Փաստ ինֆո

Հոկտեմբերի 11-ին «Արմենիա» բժշկական կենտրոնում ծնված, ապա Սուրբ Աստվածամայր հիվանդանոց տեղափոխված նորածինը, ով 17-րդ օրը մահացել է՝ ծնվել էր խորը անհաս, կյանքի հետ անհամատեղելի արատներով:

«Փաստինֆո»-ն «Սուրբ Աստվածամայր» բժշկական կենտրոնի տնօրեն Նիկոլայ Դալլաքյանից տեղեկացավ, որ փոքրիկը ծնվել է 1 կիլոգրամ 600 գրամ քաշով, թերզարգացած թոքերով, կերակրափողի լուրջ արատով, այսինքն՝ կյանքի հետ անհամատեղելի երկու ծանր արատներով և բազմաթիվ խնդիրներով:

Ն.Դալլաքյանը վաղաժամ ծնված նորածնի ծնողներին իրազեկել է երեխայի վիճակի մասին և նրանք գրավոր համաձայնություն են տվել նորածնին վիրահատելու համար:

Նիկոլայ Դալլաքյանի խոսքով՝ թեկուզ շատ քիչ տոկոս է եղել երեխային փրկելու հավանականությունը, սակայն իրենք հնարավորինս ամեն բան արել են այդ նպատակով:

Նորածինը լրջագույն վիրահատություն է ենթարկվել հենց ԲԿ-ի տնօրենի կողմից, սակայն փոքրիկը չի կարողացել պայքարել:

Նորածնի ծնողները գտնում են, որ բժիշկների կողմից ոչ ճիշտ բուժօգնություն է ցուցաբերվել, ինչի հետևանքով էլ երեխան մահացել է: Բժիշկը վիրավորական համարեց, որ նման իրավիճակում կարելի է բժշկին մեղադրել, սա այն դեպքում, երբ բժիշկն ամեն բան արել է` լրջագույն խնդիրներով, արատներով ծնված երեխային վիրահատության է ենթարկել` փորձելով փոքրիկի կյանքը փրկել:

Աղբյուր` Փաստինֆո