Փաստ ինֆո

Դատարանն այսօր մերժեց քսան տարուց ավելի պատիժը կրող ցմահ դատապարտյալ Արթուր Մկրտչյանի դիմումն ընդդեմ ՔԿՀ վարչական հանձնաժողովի որոշման:

Հանձնաժողովը մերժել էր միջգերատեսչական հանձնաժողովին ներկայացնել Արթուր Մկրտչյանին պայմանական վաղաժամկետ ազատ արձակելու կամ պատժի չկրած մասն ավելի մեղմ պատժատեսակով փոխարինելու հարցը: Ինչպես նշեց դատապարտյալի շահերի պաշտպան, փաստաբան Ռոբերտ Ռևազյանը, որոշումն անպայման կբողոքարկվի Վերաքննիչ դատարան:

Բողոքի գործով այսօրվա նիստում քննարկման առարկա դարձավ ՔԿՀ տեղեկանքը, որում որպես մերժման պատճառ նշվում էր, որ տուժողների կյանքին ու առողջությանը պատճառված վնասի քաղհայցը դատապարտյալի կողմից չի մարվել: Սակայն տեղեկանքում նշված չէր երկրորդ պատճառը, որը ևս ՔԿՀ ներկայացուցիչ Արմեն Պետրոսյանը պնդում է՝ դատապարտյալը դրական չի բնութագրվում: Ըստ ՔԿՀ ներկայացուցչի, «աշխատանքները շարունակվում են» արտահայտությունը հենց նշանակում է, որ դատապարտյալը դրական չի բնութագրվում: Իր հերթին դատախազ Վահան Հարությունյանն պարզաբանեց, որ աշխատանքներ տարվում են այն անձանց հետ, ովքեր դեռևս դրական բնութագիր չունեն:

Ռոբերտ Ռևազյանը հակառակ կողմի և դատարանի ուշադրությունը հրավիրեց բուն վիճարկվող որոշման վրա, որում առկա չէ որոշման հիմքը: Ըստ ՔԿՀ ներկայացուցչի, որոշումը գրված է կառավարության սահմանած որոշման ձևի համաձայն: Իր հերթին Ռոբերտ Ռևազյանը վկայակոչեց «Իրավական ակտերի մասին» ՀՀ օրենքի դրույթներն, ըստ որոնց իրավական ակտերը պետք է լինեն պատճառաբանված ու հիմնավորված:

Արթուր Մկրտչյանը հարցեր ուղղելով ՔԿՀ ներկայացուցչին և պատասխաններ չստանալով, ինքը ներկայացրեց որոշ տվյալներ: Մասնավորապես, պատժի կրման քսանամյա սահմանը հատել են մոտ 15 ցմահ դատապարտյալներ, նրանցից ոչ ոքի դիմումը չի բավարարվել: 25-30 մահապատժի կամ ցմահ ազատազրկման դատապարտվածներ մահացել են:

Արթուր Մկրտչյանը նորից նշեց, որ քաղհայցը մարված չլինելու պատճառի մասին դրույթը իր նկատմամբ կիրառելի չէ, քանի որ իրեն ներում է շնորհվել և մահապատիժը ցմահ ազատազրկմամբ փոխարինվել այդ դրույթի՝ Քրեակատարողական օրենսգրքում ամրագրվելուց առաջ՝ 2003թ.:

Աղբյուր` Փաստինֆո