Փաստ ինֆո

Մատուցողուհու սպանության աղմկահարույց գործով այսօրվա դատական նիստում ամբաստանյալ Դավիթ Թամրազյանի պաշտպան, փաստաբան Կրոմվել Գրիգորյանը միջնորդեց դատարան հրավիրել ու հարցաքննել փորձագետին ՝ դիակի դատաբժշկական եզրակացության շուրջ:

Դատարանը, սակայն, մերժեց միջնորդությունը՝ անհիմն լինելու պատճառաբանությամբ: Ըստ դատարանի, պաշտպանի առաջ քաշած հարցերը ոչ թե փորձագետի եզրակացության պարզ չլինելու կամ բացերին են առնչվում, դրանք լրացուցիչ հարցեր են:

«Փաստինֆո»-ի լրագրողի հետ զրույցում փաստաբանը նշեց. «Մենք հստակ ապացուցում ենք, որ խուզարկությամբ առգրավված և որպես հանցագործության գործիք ներկայացված դանակով այդ սպանությունը չէր կարող տեղի ունենալ, որովհետև դա մեկսայրանի դանակ է, իսկ սպանությունը տեղի է ունեցել երկսայր դանակով»:

Կ.Գրիգորյանը նշեց, որ քննիչի կողմից երեք արձանագրություն է կազմվել, որտեղ նշվել է՝ փաթեթից հանեցի երկսայր դանակ, Դավիթ Թամրազյանը ճանաչեց երկսայր դանակը, Միլնենան («Փաստինֆո»՝ գործով առանցքային վկա) ճանաչեց երկսայր դանակը, բայց այդ դանակը երկսայր չէ, մեկսայրանի է:

Ըստ պաշտպանի, տուժողի մարմնի վրա առկա վնասվածքների կտրվածքները, մասնավորապես, երկու կտվածքներն ունեն սուր անկյուններ. «Մեկ- սայրանի դանակով դա չէր կարող պատճառվել, դա պատճառվել է երկսայրանի դանակով»:

Պաշտպանը նշեց նաև, որ պարանոցը կտրելու պարագայում մեծ ճնշումով արյուն կհոսեր և եթե Դավիթ Թամրազյանը կատարած լիներ սպանությունը, նրա շորերը արյան մեջ կկորեին: «Դավիթն այդ արյունոտված վիճակում, սպանությունից հետո չէր կարողանա Միլենայի հետ գնալ «Վալնա» բարում ուրախանալ»:

Կրոմվել Գրիգորյանը հայտնեց, որ Դավիթ Թամրազյանի տնից առգրավել են սպանության օրը Դավիթ Թամրազյանի հագին եղած չորս հագուստները, որից միայն երկուսն են փորձաքննության ներկայացվել, իսկ սվիտրն ու կաշվե պիջակը մինչ օրս գտնվում են քննչական խմբի ղեկավարի մոտ: «Իմ հարցադրմանը՝ թե ինչո՞ւ դրանք փորձագետին չեն տրամադրվել, քննիչը պատասխանել է՝ քանի որ դրանց վրա հետքեր չկային, չեմ տրամադրել: Քննիչը նման իրավասություն չունի որոշելու, թե հագուստի վրա արյան հետք կա՞, թե՞ ոչ, դա փորձագետի իրավասությունն է: Այսինքն, այստեղ ևս մենք Դավիթ Թամրազյանի օգտին ունենք դրական ապացույցներ»,- ասաց Կրոմվել Գրիգորյանը:

Մեկնաբանելով փորձագետին հարցաքննելու իր միջնորդությունը մերժելու դատարանի որոշումը, պաշտպանը նշեց, որ դատարանի պատճառաբանության համաձայն, փորձագետի հարցաքննությունը չի կարող փոխարինել եզրակացությանը:

Հաջորդ դատական նիստում պաշտպանը միջնորդություն կներկայացնի լրացուցիչ փորձաքննություն նշանակելու մասին:

Աղբյուր` Փաստինֆո