Փաստ ինֆո

Ապօրինի կերպով ձեռք բերված «ԱԿ» տեսակի ինքնաձիգից Վ.Ասոյանի սպանության մեջ մեղադրվող Գագիկ Ղանդիլյանն այսօրվա դատական նիստում հայտարարեց, որ չի ցանկանում ցուցմունքներ տալ: Սակայն «հարցերին պատասխանելո՞ւ եք» դատարանի հարցին ամբաստանյալը պատասխանեց՝ ընթացքը ցույց կտա, այսինքն՝ հարցեր կլինեն, որ կպատասխանի և հարցեր կլինեն, որ չի պատասխանի:

Ցուցմունք տալուց հրաժարվելու հետ կապված դատարանը հրապարակեց ամբաստանյալի նախաքննական ցուցմունքները: Մասնավորապես, որպես կասկածյալ տված ցուցմունքում նա հայտնել էր, որ իրեն մեղսագրվող արարքը կատարել է և որ ֆիզիկապես և հոգեպես առողջ է:

Այն ժամանակ կասկածյալն ասել էր, որ շուրջ 15 տարի ճանաչել է տուժողին, սակայն նրա հետ կապ չի ունեցել: Վերջինս երեք տարի առաջ տեղի ունեցած հեռախոսազրույցում հայհոյել է իրեն և ինքը դա չի մոռացել: Երբ 2015թ. եղբորը պատկանող ավտոմեքենայով գնացել է այն թաղամասը, որտեղ բնակվում էր իր ընկերը, իր տան մոտ տեսել է նույն թաղամասում բնակվող տուժողին և առաջին անգամ իմացել է, որ տուժողն արտասահմանից վերադարձել է, գնացել է տուն, վերցրել ինքնաձիգն ու փամփուշտները, ինքնաձիգը լիցքավորել ու կրակահերթ արձակել տուժողի վրա, ապա փորձել է մեկնել Ախալքալաք, սակայն Բավրայի անցակետում ոստիկաններն իրեն բռնել են ու տեղափոխել ոստիկանության բաժին: Կասկածյալը հայտնել էր, որ հանցագործությունը կատարելու պահին ոչ իր հետ, ոչ էլ փողոցում որևէ այլ անձնավորություն՝ բացի տուժողից, չի եղել:

Գ.Ղանդիլյանը նախաքննական ցուցմունքում հայտնել է, որ տուժողը հիշյալ հեռախոսազրույցում հայհոյել է իրեն ու ահաբեկել՝ «ոտքս ընկնի ՀՀ՝ քեզ գյուլելու եմ»:

Որպես մեղադրյալ հարցաքննվելիս նույնպես Գ.Ղանդիլյանն իրեն մեղավոր է ճանաչել սպանության և ապօրինի զենք պահելու մեղադրանքում, զղջացել կատարածի համար: Մեղադրյալը հայտնել է, որ նախկինում իրեն հայհոյելու ու ահաբեկելու համար կրակել ու սպանել է տուժողին:

Ի պատասխան իր պաշտպանի հարցի՝ ամբաստանյալն արդեն դատական նիստում պնդեց, որ որևէ այլ անձ իր տեսադաշտում չի եղել, եթե հայտնվեր, ապա «ուրիշի կյանքը վտանգի տակ չէի դնի»:

Պատասխանելով մեղադրողի հարցերին՝ ամբաստանյալը հայտարարեց, որ իր և տուժողի միջև՝ բացի հեռախոսային միջադեպից, այլ միջադեպ չի եղել: Դատարանում էլ ամբաստանյալը պնդեց, որ սպանության դրդապատճառը նախկինում իրեն հայհոյելն ու ահաբեկելն է եղել. «Իմ կյանքին վտանգ էր սպառնում»:

Ամբաստանյալը հայտարարեց նաև, որ իմացել է, որ տուժողը հետաքրքրվել ու փնտրել է իրեն. «Ես մտածում եմ, որ իր ասածն էր ուզում իրականացնել»: Մեկ այլ հարցի պատասխանելով ամբաստանյալը հայտարարեց. «Ես գիտեմ, իր ասածներն իրականություն են դարձել»:

Իսկ ապօրինի կերպով ձեռք բերված զենք-ռազմամթերք պահելու մասին ամբաստանյալը հայտարարեց. «Սաղս էլ տղա ենք, ո՞վ զենք չի սիրում»:

Ձեզ մեղավոր ճանաչո՞ւմ եք հարցին ամբաստանյալը պատասխանեց՝ «այո, իհարկե», նա հայտնեց նաև, որ զղջում է:

Տուժողի իրավահաջորդի ներկայացուցիչ Սեդա Սաֆարյանը միջնորդեց որպես լրացուցիչ վկա դատարան հրավիրել ու հարցաքննել տարածքի մի բնակչուհու, ով դեպքի ժամանակ, ըստ նրա, մանկահասակ երեխայի հետ անցնելիս վնասվածք է ստացել:

Մեղադրողն առարկեց միջնորդության դեմ՝ նշելով, որ նախաքննության ընթացքում կինը հարցաքննվել է և եթե պիտանի տեղեկություն հայտնած լիներ, այն կդրվեր մեղադրանքի հիմքում և արարքն էլ կվերաորակվեր: Ըստ մեղադրողի, դա զուտ ժամանակի կորուստ կլինի, որևէ դրական արդյունք չի տալու: Պաշտպանական կողմն էլ լրացուցիչ վկային հարցաքննելու միջնորդության վերաբերյալ նշեց, որ այն ժամանակ ձգձգելու միտում ունի:

Դատարանն էլ իր հերթին նշեց, որ վկան մանրամասն հարցաքննվել է և մերժեց միջնորդությունը՝ հիմնավոր չլինելու պատճառաբանությամբ:

Տուժողի իրավահաջորդի ներկայացուցիչը միջնորդեց նաև իրեն երեք օր ժամանակ տրամադրել արարքի քրեաիրավական որակման հետ կապված միջնորդություն ներկայացնելու համար:

Դատարանը թեև նշեց, որ նման միջնորդությամբ կողմը կարող է հանդես գալ դատական վիճաբանությունների փուլում, այդուհանդերձ բավարարեց միջնորդությունը:

Հաջորդ դատական նիստում միջնորդության քննարկումից հետո դատարանում ըստ ամենայնի կսկսվի դատական վիճաբանությունների փուլը՝ ճառերի հրապարակումը:

Աղբյուր` Փաստինֆո