խաղերում, սակայն Խաշմանյանն այլ պլաններ ուներ: Խամանյանն անկոտրուն կամքը դրսևորեց ամենակարևոր պահին:

Թիմերի միջև Երևանում կայացած առաջին խաղում Ալաշկերտը 1:0 հաշվով հաղթեց մրցակցին, իսկ հյուրընկալվելիս զիջեց՝ հաջորդ փուլի ուղեգիր ապահովող 1:2 հաշվով: Հատկանշական է, որ պատասխան խաղի 65-րդ րոպեից Ալաշկերտը խաղում էր 10 հոգով, երկրորդ դեղին քարտը ստանալուց հեռացվել էր Կարեն Մուրադյանը, իսկ հաջորդ փուլի ուղեգիր ապահոված գոլը՝ Աբրահամ Խաշմանյանի թիմը խփեց 74-րդ րոպեին, դիպուկ հարվածով աչքի ընկավ Նորայր Գյոզալյանը: Սա մեր ֆուտբոլի համար պատմական իրադարձություն էր, որը մոռանալ պարզապես չի կարելի:

Եվրոպա լիգայի որակավորման երկրորդ փուլում «Ալաշկերտի» մրցակիցը Ղազախստանի բրոնզե մեդալակիր «Կայրաթն» էր: Առաջին խաղում «Ալաշկերտը» հյուրընկալվելիս զիջեց 0:3 հաշվով, իսկ Երևանում կայացած մրցավեճում հաղթեց 2:1 հաշվով և դուրս մնաց պայքարից: Հետագայում «Կայրաթը» անցավ նաև շոտլանդական «Աբերդինի» արգելքը ու Եվրոպա լիգայի խմբային փուլի ուղեգրի համար պայքարում զիջեց ֆրանսիական «Բորդոյին» (սեփական հարկի տակ «Կայրաթը» հաղթեց 2:1 հաշվով, իսկ հյուրընկալվելիս զիջեց 0:1 հաշվով):


Այսպիսով, Եվրոպա լիգայի 2015/16 թվականների խաղարկության որակավորման առաջին և երկրորդ փուլերում «Ալաշկերտը» տոնեց 2 հաղթանակ և կրեց պարտություն, գոլերի 4:6 հարաբերակցությամբ: Ակնհայտ է, որ նման արդյունքից հետո Խաշմանյանի թիմին արդեն դասում էին Հայաստանի 2015/16 թվականների առաջնության ֆավորիտների թվում և այդ սպասումները արդարացան:

2015 թվականի ընթացքում կայացած առաջնության առաջին հատվածից հետո «Ալաշկերտը» գլխավորում էր մրցաշարային աղյուսակը՝ «Փյունիկի» նկատմամբ ունենալով 2 միավորի առավելություն: Առաջին հատվածի 15 խաղերում թիմը հասցրել էր առնվազն մեկ հաղթանակ գրանցել 7 մրցակիցներից 6-ի հետ խաղերում, միայն «Գանձասար-Կապանի» հետ մրցավեճերն էին ավարտվել ոչ-ոքի արդյունքներով (0:0,2:2), ընդ որում՝ 9-րդ տուրում կայացած մրցակիցների երկրորդ խաղում Խաշմանյանի թիմը մինչև 78-րդ րոպեն 9 հոգով հաղթում էր կապանյան թիմին:

Նման արդյունքից հետո քչերն էին կասկածում, որ տարվա լավագույն մարզիչ կճանաչվի հենց Խաշմանյանը, սակայն քվեարկության արդյունքներով լավագույնը ճանաչվեց Վարուժան Սուքիասյանը, ում գլխավորած «Արարատը» 2014/15 թվականի առաջնությունն ավարտել էր վերջին տեղում (Սուքիասյանը գլխավորել էր «Արարատը» 2015-ի ապրիլից), իսկ 2015/16 թվականների առաջնության աշնանային հատվածից հետո 7 միավորով զիջում էր Խաշմանյանի թիմին: Հատկանշական է նաև, որ մարզական լրագրողները գրեթե միաձայն լավագույնն էին ճանաչել հենց Խաշմանյանին: Փաստորեն, Խաշմանյանի ձեռքից խլեցին լավագույնի կոչումը…

2015/16 թվականների առաջնությունում Խաշմանյանի թիմը 28 խաղերում տոնեց 16 հաղթանակ, 7 խաղերում գրանցեց ոչ-ոքի և պարտություն կրեց ընդամենը 5 հանդիպումներում: Հարկ է նշել, որ պաշտպանողական ֆուտբոլ խաղալու համար մեղադրվող «Ալաշկերտն» ամենաարդյունավետն էր առաջնությունում խփած 50 գոլերով, իսկ բաց թողած 24 գոլը երկրորդ լավագույն արդյունքն էր Փյունիկից հետո (21): Բացի այդ, թիմի հարձակվողներ Միհրան Մանասյանն ու Էբեր Արաուխոն 16-ական գոլով կիսեցին առաջին հորիզոնականը ռմբարկուական ցուցակում:

