Փաստ ինֆո

Սիրած աղջկան վարկաբեկելու և սուտ տեղեկություններ հայտնելու հարցերի պարզաբանման ընթացքում տեղի ունեցած սպանության վերաբերյալ գործով այսօրվա դատական նիստում մեղադրող Մարգարյանը պնդեց իր՝ նախկինում հայտնած դիրքորոշումը՝ ապացույցները ներկայացնում է մեղադրողը, հետազոտում՝ դատարանը:

Դատարանը՝ դատավոր Գագիկ Պողոսյանի նախագահությամբ, որոշեց հրապարակել ներկայացված ապացույցները՝ արդար դատաքննության և արդարադատության շահերից ելնելով:

Դատարանը հրապարակեց մեղադրողի ներկայացրած առաջին ապացույցը՝ դիակի դատաբժշկական փորձաքննության եզրակացությունը, հրապարակումն ավարտելուց հետո դատարանն արձագանքեց՝ շատ թերի է այս ապացույցը, ապա նորից ընդգծեց, որ ապացույցը պետք է ներկայացնի համապատասխան կողմը և ոչ թե դատարանը:

Եվ մինչ դատարանը կանցներ հաջորդ ապացույցի հրապարակմանը մեղադրողը նրան կանխեց և հայտարարեց, որ ինքը ինքնաբացարկի միջնորդություն է ներկայացնում դատարանին:

Մեղադրողը միջնորդության մեջ նորից պնդեց իր հիշյալ դիրքորոշումը՝ դատարանի գործողությունները որակելով որպես ապօրինի: Միջնորդության մեջ մեղադրողն անդրադարձավ նաև անցյալ դատական նիստում իր նկատմամբ սանկցիա՝ նախազգուշացում, կիրառելու հարցին և դատարանի արտահայտությանը՝ «Ձեր ղեկավարության հետ այդ հարցը կքննարկեք», ինչը դիտեց որպես էթիկայի խախտում:

Մեղադրողը կասկած հայտնեց դատավորի անաչառության վերաբերյալ՝ հայտարարելով, որ դատարանը չի կարող կայացնել որևէ որոշում, բացի ինքնաբացարկ հայտարարելու որոշումից:

Մեղադրանքի կողմի մաս կազմող տուժող կողմը հայտարարեց, որ դատավորի անաչառությանը կասկածելու իրավական հիմքեր չունի, պաշտպանական կողմը նույնպես չմիացավ միջնորդությանը՝ հավելելով, որ այն անհիմն է:

Դատարանը հեռացավ խորհրդակցական սենյակ որոշում կայացնելու, ապա վերադառնալով հրապարակեց միջնորդությունը մերժելու իր որոշումը:

Մեղադրողը ներկա չէր որոշման հրապարակմանը՝ դատարանին հայտնվեց, որ մեղադրողն իր մեքենայով հեռացել է դատարանի տարածքից:

Աղբյուր` Փաստինֆո