Փաստ ինֆո

Դուբայում Հնդկաստանի քաղաքացու սպանության գործով այսօրվա դատական նիստում մեղադրող Արիս Բարսեղյանը հրաժարվել է մաքսանենգության մեղադրանքից՝ ապաքրեականացվելու հիմքով հոդվածի՝ ուժը կորցրած ճանաչվելու պատճառով:

Մնացյալ՝ ավազակության ու սպանության, մեղադրանքների մասով մեղադրողը պնդել է մեղադրանքը և միջնորդել բոլոր երեք ամբաստանյալներին դատապարտել ցմահ ազատազրկման:

«Փաստինֆո»-ի լրագրողի հետ զրույցում ամբաստանյալ Սեմյոն Եդիգարյանի պաշտպան, փաստաբան Կարեն Հակոբյանը նշեց, որ գործում չկա թույլատրելի ապացույցների համակցություն, իսկ առանց դրա անձանց ցմահ ազատազրկման դատապարտելը կհանգեցնի հերթական դատական սխալին:

Ավելի վաղ պաշտպանը բարձրաձայնել էր ՀՀ քաղաքացի երեք մեղադրյալների նկատմամբ կրկնակի քրեական հետապնդում իրականացնելու մասին, ինչն արգելված է օրենքով:

Մեր հետ զրույցում պաշտպանը ավելի վաղ պարզաբանել էր, որ Դուբայից քրեական գործի նյութերն ուղարկել են 2014թ. դեկտեմբեր ամսին. թեև ՀՀ գլխավոր դատախազը 2014թ. մարտի 13-ին մերժել է հանձնել ՀՀ քաղաքացիներին, բայց ըստ էության այդ ժամանակահատվածում և՛ Դուբայում է քրեական գործ քննվել, և՛ Հայաստանի Հանրապետությունում:

«Ի սկզբանե գործով կամայական քննություն է տարվել, այսինքն՝ ամբաստանյալների մասով անտեսվել է ինչպես միջպետական, այնպես էլ ներպետական օրենսդրությունը: Բնականաբար այս պայմաններում ստացված փաստական տվյալները հեռու են հավաստի լինելուց»,- ասել էր պաշտպանը:

Կարեն Հակոբյանը նշել էր նաև, որ տուժող՝ ադամանդների սեփականատեր ընկերության ներկայացուցիչն ու վկաները ԱՄԷ-ից հրաժարվել են ներկայանալ դատարան՝ առանց որևէ պատճառաբանության: Դրա հետևանքով գործով ամբաստանյալները զրկվել են իրենց դեմ ցուցմունքներ տված անձանց հարցաքննելու հնարավորությունից, այսինքն՝ խախտվել է ամբաստանյալների հակընդդեմ հարցման իրավունքը: Կարեն Հակոբյանը նաև տեսակետ էր հայտնել, որ եթե դատարանը օբյեկտիվորեն մոտենա հարցին, կորոշի, այդ ցուցմունքները թույլատրելի՞ են, թե՞ ոչ:

Հիշեցնենք, որ, ըստ մեղադրական եզրակացության, Հայաստանի Հանրապետության քաղաքացի Հովհաննես Մելքոնյանը հանցանքներ կատարելու համար ստեղծել է կազմակերպված կայուն խումբ՝ դրանում ընդգրկելով Հայաստանի Հանրապետության քաղաքացիներ, իր հորեղբոր որդի Խոսրով Մելքոնյանին և նրա ընկերոջը` Սեմյոն Եդիգարյանին, նրանք խմբով կատարել են առանձնապես խոշոր չափերով գույք հափշտակելու նպատակով ավազակություն, շահադիտական դրդումներով ու ավազակությամբ զուգորդված սպանություն:

Հովհաննես Մելքոնյանը և Սեմյոն Եդիգարյանը, ըստ մեղադրանքի, նախապես մշակված պլանի համաձայն, ադամանդները հափշտակելու նպատակով հարձակում են գործել Վաիիհավ Դհոնդիբա Սալոնկիի վրա, նրա կյանքի ու առողջության համար վտանգավոր բռնություն գործադրելով` բռունցքներով հարվածներ են հասցրել վերջինիս մարմնի տարբեր մասերին, քարշ տվել լոգարան, կպչուն ժապավենով Հովհաննես Մելքոնյանը կապել է Վաիիհավ Դհոնդիբա Սալոնկիի ձեռքերը, իսկ Սեմյոն Եդիգարյանը` ոտքերը, ապա ապօրինաբար Վաիիհավ Դհոնդիբա Սալոնկին կյանքից զրկելու դիտավորությամբ նրա գլխին անցկացրել են երկու պոլիէթիլենե փաթեթներ, դրանց եզրերը կպչուն ժապավենով ամուր սեղմելով, օդի հոսքը փակելով՝ մեխանիկական շնչահեղձության եղանակով ապօրինաբար, դիտավորությամբ կյանքից զրկել` սպանել են Վաիիհավ Դհոնդիբա Սալոնկիին և հափշտակել են «Color Source for Gold and Diamonds Company» ընկերության տնօրեն Ռահուլ Ռաջենդրա Կառնավարտին պատկանող առանձնապես խոշոր չափերի` 691.883.000 ՀՀ դրամին համարժեք 1.700.000 ԱՄՆ դոլար արժողությամբ, 6.800 կարատ տարբեր գույների ադամանդներ:

Աղբյուր` Փաստինֆո