Փաստ ինֆո

«Օֆշորի գործով» այսօրվա դատական նիստում հարցաքննվեցին երկու վկաներ, ովքեր 2009թ. ՀՀ էկոնոմիայի նախարարությունում մասնակցել են ադամանդագործության զարգացմանը նվիրված խորհրդակցությանը: Վկաները դատարան էին հրավիրվել պաշտպանական կողմի միջնորդությամբ:

Բելգիական ընկերության տրամադրած հումքով ադամանդի մշակմամբ զբաղվող «Արևակն» ՍՊԸ տնօրեն Վարդան Անդրեասյանը հայտնեց, որ այն ժամանակ Էկոնոմիկայի նախարար Ներսես Երիցյանը ներկայացրեց գործարար, գործով ամբաստանյալ Աշոտ Սուքիասյանին և առաջարկեց հումք ձեռք բերել իրենից: Նախարարի խոսքով լրացուցիչ հնարավորություն կա հումք գտնել ու լրացուցիչ աշխատատեղեր ստեղծել:

Խորհրդակցությանը վարչապետը ներկա չի եղել. խոսքը այն ժամանակվա վարչապետ Տիգրան Սարգսյանի մասին է:

Վկան հայտնեց, որ ոչ ոք հստակ չի ասել, որ աֆրիկյան Սիերրա-Լեոնեում հանքերը Աշոտ Սուքիասյանն են, շղարշով պատված են ներկայացվել:

Վկան հայտնեց, որ այցելել է նաև Աշոտ Սուքիասյանի գործարան՝ հումքը տեսնելու, այն գնային առումով իրեն չի հետաքրքրել: Գինը թանկ էր 400 դոլար մեկ կարատի ալմաստի դիմաց: Խոսքը հումքի գնի ու որակի համապատասխանության մասին է, ընդգծեց վկան:

Ըստ վկայի, ամբաստանյալն իրեն կոնկրետ չի ասել, թե ում հանքերի հումքն էր, սակայն, ըստ նրա, ենթադրելի էր:

Ի պատասխան պաշտպանական կողմի հարցի՝ վկան հայտնեց, որ ինքը չի հիշում, որ Ա.Սուքիասյանը փաստաթուղթ ներկայացրած լինի առ այն, որ ինքը հանք ունի: «Որքան հիշում եմ, չէր ասում, որ ունի սեփական հանքեր»:

Հանքերի վերաբերյալ մասնավոր զրույցների շրջանակում ինքն ասել է, որ չի հավատում, որ որևէ մեկը՝ լինի դա Սուքիասյանը կամ որևէ ուրիշ մեկը, կարող է հանքեր ունենալ Աֆրիկայում:

Վկան նշեց, որ ճիշտ կլիներ, որպեսզի նախարարը հարցաքննվի, որի «գործունեության արդյունքում» իրենք տուժել են:

Նոր Հաճնի գործարանի տնօրեն մյուս վկան՝ Կամո Դալլաքյանը, նշեց, որ հիշյալ խորհրդակցությանը հայտարարվեց, որ արտոնյալ պայմաններով հումքի ներկրման նոր հնարավորություն կա, այլընտրանային հումքի աղբյուր, ինչն ողջունելի ու շատ լավ կլիներ Հայաստանի համար: Նշվեց նաև, որ հանք է գնվել:

Այս վկան նույնպես գնացել է Սուքիասյանի մոտ՝ հումքը տեսնելու, գինը բարձր էր:

Եթե Աշոտ Սուքիասյանն էր ներկայացնում հանքերը, ուրեմն վկայի եզրահանգմամբ, կամ դրանք իրենն էին կամ համատեղ սեփականություն էին:

Հիշեցնենք, ամբաստանյալ Աշոտ Սուքիասյանը մեղադրվում է ՀՀ քրեական օրենսգրքի 190-րդ հոդվածի 3-րդ մասի 1-ին կետով՝ առանձնապես խոշոր չափերով հանցավոր ճանապարհով ստացված եկամուտներն օրինականացնելը (փողերի լվացումը), 178-րդ հոդվածի 3-րդ մասի 1-ին կետով՝ առանձնապես խոշոր չափերի խարդախություն, և 205-րդ հոդվածի 2-րդ մասով՝ առանձնապես խոշոր չափերով հարկերը վճարելուց չարամտորեն խուսափելը:

Ըստ մեղադրանքի՝ Աշոտ Սուքիասյանը խարդախությամբ ուրիշի առանձնապես խոշոր չափերով գույքի նկատմամբ իրավունք է ձեռք բերել, օրինականացրել հանցավոր ճանապարհով ստացված առանձնապես խոշոր չափերով եկամուտներ, ինչպես նաև չարամտորեն խուսափել է առանձնապես խոշոր չափերով հարկեր, տուրքեր և պարտադիր այլ վճարումներ կատարելուց:

Աղբյուր` Փաստինֆո