Փաստ ինֆո

Քննչական մարմնի ու դատախազության վարկածով սպանության փորձի գործով մեղադրյալի՝ Ռոբերտ Ավետիսյանի կալանքի տակ գտնվելուց շուրջ մեկ ամիս անց տեղի է ունեցել մեղադրյալի ու տուժողի առերես հարցաքննությունը, որով հերքվել է մեղադրանքը:

Ինչպես «Փաստինֆո»-ի լրագրողի հետ զրույցում նշեց Ռ.Ավետիսյանի պաշտպան, փաստաբան Ինեսսա Պետրոսյանը, առերեսման ժամանակ տուժող Ռուբեն Կոստանյանը շատ զարմացել է, որ Ռոբերտ Ավետիսյանին սպանության փորձի մեղադրանք են առաջադրել: Տուժողն ասել է այն, ինչ սկզբանե ասել է մեղադրյալը, որ Ռոբերտ Ավետիսյանը միանշանակ իրեն սպանելու դիտավորություն չի ունեցել, իր վրա զենք չի ուղղել:

«Տուժողն ասում է՝ ես բողոք չունեմ, բացառվում է, այս անձնավորությունը ինձ սպանելու նպատակ չի ունեցել»:

Այս պայմաններում պաշտպանը միջնորդություն է ներկայացրել դատախազին իր պաշտպանյալի նկատմամբ խափանման միջոցը վերացնելու, ինչպես նաև սպանության փորձի հոդվածով քրեական հետապնդումը դադարեցնելու վերաբերյալ: «Ստանում եմ պատասխան քննչական մարմնից, որտեղ նշվում է, որ իմ միջնորդության քննությունը հետաձգվում է»,- ասաց Ի.Պետրոսյանը: Ավելին` ինքը հրավիրվում է քննչական բաժին, որտեղ իրեն տեղեկացնում են մեղադրյալի նկատմամբ որպես խափանման միջոց կիրառված կալանքի ժամկետը երկարացնելու վերաբերյալ միջնորդություն հարուցելու որոշման մասին՝ միջնորդությունը դատարանը պետք է քննի հոկտեմբերի 31-ին:

Ընդ որում հետաքրքրական է, որ միջնորդությանը կից ներկայացված են նույն այն փաստաթղթերը, որոնք ներկայացված էին կալանքը որպես խափանման միջոց ընտրելու ժամանակ և ներկայացվել են մի քանի փաստաթղթերի՝ տուժողի ու մեղադրյալի առերեսման հարցաքննության, առերեսման անցկացման օրը կատարված տուժող Ռուբեն Կոստանյանի քննչական փորձարարության, մեղադրյալին հրազենային վնասվածք հասցրած մեկ այլ անձի՝ Ռոբերտ Եփրեմյանի, փորձարարության, տուժող Ռուբեն Կոստանյանի լրացուցիչ ցուցմունքի արձանագրությունների առաջին էջերը:

Զավեշտալի է, որ առաջին էջով է ներկայացված նաև հոկտեմբերի հինգին տեղի ունեցած հիշյալ առերես հարցաքննության արձանագրությունը՝ թեև հարցաքննությանը ներկա են եղել և՛ քննիչը, և՛ պաշտպանը, և՛ մեղադրյալը: «Հարց է ծագում՝ ումի՞ց է թաքցնում առերեսման արձանագրությունը վարույթն իրականացնող մարմինը՝ դատարանի՞ց, ես մասնակցել եմ, քննիչը մասնակցել է պաշտպանյալս մասնակցել է: Ինչո՞ւ, որ դատավորը չիմանա՞, որ ցուցմունք չկա այդ մարդու դեմ»,- ասաց Ինեսսա Պետրոսյանը:

«Ուզում եմ հասկանալ ինչի՞ պետք է հանգեցնի վարույթն իրականացնող մարմնի կամ դատախազության գործելաոճը, ի՞նչ են նրանք ուզում սրանով ասել. պաշտպանը մասնակցում է առերես հարցաքննությանը, որի արձանագրությունը ինչի՞ց ելնելով չի ներկայացվում դատարանին, ի՞նչ իրավունքով: Միակ նպատակն այստեղ այն է, որ Ռոբերտ Ավետիսյանը շարունակի մնալ կալանքի տակ», - ասաց Ինեսսա Պետրոսյանը:

Հոկտեմբերի երեքին, երբ անցկացվել է առերես հարցաքննությունն, ըստ Ինեսսա Պետրոսյանի, արդեն իսկ գործի ելքը պարզ էր: «Դրանից հետո նույն դատախազը պետք է ցուցում տար անձին կալանքից ազատել, բայց մինչև օրս ոչ միայն ապօրինի պահում են կալանքի տակ, այլև դիմել են կալանավորումը երկարացնելու միջնորդությամբ ու ինձ բերել են առաջին էջ, ո՞վ պետք է բերի մնացած էջերը»,- ասաց Ինեսսա Պետրոսյանը:

Պաշտպանը հայտնեց, որ ինքը միջնորդություն է ներկայացրել Մալաթիա-Սեբաստիա վարչական շրջանի դատարան, որպեսզի վերջինս պարտավորեցնի վարույթն իրականացնող քննիչին դատարանին ներկայացնել իր՝ պաշտպանի, մասնակցությամբ կատարված քննչական գործողության՝ առերեսման, արձանագրության, ինչպես նաև մյուս բոլոր ներկայացված փաստաթղթերի ամբողջական տեքստերը: «Դրանք էական նշանակություն ունեն ապացուցելու համար, որ հիմնավոր կասկածն ուղղակի բացակայում է իմ պաշտպանյալին մեղսագրված արարքում»,- ասաց պաշտպանը:

Աղբյուր` Փաստինֆո