Փաստ ինֆո

Արարատ Խանդոյանի պաշտպան, «Ընդդեմ իրավական կամայականության» ՀԿ փաստաբան Արա Ղարագյոզյանը բողոք է ներկայացրել ՀՀ դատավորների ընդհանուր ժողովի էթիկայի և կարգապահական հարցերի հանձնաժողովին՝ խնդրելով կարգապահական վարույթ հարուցել ՀՀ վերաքննիչ քրեական դատարանի դատավոր Ս.Չիչոյանի նկատմամբ ու նրան պատասխանատվության ենթարկել:

Ինչպես «Փաստինֆո»-ին հայտնեց Արա Ղարագյոզյանը, ինքը բողոքում նշել է, որ Վերաքննիչ քրեական դատարանը զանգվածային անկարգություններին մասնակցելու մեջ մեղադրվող Ա.Խանդոյանի կալանքի ժամկետը երկարացնելու և գրավ չկիրառելու դեմ պաշտպանական կողմի բողոքի գործով նիստ է անցկացրել առանց մեղադրյալի և պաշտպանական կողմի ներկայության: Ընդ որում, ըստ պաշտպանի, կողմերը դատարանի կողմից պատշաճ չեն ծանուցվել դատական նիստի, օրվա և ժամի մասին: Մասնավորապես, դատարանը դատական նիստն անցկացրել է հոկտեմբերի 12-ին ժամը 14.00-ին, իսկ պաշտպան Արա Ղարագյոզյանը դատական նիստի, օրվա և ժամի մասին դատական ծանուցագիրը ստացել է հոկտեմբերի 13-ին ժամը 17.00-ին:

Այսինքն, ըստ պաշտպանի, մեղադրյալը և պաշտպանները փաստացի զրկվել են դատական պաշտպանության իրավունքից, պատշաճ չեն ծանուցվել դատական նիստի օրվա մասին և հնարավորություն չեն ունեցել ներկայացնելու իրենց վերաքննիչ բողոքը, առարկությունն և այլ փաստաթղթեր, որոնք պետք է ներկայացվեին Վերաքննիչ դատարանին:

«Դատարանը կոպտորեն խախտել է ՀՀ քրեական դատավարության օրենսգրքի 17-րդ /գործի արդարացի քննությունը/, 23-րդ /մրցակցությունը քրեական դատավարության ընթացքում/, 390-րդ 2-րդ մասի պահանջը/վերաքննիչ դատարանում գործի քննության կարգը/, ՄԻԵԿ-ի 6-րդ հոդվածը/Արդար դատաքննության իրավունքը/, ՄԻԵկ-ի 13.1-րդ հոդվածը /Իրավական պաշտպանության արդյունավետ միջոցի իրավունքը/»,- նշեց Արա Ղարագյոզյանը:

Ըստ պաշտպանի, դատարանն առանց պաշտպանական կողմի քննելով վերաքննիչ բողոքը, պաշտպանական կողմին հնարավորություն չի ընձեռել պաշտպանելու իր դիրքորոշումը՝ հավասար հնարավորությունների սահմաններում, այն պայմաններում, ինչ պայմաններում գտնվել է դատախազը, ով ի դեպ, ներկա է եղել նիստին:

Ուստի, ըստ Արա Ղարագյոզյանի, պաշտպանական կողմի բողոքը մերժելու Վերաքննիչ դատարանի որոշումն ապօրինի է և չհիմնավորված նպատակ է հետապնդում պաշտպանական կողմին զրկել դատական պաշտպանության արդյունավետ միջոցների իրավունքից:

Ավելին, ըստ Ա.Ղարագյոզյանի, ՀՀ վերաքննիչ քրեական դատարանի կողմից թույլ են տրվել ՀՀ քրեական դատավարության սկզբունքների և այլ ընդհանուր դրույթների խախտումներ (ՀՀ քրեական դատավարության օրենսգրքի 7-րդ և 23-րդ հոդվածներ), որոնք գործին մասնակցող անձանց` տվյալ պարագայում պաշտպաններին, օրենքով երաշխավորված իրավունքներից զրկելու ճանապարհով խոչընդոտել են գործի հանգամանքների բազմակողմանի, լրիվ և օբյեկտիվ հետազոտմանը: Այդ խախտումները քրեադատավարական օրենքի էական խախտումներ են, որոնք ազդել են գործով ճիշտ որոշում կայացնելու վրա:
Պաշտպանական կողմը զրկվել է արդար դատաքննության իրավունքից, որի հետևանքով դատարանը կայացրել է ապօրինի որոշում, որը ազդել է գործի ելքի վրա, անձը այդ թերի քննության հետևանքով մնացել է կալանքի տակ:

Աղբյուր` Փաստինֆո