Փաստ ինֆո

Շենգավիթ վարչական շրջանում այսօր շարունակվեց Մերի Մարգարյանի և նրա նորածնի մահվան գործով դատական նիստը:

Այսօր հարցաքննվեցին «Շենգավիթ» ԲԿ-ի բժիշկները: Մասնավորապես՝ ռադիոլոգը Զարուհի Հարությունյանը հայտնեց, որ 2015թ. հուլիսի 27-ին զննել է Մերի Մարգարյանին, հայտնաբերել չափավոր սակավաջրություն, փայծաղի չափերի մեծացում, իսկ թոքերում ոչ մի էական փոփոխություն չի նկատել:

Ըստ վկա ռադիոլոգի՝ Բախշյանն իրեն տեղեկացրել է, որ հղին գանգատվում է ընդհանուր թուլությունից, ջերմությունից և ինչ հետազոտություն որ նշանակվել է Բախշյանի կողմից, ինքը կատարել է:

Վկայի ցուցմունքներում առկա էական հակասությամբ պայմանավորված հրապարակվեց նախաքննական ցուցմունքը, ըստ որի՝ ռադիոլոգի կողմից կատարված ուլտրաձայնային հետազոտությամբ հղիի մոտ հայտնաբերվել է պտղաջրերի չափավոր սակավաջրություն, իսկ պորտալարը փաթաթված է եղել նորածնի պարանոցին:

Ինչ վերաբերում է նրան, որ ռադիոլոգը հղիի թոքերում որևէ էական փոփոխություն չի հայտնաբերել, որը սակայն հայտնաբերվել է ժամեր անց «Էրեբունի» ԲԿ-ում, ռադիոլոգը վկան հայտնեց, որ երբ ինքը հետազոտել է որևէ փոփոխություն չի երևացել:

Հաջորդիվ հարցաքննվեց անասթեզիոլոգ և ինտենսիվ թերապիայի բաժնի վարիչ Աշոտ Ամրոյանը, ով, թերևս, միակ վկան էր, որ իր ցուցմունքն սկսեց ցավակցական խոսքով:

Ըստ Ամրոյանի՝ Մերիին հետազոտելուց հետո նրա մոտ հաճախասրտություն է հայտնաբերել և ջերմություն՝ 38,5 աստիճան, ավելի ուշ երբ գիտակցության խանգարում է նկատվել Մերիի մոտ հրավիրվել են նեղ մասնագետներ:

Ամրոյանը ևս պնդեց, որ հղիին կեսարյան հատմամբ ծննդալուծելու ցուցում իրենք չեն ունեցել և չեն էլ քննարկել այդ հարցը:

Իսկ երբ նեղ մասնագետը կասկածել է, սուբարախնոիդալ արյունազեղում, մանկաբարձության և գինեկոլոգիայի բաժանմունքի վարիչ Աշոտ Սիրունյանը հարց է տվել անասթեզիոլոգին՝ այս պայմաններում կարո՞ղ են կեսարյան հատում կատարել, որին ի պատասխան Ամրոյանն ասել է. «Լավ կլինի բազմապրոֆիլային հիվանդանոցում կատարվի, քանի որ իրենք համապատասխան սարքավորումներ և բժիշկներ չունեն»:

Հարցին, թե արդյոք Շուշանիկ Բախշյանն արգելե՞լ է, որ կատարեն կեսարյան հատում, վկան ասաց որ չի արգելել, կարծիք է հայտնել, որ պետք է բազմապրոֆիլային հիվանդանոցումը շարունակվի հետագա բուժումը:

«Շենգավիթ» ԲԿ-ի մանկաբարձ-գինեկոլոգ Տիգրան Սարգսյանն էլ, ով 2015թ. հուլիսի 26-ին ընդունել է հիվանդանոցում Մերի Մարգարյանին, հայտնեց, որ Մերիի ջերմությունը եղել է 38,6, գանգատվել է մարմնի թուլությունից, կոկորդում քերոցի զգացողությունից:

Ընդունվելիս Մերիի վիճակը բավարար է եղել, և նրան կեսարյան հատմամբ ծննդալուծելու ցուցում չի եղել:

Հղիին ընդունած բժշկի կողմից հիվանդության պատմագրում գրառում է կատարվել ընդունվելու պահին և 9 ժամ 20 րոպե հետո. արդեն լուսադեմին՝ ժամը 04.00-ի սահմաններում, այս ընթացքում, ըստ վկայի, ինքն անհրաժեշտություն չի տեսել նրան հարցնելու, թե՝ ո՞նց է. «Հո յուրաքանչյուր 25 հիվանդի դուռը չենք թակելու հարցնենք ո՞նց են, ի՞նչ գանգատներ ունեն:

Հաջորդ՝ նոյեմբերի 8-ին կայանալիք նիստում վկաների հարցաքննությունը կշարունակվի:

Աղբյուր` Փաստինֆո