Փաստ ինֆո

2015թ. սեպտեմբերի 10-ին «Մասիս» ԲԿ-ում 70-ամյա կնոջ մահը հետևանք է բժիշկների կողմից թույլ տված թերությունների և բացթողումների:

Համենայն դեպս կատարված դատաբժշկական փորձաքննությամբ հաստատվել է, որ «Մասիս» ԲԿ-ի վիրաբուժական բաժանմունքի վարիչ Գևորգ Գրիգորյանի և հերթապահ բժշկի՝ Նելսոն Սուվարյանի կողմից թույլ տրված թերությունները և բացթողումները որոնք 70-ամյա կնոջ մահվան հետ գտնվում են պատճառահետևանքային կապի մեջ:

Այսպիսով, տարեց կինը 2015 թվականի օգոստոսի 31-ին` ժամը 10-ի սահմաններում ստացիոնար բուժման է ընդունվել «Մասիս» ԲԿ, սակայն ըստ մեղադրանքի՝ հերթապահ բժիշկ Նելսոն Սուվարյանը կնոջ հիվանդության ախտորոշումը տրվել է ոչ լիարժեք և ուշացումով, մասնավորապես, չեն ախտորոշվել Գոհարիկ Հարությունյանի մոտ եղած` դեռևս 2015 թվականի օգոստոսի 27-ին կատարված որովայնի խոռոչի օրգանների համակարգչային շերտագրությամբ ախտորոշված քարային խոլեցիստիտի պերֆորատիվ /թափածածկված/ լինելը, ինչպես նաև այդ հետազոտության իրականացման ժամկետից հետո մինչև 2015 թվականի օգոստոսի 31-ն արդեն իսկ զարգացած թարախաֆիբրինային տեղային տարածուն /դիզֆուլ/ պերիտոնիտը` ենթալյարդային շրջանում ինֆիլտրատի գոյացմամբ:

Մինչդեռ, 31.08.2015թ. բժիշկ Նելսոն Սուվարյանին է ներկայացվել համակարգչային շերտագրության եզրակացությունը, ուստի այդ ժամկետում Գոհարիկ Հարությունյանի մոտ եղած վերը նշված հիմնական հիվանդության և դրա բարդությունների ախտորոշման հնարավորությունները եղել են, սակայն բուժող բժիշկ Նելսոն Սուվարյանի կողմից անտեսվել են նշված համակարգչային շերտագրության արդյունքները:

Այսպիսով, ներկայացված տվյալների պայմաններում «Մասիս» ԲԿ դիմելու ժամկետում Գոհարիկ Հարությունյանի հիմնական հիվանդության և դրա բարդությունների հայտնաբերման և բուժման համար օբյեկտիվ խոչընդոտող պատճառներ չեն եղել: Ավելին, 2015 թվականի օգոստոսի 31-ին և 2015 թվականի սեպտեմբերի 1-ին Գոհարիկ Հարությունյանի նկատմամբ վիրահատական միջամտություն չիրականացնելու Ն.Սուվարյանի պատճառաբանությունները մասնագիտական տեսանկյունից անհասկանալի և անընդունելի են` առավել ևս երբ կինը ստացիոնար բուժման է ենթարկվել:

Կնոջն այդ ժամկետում անհրաժեշտ շտապ վիրահատությունը Նելսոն Սուվարյանը ժամանակին չի իրականացրել, այլ կատարել է զգալի ուշացումով երկու օր անց՝ սեպտեմբերի 2-ին, որի հետևանքով որովայնի խոռոչում շարունակել է զարգանալ թարախաֆիբրինային տեղային տարածուն պերիտոնիտը` կոնգլոմերատի ձևավորումով:

Նման պայմաններում վիրահատության կատարման` կոնգլոմերատի կպումների անջատման ընթացքում կարող էր առաջանալ նկարագրված բարդությունը` ստամոքսի փոքր կորության շրջանում պատի ամբողջականության խախտումը, այդ շրջանին դրված կարերի հետագա անբավարարության առաջացումով և խուղակի ձևավորումով:

Ըստ մեղադրանքի՝ նշված պայմաններում Նելսոն Սուվարյանի կողմից անհրաժեշտ վիրահատության ժամանակին չիրականացնելը և հետվիրահատական շրջանում տվյալ բուժհաստատությունում թույլ տրված մյուս թերությունները և բացթողումները գտնվում են պատճառահետևանքային կապի մեջ Գոհարիկ Հարությունյանի մոտ թարախասեպտիկ բարդությունների զարգացման, օրգանիզմի ընդհանուր ծանր ինտոքսիկացիայի խորացման, պոլիօրգանային անբավարարության զարգացման հետ ինչն էլ հանգեցրել է կնոջ մահվան:
Ըստ «Մասիս» ԲԿ-ի վիրաբուժական բաժանմունքի վարիչ Գևորգ Գրիգորյանին առաջադրված մեղադրանքի՝ որպես վիրաբուժական բաժանմունքի վարիչ, ոչ պատշաճ է կատարել իր մասնագիտական պարտականությունները` դրանց նկատմամբ անփույթ և անբարեխիղճ վերաբերմունքի հետևանքով, ինչն անզգուշությամբ առաջացրել է բուժվող հիվանդի` Գոհարիկ Արտավազդի Հարությունյանի մահ:

2015 թվականի սեպտեմբերի 2-ին երբ կնոջ վիրահատությունը սկսել է բժիշկ Նելսոն Սուվարյանը, այնուհետև առաջացած բարդության պատճառով սկսած վիրահատությունն ավարտին է հասցրել Գևորգ Գրիգորյանը:
Վիրահատությունից հետո հետվիրահատական բուժումը ստանձնած բաժնի վարիչ Գևորգ Գրիգորյանը հիվանդին չի նշանակել անաէրոբ ինֆեկցիայի դեմ բուժում, չի կիրառել պարէնտերալ /ներերակային/ սնուցում, պատշաճ դինամիկ հսկողություն և լաբորատոր-գործիքային ստուգիչ հետազոտություններ, կարերի անբավարարության մասին վկայող նշանների պայմաններում ժամանակին գնահատելով տվյալ բուժհաստատությունում կրկնավիրահատության կատարման և հիվանդի հետագա վարման հնարավորությունները, ժամանակին չի կազմակերպել հիվանդի տեղափոխումը 3-րդ մակարդակի վերակենդանացման ծառայություն ունեցող բազմապրոֆիլային բուժհաստատություն:

Գոհարիկ Հարությունյանի հետվիրահատական բուժման շրջանում Գևորգ Գրիգորյանի կողմից թույլ տրված վերոնշված թերությունները և բացթողումները ևս գտնվում են պատճառահետևանքային կապի մեջ Գոհարիկ Հարությունյանի մոտ թարախասեպտիկ բարդությունների զարգացման, օրգանիզմի ընդհանուր ծանր ինտոքսիկացիայի խորացման, պոլիօրգանային անբավարարության զարգացման և մահվան ելքի հետ:

Գևորգ Գրիգորյանին և Նելսոն Սուվարյանին մեղադրանք է առաջադրվել ՀՀ քրեական օրենսգրքի 130 –րդ հոդվածի 2-րդ մասով, նրանց նկատմամբ որպես խափանման միջոց ընտրելով չհեռանալու մասին ստորագրությունը:

Աղբյուր` Փաստինֆո