Փաստ ինֆո

Ծանրամարտի աշխարհի պատանեկան առաջնությունից Հայաստանի հավաքականը վերադարձել է երկու բրոնզե մեդալներով: 85 կգ քաշային կարգում բրոնզե մեդալ էր նվաճել Կարեն Ավագյանը՝ երկամարտի 318 կգ (145-173) կգ արդյունքով, իսկ կանանց պայքարում Արփինե Դալալյանը երրորդն էր 69+ քաշային կարգում (93-127 (220)):

Armsport.am-ի հետ զրույցում Դալալյանը խոսել է կայացած առաջնության մասին:

«Տպավորություններս  լավ են, շատ լավ անցավ մրցաշարը: Հաղթահարեցինք բոլոր դժվարությունները: Այս տարի իմ չորրորդ միջազգային մրցաշարն էր եւ լավագույն արդյունքը:

Կարծում եմ՝ կարող եմ ավելին: Մինչեւ մյուս մրցաշարը դեռ շատ ժամանակ կա, այդ ընթացքում կաշխատեմ բարելավել կիլոգրամներս»:

Հայ մարզուհին հստակ է կատարել 6 մոտեցումներից հինգը, պոկում վարժությունում բարձրացնելով 87, 91  եւ 93 կիլոգրամանոց ծանրաձողերը: Հրում վարժությունում Դալալյանը բարձրացրել է 120 եւ 127 կգ ծանրաձողերը, իսկ երրորդ հնարավորությունը չի օգտագործել, քանի որ բրոնզե մեդալն արդեն նվաճված էր, իսկ երկու առաջատարներից տարբերությունը շատ մեծ էր:

«Կարիք չկար մոտենալու երրորդ մոտեցմանը, այն ոչինչ չէր տա: Կարծում եմ, որ լավ ավարտեցի այս տարին: Երկու ոսկե եւ երկու բրոնզե մեդալ: Սա դեռ իմ լավագույն արդյունքն էր», - նշեց մարզուհին:

Լուսանկարը՝ armnoc.am

Աղբյուր` Փաստինֆո