Փաստ ինֆո

2015թ. հունվարի 29-ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով այսօրվա նիստը հետաձգվեց՝ գործով երկու ամբաստանյալների առողջական խնդիրներ ունենալու պատճառաբանությամբ:

Ավան և Նոր-Նորք վարչական շրջանների ընդհանուր իրավասության դատարանում այսօրվա դատական նիստը սկսվեց շուրջ կես ժամ ուշացումով. պարզվեց ամբաստանյալներ Նորայր Սահակյանի և Վաչե Սահակյանի համար շտապօգնություն էր հրավիրվել դատարան, որ նրանք բուժզննման ենթարկվեն:

Դատական նիստը վերսկսվելուց հետո նախագահող դատավոր Դավիթ Հարությունյանը տեղեկացրեց, որ բժիշկների հավաստմամբ ամբաստանյալներն առողջական խնդիրներ ունեն։ Ըստ բժշկական տեղեկանքի՝ ՝ Նորայր Սահակյանի մոտ առկա է եղել զարկերակային ճնշման բարձրացում՝ 150/ 90, ստամոքսի խանգարում:

Վաչե Սահակյանի մոտ ևս նույնանման վիճակ է արձանագրվել՝ զարկերակային ճնշումը՝ 130/85 և կրկին ստամոքսի խանգարում:

Ըստ շտապօգնության բժշկի՝ նրանց տեղում բուժօգնություն ցուցաբերել հնարավոր չէ և անհրաժեշտ է, որ լրացուցիչ հետազոտվեն, ապա բուժում ստանան: Նման պայմաններում դատական նիստը հնարավոր չէր շարունակել եւ այն հետաձգվեց:

Նշենք նաև, որ այսօր դատարան էր ներկայացել փաստաբան Ինգա Ավագյանը, ով համատեղության կարգով՝ Հովիկ Արսենյանի հետ, կիրականացնի ամբաստանյալ Վարազդատ Սաֆարյանի պաշտպանությունը:
Ըստ մեղադրանքի՝ Գնել Թևոսյանը, Նորիկ Սահակյանը, Վաչե Սահակյանը և Մովսես Ազարյանը 2015թ. հունվարի 29-ին ժամը 02:00-ից 03:00-ի սահմաններում ՀՀ ՊՆ N զորամասի առաջին գումարտակի առաջին մարտկոցի ննջարանում առանձին դաժանությամբ, վերը նշված անձանցով, խուլիգանական դրդումներով սպանել են Հայկազ Արկադիի Բարսեղյանին:

Ինչպես ավելի վաղ «Փաստինֆո»-ն տեղեկացրել էր, նախաքննության արդյունքներով` 4 հոգուց բաղկացած կազմակերպված խումբը գործել է առանձին դաժանությամբ՝ Հայկազ Բարսեղյանին զրկելով անգամ որևէ կերպ օգնություն կանչելու հնարավորությունից. մասնավորապես՝ փակել են բերանը, անշարժացրել։

Կուրսանտի դին հայտնաբերվել է հունվարի 29-ին՝ ՊՆ Վազգեն Սարգսյանի անվան ռազմական ինստիտուտի մարզահրապարակում պտտաձողի վրա պարանով կախված վիճակում՝ մահացած։ Սակայն պարզվել է, որ դա եղել է ինքնասպանության իմիտացիա. երիտասարդը սպանված է եղել մինչ այդ։

Մասնավորապես՝ մի քանի այլ զինծառայողներ բռնել են անկողնում պառկած կուրսանտի ոտքերը և ձեռքերը, փակել բերանը՝ զրկելով օգնություն կանչելու հնարավորությունից, ապա սուր կտրող-ծակող գործիքով կտրել նրա աջ նախաբազկի արմնկափոսի երակը, որին հաջորդել են հարվածներ կուրսանտի կրծքավանդակին և դեմքին, այնուհետև սեղմելով պարանոցը՝ կոտրել են կուրսանտի ենթալեզվային ոսկորը։
Ապա հագցրել են կուրսանտի հագուստները և տեղափոխել զորամասի մարզահրապարակ, որտեղ և պտտաձողից կախել են այս դաժան գործողությունների արդյունքում շնչահեղձությունից մահացած Հայկազ Բարսեղյանին:

Գնել Թևոսյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 5-րդ, 7-րդ և 10-րդ կետերով և 358.1-րդ հոդվածի 2-րդ մասով, Նորիկ Սահակյանին՝ 104-րդ հոդվածի 2-րդ մասի 5-րդ, 7-րդ և 10-րդ կետերով և 359-րդ հոդվածի 1-ին մասով, Վաչե Սահակյանին՝104-րդ հոդվածի 2-րդ մասի 5-րդ, 7-րդ և 10-րդ կետերով, 359-րդ հոդվածի 2-րդ մասի 2-րդ կետով և 359-րդ հոդվածի 1-ին մասով, իսկ Մովսես Ազարյանին՝104-րդ հոդվածի 2-րդ մասի 5-րդ, 7-րդ և 10-րդ կետերով, 2 դրվագով՝ 359-րդ հոդվածի 2-րդ մասի 2-րդ կետով և 2 դրվագով՝ 359-րդ հոդվածի 1-ին մասով:

Աղբյուր` Փաստինֆո