Փաստ ինֆո

«Բաժնետիրական ընկերությունների մասին» ՀՀ օրենքի 88-րդ հոդվածի 5-րդ մասը համապատասխանում է Հայաստանի Հանրապետության սահմանադրությանը՝ սույն որոշման ՍԴ արտահայտած իրավական դիրքորոշումների շրջանակներում: Այս մասին այսօր որոշում կայացրեց ՀՀ սահմանադրական դատարանը՝ քննելով քաղաքացի Կարինե Տիտանյանի դիմումը:

Քաղաքացին ՍԴ էր դիմել՝ խնդրելով ՀՀ սահմանադրության 1-ին հոդվածին, 3-րդ հոդվածի 2-րդ և 3-րդ մասերին, 28-րդ, 29-րդ հոդվածներին, 57-րդ հոդվածի 2-րդ մասին, 61-րդ հոդվածի 1-ին մասին, 79-րդ և 80-րդ հոդվածներին հակասող ու անվավեր ճանաչել հիշյալ դրույթը:

Ըստ դիմողի՝ իր համար բացասական իրավական հետևանքներ է առաջացրել և ՀՀ վճռաբեկ դատարանի կողմից իր նկատմամբ կիրառված և դատական ակտում անմիջականորեն վկայակոչված դրույթը, ըստ որի ժողովն իրավունք ունի ցանկացած ժամանակ լուծել միանձնյա գործադիր մարմնի, կոլեգիալ գործադիր մարմնի անդամների, կառավարիչ-կազմակերպության կամ կառավարչի հետ կնքված պայմանագրերը, եթե կանոնադրությամբ այդ հարցի լուծումը վերապահված չէ խրոհրդի իրավասությանը:

Դիմողը գտել է, որ վիճարկվող իրավակարգավորումն ակնհայտորեն հակասում է իրավական պետության արժեքաբանական հիմքը կազմող իրավական որոշակիության հիմնարար սկզբունքին:

Ըստ դիմողի, ցանկացած իրավակարգավորում պետք է լինի այնպիսին, որ երաշխավորի, հնարավորություն տա անհատին համադրելու իր վարքագիծը դրանում մատնանշված իրավական պատվիրանի հետ:

Լուսանկարը՝ Armenpress-ի

Աղբյուր` Փաստինֆո