Փաստ ինֆո

Սոցիալական ցանցում վարքագծի մի քանի պարզ կանոններ կան, որոնք կօգնեն խուսափել իրականության մեջ մեծ խնդիրներ ունենալուց:

Ըստ segodnya.ua-ի, կանոններից առաջինը՝ չարժե ի ցույց դնել փաստաթղթերի, օրինակ՝ անձնագրի ու վարորդական իրավունքի գրքույկի լուսանկարները, եթե չեք ցանկանում, որ խարդախների ձեռքում հայտնվեն դրանց ճշգրիտ պատճենները:

Չարժե կիսվել նաև հանգստի ծրագրերով՝ բացի անձնագրի լուսանկարից՝ թարմ մուտքի արտոնագրի հետ միասին, չարժե հրապարակել նաև նախատեսվող հանգստյան այլ մանրամասներ ևս: Ավելի լավ է դրանով պարծենալ վերադառնալուց հետո, հակառակ դեպքում բնակարանային գողերը կիմանան, որ ձեր բնակարանը մոտակա մեկ-երկու շաբաթում հյուրընկալ կերպով դատարկ է լինելու:

Չարժե հրապարակել բանկային վավերապայմանները՝ ռեկվիզիտները, բանկային քարտերի համարները և այլ տվյալներ, որոնք հնարավորություն կտան խարդախներին ձեր քարտը պատճենահանել և փողեր հանել անմիջապես ձեր բանկային քարտից:

Չարժե ցանցում ցույց տալ շահող տոմսերը: Այսպես, 825 դոլար շահած ավստրալուհին սելֆի է արել և հավերժացրել չեկը, որով կարելի է ստանալ շահած գումարը, լուսանկարը տեղադրվել է ՖԲ-ում, կադրում երևացող շտրիխ-կոդից էլ մի չարագործ օգտատեր օգտվել է և տիրացել ուրիշի գումարին:

Եթե դուք սոցցանցերի ակտիվ օգտատեր եք և հաճախ բանավեճի մեջ եք մտնում ու մեկնաբանություններ անում, չարժե ի ցույց դնել ձեր հասցեն՝ ինչպես գրել է բանաստեղծը, մեզ տրված չէ կանխագուշակել, թե ինչպես կարձագանքեն մեր խոսքին: Մանավանդ եթե ձեր բախտը չի բերել և դուք ընդհարվել եք գժի հետ, որը կցանկանա պատժել ձեզ ցանցում կտրուկ արտահայտվելու համար:

Չարժե ցանցում տեղադրել նյութեր երեխաների մասին: Ձեզ հաջող թվացող լուսանկարները կարող են բորբոքել ձեր ընկերներին: Չարժե տեղադրել երեխաների լուսանկարները, հատկապես նրանք, որ կատարվել են տանը կամ լողափին, ով գիտե, թե ինչ աչքերով և ինչ նպատակով են զննում ձեր երեխաներին լրիվ անծանոթ, իսկ գուցեև սոցցանցի ոչ այնքան նորմալ այցելուները: Ավելի լավ է դրանից խուսափել:

Չարժե բողոքել աշխատանքից կամ ղեկավարությունից: Ակնհայտ է թվում, բայց այնուամենայնիվ բազմաթիվ պատմություններ կան, երբ մարդիկ կտրուկ քննադատում են իրենց ղեկավարությանը ՖԲ-ի իրենց էջում, իսկ հետո զարմանում են, որ անհրաժեշտ է նոր աշխատանք փնտրել:

Բացի այդ չարժե չափից դուրս շատ ժամանակ նստել սոցցանցերում աշխատանքային օրվա ընթացքում. դա ձեր ղեկավարին կարող է դուր չգալ, որ անմիջական պարտականությունները կատարելու փոխարեն դուք մեկնաբանում եք ընկերների լուսանկարները:

Չարժե բացասաբար արտահայտվել նաև հին աշխատավայրի մասին, նոր գործատուն կարող է իր վրա փորձել այն իրավիճակը, երբ դուք ժամանակի ընթացքում նրա մասին էլ կասեք տհաճ բաներ:

Ի դեպ, Մարդու իրավունքների եվրոպական դատարանը հաստատել է սոցցանցերում գրառումների համար աշխատակիցներին աշխատանքից ազատելու գործատուների իրավունքը:

Այսպես, դատարանը մերժել է ռումինական ինժեների հայցը ՖԲ-ի իր էջում աշխատանքային ժամին անձնական հաղորդագրություններ տեղադրելու համար աշխատանքից ազատելու դեմ:

Աղբյուր` Փաստինֆո