Փաստ ինֆո

Կաշառք ստանալու կասկածանքով ձերբակալված Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանը երեք ամիս վարույթ չի ընդունել քաղաքացի Ն. Հակոբյանի փաստաբանի կողմից ներկայացված հակընդդեմ հայցը:

«Փաստինֆո»-ին քրեական գործից որոշ մանրամասներ են հայտնի դարձել, ըստ որի՝ գործն ի վերջո գլուխ բերելու համար քաղաքացին իր փաստաբանի միջոցով գտել է մեկ այլ փաստաբանի, ով էլ դատավորի հետ «բանակցել» է գործի դրական ելքի համար:

Մեր տեղեկություններով, փաստաբանը փորձել է խոսել դատավորի հետ և պարզել, թե ինչու չի ընդունում հակընդդեմ հայցը, իսկ վերջինս էլ պատասխանել է, որ հակընդդեմ հայցը վարույթ չի ընդունել և մերժել է:
Ապա փաստաբանը քաղաքացուն ասել է, որ դատավորը իր օգտին գործը լուծելու համար 1000 ԱՄՆ դոլար է պահանջել, ընդ որում, դատավորը պայման է դրել՝ գումարը տալ հենց նույն օրը մինչև օրվա վերջ, հակառակ դեպքում հարցը իր օգտին չի լուծի:

Գումարն այդ օրը տալու պարագայում դատավորը նաև խոստացել է ասել, թե քաղաքացին ինչ ձևով նոր հակընդդեմ հայց ներկայացնի, քանի որ ըստ դատավորի նախորդ ներկայացված հայցը ճիշտ գրված չի եղել, եւ խոստացել քաղաքացու օգտին վճիռ կայացնել:

Եվ քանի որ քաղաքացին այդ օրը պահանջվող գումարը չի ունեցել և դատավորն էլ պահանջել է գումարը տալ նույն օրը՝ քաղաքացին զայրացել է ու համոզվելով, որ դատավորը կաշառք է պահանջում վրդովված որոշել է հաղորդում տալ:

Դատավոր Իշխան Բարսեղյանն իրեն առաջադրված մեղադրանքի վերաբերյալ հրաժարվել է որևէ դիրքորոշում հայտնել

Հոկտեմբերի 27-ին` ժամը 19.35-ին Երևան քաղաքի Արշակունյաց պողոտայի և Գարեգին Նժդեհի փողոցի խաչմերուկի գետնանցումում դատավոր Իշխան Բարսեղյանը հանդիպել է քաղաքացուն և վերջինիցս անձամբ ստացել 1000 ԱՄՆ դոլարը:

Իսկ հոկտեմբերի 28-ին` ժամը 01.45-ին դատավոր Իշխան Բարսեղյանը ձերբակալվել է խոշոր չափերով կաշառք ստանալու կասկածանքով:

Նշենք նաև, որ գումարը ստանալու օրը դատավորը քաղաքացուն ասել է, որ հոկտեմբերի 31-ին դատական նիստ է նշանակված և որ այդ օրվա դատական նիստը կհետաձգի, իսկ քաղաքացու փաստաբանին կասի, թե ինչ բովանդակությամբ հակընդդեմ հայց պետք է ներկայացվի, որ նա կարողանա գործը լուծել իր օգտին:

Այսպիսով, ԱԱԾ-ի կողմից օպերատիվ օպերատիվ-հետախուզական միջոցառման արդյունքում Հատուկ քննչական ծառայությունը հարուցել է քրեական գործ, որի շրջանակներում դատավոր Իշխան Բարսեղյանին մեղադրանք է առաջադրվելով ՀՀ քրեական օրենսգրքի 311-րդ հոդվածի 4-րդ մասի 3-րդ կետով:

Ելնելով դատավորի կարգավիճակից, որ նա կարող է որոշակի ազդեցություն ունենալ մինչդատական վարույթում գործի օբյեկտիվ քննության վրա նախաքննական մարմնի կողմից դատավորի նկատմամբ խափանման միջոց կալանավորումն ընտրելու վերաբերյալ միջնորդությունը բավարարվեց:

Քրեական գործով մեղադրանք է առաջադրվել նաեւ  ՀՀ քրեական օրենսգրքի 313-րդ հոդվածի 1-ին մասով և նրա նկատմամբ որպես խափանման միջոց կիրառվեց չհեռանալու մասին ստորագրությունը:

Աղբյուր` Փաստինֆո