Խաշմայնաի գլխավորությամբ Ալաշկերտն առաջին անգամ իր մի քանի տարվա պատմության մեջ ճանաչվեց Հայաստանի չեմպիոն: Իրոք հատկանշական է. «Ալաշկերտը» մինչև Խաշմանյանը հետնապահի համբավ ուներ, իսկ մասնագետի գլխավորությամբ շատ կարճ ժամանակահատվածում դարձավ ամուր և քայլ առ քայլ առաջադիմեց:


Առջևում նորամուտն էր Չեմպիոնների լիգայում: Որակավորման առաջին փուլում թիմի մրցակիցը Անդորրան ներկայացնող «Սանտա Կոլոման» էր, որի հակաֆուտբոլային խաղին առաջին խաղում (0:0) ծանոթանալուց հետո «Ալաշկերտը» Երևանում կայացած պատասխան խաղում հաղթեց 3:0 հաշվով՝ Խաշմանյանի ասած «ճզմեց»: Երկրորդ փուլում մրցակիցը Թբիլիսիի «Դինամոն» էր, որի հետ արտագնա խաղին «Ալաշկերտին» չէին կարող օգնել թիմից հեռացած Էբերը և «Սանտա Կոլոմայի» հետ պատասխան խաղում կարմիր քարտ ստացած Միհրան Մանասյանը: Արդյունքում երևանյան թիմը պարտվեց 0:2 հաշվով: Երևանում կայացած մրցավեճն ավարտվեց ոչ-ոքի՝ 1:1 և հաջորդ փուլի ուղեգիր նվաճեց վրացական թիմը, որը հետագայում դուրս մնաց մրցաշարից՝ զիջելով Չեմպիոնների լիգայի խմբային փուլ հասած Զագրեբի «Դինամոյին»:

Խաշմանյանը Ալաշկերտի գլխավոր մարզչի պաշտոնից հրաժարական տվեց, երբ 2016/17 թվ. Առաջնության 9 տուրերից հետո թիմը 14 միավորով երկրորդ տեղում էր և երկու միավոր էր զիջում առաջատար Շիրակին, հաղթել էր «Բանանցին» Սուպերգավաթի խաղում և թիմի միակ բացթողումը Գավաթի խաղարկության քառորդ եզրափակչում «Փյունիկից» կրած պարտություններն էին (1:2, 0:1): Առանց Խաշմանանի Ալաշկերտը 4 խաղերում արդեն կրել է երկու պարտություն և 22 միավորով երրորդն է ու առաջատար «Շիրակին» զիջում է 5 միավոր:

Այսպիսով.

Մինչև Աբրահամ Խաշմանյանը «Ալաշկերտը» 37 հանդիպումներում տոնել է 8 հաղթանակ, որոնցից 6 2013/14 մրցաշրջանի առաջնության խաղերում, մեկը՝ «Միկայի» հետ գավաթային խաղում, մյուսը 2014/15 մրցաշրջանի առաջին տուրի՝ Արարատի հետ խաղում (3:2):

Խաշմանյանի գլխավորությամբ Ալաշկերտն անցկացրել է 78 հանդիպում՝ տոնելով 39, գրանցելով 20 ոչ-ոքի և նույնքան պարտություն. ի դեպ, այդ պարտություններից 1-ը նրանը չէ. 2015 թվականի մայիսի 2-ին «Փյունիկի» հետ խաղում (1:3) «Ալաշկերտի» գործողությունները ղեկավարում էր Սևադա Արզումանյանը:

Հաղթանակներից 9-ը 2014/15 մրցաշրջանի առաջնության խաղերում, 3-ը նույն մրցաշրջանի Գավաթի խաղարկության խաղերում, ե2-ը՝ Եվրոպա լիգայի խաղարկության 2015/16 մրցաշրջանի որակավորման փուլի խաղերում, 16-ը՝ 2015/16 մրցաշրջանի առաջնության խաղերում, 3-ը՝ նույն մրցաշրջանի գավաթային խաղերում, 1-ը՝ Չեմպիոնների լիգայի 2016/17 մրցաշրջանի որակավորման փուլում, 4-ը 2016/17 մրցաշրջանի առաջնության խաղերում, 1-ը՝ 2016 թվականի Սուպերգավաթի խաղում:

Խաշմանյանի հեռանալուց հետո «Ալաշկերտն» անցկացրել է 4 հանդիպում՝ գրանցելով 2-ական հաղթանակ և պարտություն:


Խաշմանյանը խաղադաշտից դուրս էլ Խաշմանյան է: Մամուլի ասուլիսներում, լրագրողների հետ շփումներում նա մշտապես իրեն որպես իսկական պրոֆեսիոնալ էր պահում: Կային կոնֆլիկտներ, բարդ իրավիճակներ, սակայն արդյունքում Աբրահամ Խաշմանյանն աներեր էր:

Բազմիցս խոսվում է Հայաստանում բարձրակարգ մասնագիտների պակասի մասին, բայց ահա օրինակ, թե ինչպես են վարվում այն մարզչի հետ, ով ուրույն անհատականություն ունի: Ուղղակի պետք է չխանգարել նրան և տալ լավ հնարավորություններ, ոչ թե հակառակը: Մնում է սպասել վերադարձին...

Աղբյուր` Փաստինֆո