Փաստ ինֆո

ՀՀ քրեական օրենսգրքի հինգ հոդվածներով, այդ թվում՝ սեռական բնույթի հանցագործություններ կատարելու մեջ մեղադրվող նախկին ոստիկան Էդգար Վարագյանի գործով այսօր նոր պաշտպան է ներգրավվել: Փաստաբան Սեդա Սաֆարյանը դիմում է ներկայացրել դատարանին՝ խնդրելով իրեն որպես Է.Վարագյանի պաշտպան ներգրավել ու ժամանակ տրամադրել գործի նյութերին ծանոթանալու համար:

Դատարանն ամբաստանյալին հարցրել է՝ վճարունա՞կ եք, ինչին վերջինս դրական պատասխան է տվել: Նշենք, որ մինչ այդ Է. Վարագյանի պաշտպանությունն իրականացնում էր հանրային պաշտպան Կարեն Մեժլումյանը:

Ներկայումս ընթանում է Էդգար Վարագյանի դեմ գործով արդեն երկրորդ դատաքննությունը:

Գործն առաջին ատյանի դատարան է վերադարձել ՀՀ վերաքննիչ քրեական դատարանի կողմից Է.Վարագյանի դեմ գործով առաջին դատավճռի բեկանումից հետո:
Վերադաս դատարանը մասնակի բավարարել էր ամբաստանյալի ու այն ժամանակ նրա պաշտպան Կրոմվել Գրիգորյանի բողոքը և որոշել գործն ուղարկել նույն՝ Երևանի Կենտրոն և Նորք-Մարաշ վարչական շրջանների առաջին ատյանի դատարան՝ այլ կազմով նոր քննության:

Վերաքննիչ դատարանը գտել էր, որ գործը քննելիս առաջին ատյանի դատարանը նախաքննության ժամանակ գործին կցված փաստաթղթերի հրապարակումը կատարել է ՀՀ քրեական դատավարության օրենսգրքի 349-րդ հոդվածով սահմանված պահանջների խախտմամբ:

Մասնավորապես, նախաքննության ժամանակ ձեռք բերված, մեղադրանքի հիմքում դրված և գործին կցված փաստաթղթերը /ապացույցները/, որոնցում արտացոլված կամ հաստատված են գործի համար նշանակություն ունեցող հանգամանքներ, առաջին ատյանի դատարանում «ըստ էության չեն հրապարակվել և չեն հետազոտվել, այլ հրապարակվել են մեղադրական եզրակացությունում՝ որպես ապացույցներ արձանագրված գրառումները, ինչը կոնկրետ դեպքում հանգեցրել է դատավարական իրավունքի այնպիսի էական խախտման, որը կարող է ազդել գործով ճիշտ որոշում կայացնելու վրա»:

Վերաքննիչ դատարանը գտել է նաև, որ առաջին ատյանի դատարանը կոնկրետ դեպքում թույլ է տվել դատավարական իրավունքի այնպիսի էական խախտում, որը ՀՀ քրեական դատավարության օրենսգրքի 398-րդ հոդվածի համաձայն՝ հիմք է 17.11.2014թ. դատավճիռը բեկանելու ու քրեական գործը նույն դատարան այլ կազմով նոր քննության ուղարկելու համար:

Վերաքննիչ դատարանը սահմանել էր նոր քննության ծավալը. ըստ այդմ, նոր դատաքննությամբ անհրաժեշտ է հետազոտել նախաքննության ժամանակ գործին կցված կամ դատական նիստում առաջին ատյանի դատարանին ներկայացված փաստաթղթերը:

Է.Վարագյանի նկատմամբ առաջադրված մեղադրանքներով արդարացման դատական ակտ կայացնելու մասին պաշտպանի ու ամբաստանյալի պահանջի վերաբերյալ Վերաքննիչ դատարանը գտել էր, որ հիշյալ ապացույցների պատշաճ ընթացակարգով հետազոտված չլինելու պայմաններում «ամբաստանյալի անմեղության հարցին անդրադառնալը դեռևս վաղաժամ է և օբյեկտիվորեն հնարավոր չէ»:

Աղբյուր` Փաստինֆո