Փաստ ինֆո

Նախադեպ է, որ բյուջետային ավիաընկերությունը մուտք է գործում հայկական շուկա այն ֆորմատով, որով պետք է լինի։ Այսօր նման հայտարարությամբ է հանդես եկել Քաղաքացիական ավիացիայի գլխավոր վարչության պետ Սերգեյ Ավետիսյանը՝ կառավարության նիստից հետո պատասխանելով լրագրողների հարցերին։

Նշենք, որ ավելի վաղ հայտարարվել է Շիրակ-Մոսկվա ուղիղ չվերթների իրականացման մասին, որոնց գները լինելու են բավական մատչելի։

Ս.Ավետիսյանի ներկայացմամբ՝ նախկինում բազմիցս խոսվել է, որ նախատեսվել է զարգացնել Գյումրիի «Շիրակ» օդանավակայանը որպես բյուջետային ավիաընկերությունների համար աշխատող օդանավակայան։ «Սա հենց այդ դասական օրինակն է, որ տեղի է ունենում այս պահին»,- ՀՀ կառավարության նիստի ավարտից հետո լրագրողների հետ զրույցում ասաց Քաղաքացիական ավիացիայի գլխավոր վարչության պետ Սերգեյ Ավետիսյանը։

Ինչ վերաբերում է Գյումրու «Շիրակ» օդանավակայանից դեպի Մոսկվայի «Վնուկովո» օդանավակայան ավիատոմսերի սակագներին, որոնց գները լինելու են սկսած 10 հազար դրամից՝ Ս.Ավետիսյանը նշել է, որ ինքնաթիռները սեգմենտավորված տեղեր են վաճառում՝ X քանակի տեղերը X գնով՝։ Ըստ նրա՝ «Պոբեդա» ավիաընկերության կայքում կարելի է տեղեկություն գտնել այն մասին, որ ավիաընկերության կողմից սպասարկվող ուղղությունների ավիատոմսերի գները սկսվում են 999 ռուբլուց, որը կազմում է մոտավորապես 7500 դրամ։ Նրա համոզմամբ՝ Գյումրու «Շիրակ» օդանավակայանից դեպի Մոսկվայի «Վնուկովո» օդանավակայան ավիատոմսերը կլինեն նաև սկսած 10 հազար դրամից։

Ըստ բանախոսի՝ օգտագործվելու է Boing 737 800 տիպի ինքնաթիռ, որը նախատեսում է շուրջ 180 տեղ։ «Չեմ կարող ասել՝ քանի՞ տեղ կլինի և ինչպե՞ս, քանի որ տվյալ ավիաընկերության կոմերցիոն տնօրենը կամ ֆինանսական բաժնի աշխատողը չեմ, ասում եմ, թե առհասարակ ինչպես է աշխատում բյուջետային ավիաընկերությունների տրամաբանությունը։ Նրանք վաճառում են տոմսեր: Պարզ է՝ վերևի շեմը չի լինելու բարձր, որովհետև Գյումրու «Շիրակ» օդանավակայանի մրցակցային առավելությունը պետք է լինի նրանում, որ այն պետք է լինի ավելի մատչելի, ինչ-որ այլ տրամաբանության մեջ տոմսեր առաջարկի»,- ասաց Սերգեյ Ավետիսյանը՝ արձանագրելով, որ «Զվարթնոց» օդանավակայանի համեմատությամբ` Շիրակում սպասարկման գներն ավելի էժան են, քանի որ նաև իր որակական հատկանիշներով տարբերվում է այդ օդանավակայանից։

Առաջին թռիչքը նախատեսվում է նոյեմբերի վերջերին։

Աղբյուր` Փաստինֆո