Փաստ ինֆո

Վերլուծաբան, հասարակական գործիչ Արգիշտի Կիվիրյանը հայցադիմում է ներկացրել Երևանի Կենտրոն և Նորք-Մարաշ վարչական շրջանների դատարան՝ իրեն ազատությունից ապօրինի զրկելու հետևանքով պատճառված ոչ նյութական վնասի հատուցման պահանջով: Գործն արդեն իսկ ընդունվել է դատավոր Գայանե Մազմանյանի վարույթ: Այս մասին «Փաստինֆո»-ի լրագրողին հայտնեց Արգիշտի Կիվիրյանի ներկայացուցիչ, փաստաբան Արամազդ Կիվիրյանը՝ հավելելով, որ հայցադիմումով իրենք պահանջում են ոչ նյութական վնասի հատուցում՝ 200 հազար ՀՀ դրամի չափով, որն ըստ հայցվորի ներկայացուցչի, «ավելի քան ողջամիտ է»:

Փաստաբանը հայտնեց, որ իրենք ընդդեմ Հայաստանի Հանրապետության հայց են ներկայացրել Երևանի Կենտրոն և Նորք-Մարաշ վարչական շրջանների դատարան՝ հիմնվելով Վերաքննիչ վարչական դատարանի որոշման վրա:

Վերաքննիչ վարչական դատարանը 30-03-2016թ. որոշմամբ մասնակի բավարարել էր Արգիշտի Կիվիրյանի վերաքննիչ բողոքը, բեկանել Հայաստանի Հանրապետության վարչական դատարանի 2015 թվականի ապրիլի 30-ի վճիռը: Մասնավորապես, Վերաքննիչ վարչական դատարանը ոչ իրավաչափ էր ճանաչել 2013 թվականի օգոստոսի 1-ին Հայաստանի Հանրապետության ոստիկանության Երևան քաղաքի վարչության Կենտրոնական բաժին բերման ենթարկված Արգիշտի Կիվիրյանին ժամը 13.55-ից մինչև ժամը 15.45-ն այդ բաժնում պահելը, ինչի արդյունքում խախտվել են Արգիշտի Կիվիրյանի ազատության և անձնական անձեռնմխելիության իրավունքները:

2013թ. օգոստոսի 1-ին, Երևանի Արգիշտի 1 hասցեում գտնվող Երևանի քաղաքապետարանի դիմաց հավաք էր տեղի ունեցել, որի ընթացքում Արգիշտի Կիվիրյանի կողմից փորձ էր արվել վրան տեղադրել, նրան բերման էին ենթարկել ոստիկանություն՝ բռնություն կիրառելով:

Արամազդ Կիվիրյանը նշեց, որ ոստիկանությունը Արգիշտի Կիվիրյանին բերման ենթարկելու ժամանակահատվածը շատ հետաքրքիր է հաշվարկել՝ ոչ թե փաստացի քաղաքացուն ազատությունից զրկելու պահից սկսած, այլ ոստիկանության բաժնի մատյանում տվյալները լրացնելու ու այդ ժամանակ այնտեղ ժամ ֆիքսելու պահից սկսած:

Այնինչ, նշեց Արամազդ Կիվիրյանը, կա Սահմանադրական դատարանի որոշում, ըստ որի անձի ազատությունը սահմանափակելու պահից սկսած պետք է սկսվի այդ ժամկետի հաշվարկը:

Վերաքննիչ վարչական դատարանն իր հիշյալ որոշման հիմքում դրել է նաև Արգիշտի Կիվիրյանի ու նրա ներկայացուցչի փաստարկները և այդ մասով բավարարել հակընդդեմ հայցը:

Արամազդ Կիվիրյանը, սակայն, գտնում է, որ ոստիկանության գործողությունները ոչ միայն այդ մասով, այլև ամբողջությամբ ոչ իրավաչափ են եղել՝ ոստիկանությունն ընդհանրապես իրավունք չուներ անձին բերման ենթարկել: «Սակայն մեր դատական ատյանները այդ մասով չեն ցանկանում ինչ-որ քննություն իրականացնել և մեկնաբանել այդ հոդվածը՝ փաստարկելով, որ տվյալ դեպքում ոստիկանությունն այդ իրավունքն ունի, չնայած մեր խորին համոզմամբ, այդ իրավունքը ոստիկանությունը չունի, չկա դրա իրավական հիմքը, ուղղակի ինչ-որ ձևով փորձ է արվում ոստիկանության անօրինական գործողությունները տեղավորել իրավական դաշտում, ես մենակ դա եմ տեսնում և վերջ»,- ասաց Արամազդ Կիվիրյանը:

Փաստաբանը հայտնեց նաև, որ այս գործով Մարդու իրավունքների եվրոպական դատարան կուղարկվի իրենց գանգատը, որի վրա ներկայումս իրենք աշխատում են: Մինչ այդ արդեն իսկ ուղարկվել են Արգիշտի Կիվիրյանին առնչվող այլ գործերով գանգատներ ևս:

Ներկայումս Վարչական դատարանում՝ դատավոր Ալեքսանդրա Հարությունյանի նախագահությամբ, քննվում է ոստիկանության հայցն ընդդեմ Արգիշտի Կիվիրյանի ու Արգիշտի Կիվիրյանի՝ ոստիկանության դեմ հակընդդեմ հայցը: Հակընդդեմ հայցով Արգիշտի Կիվիրյանը պահանջում է ոչ իրավաչափ ճանաչել ոստիկանության գործողությունները՝ կապված Գյումրիում Ավետիսյանների ընտանիքի սպանության մեջ մեղադրվող Վալերի Պերմյակովին Հայաստանի իրավազորությանը փոխանցելու պահանջի վերաբերյալ 15.01.2015թ. կազմակերպված հավաքի հետ:

Քննության ավարտից հետո այս գործի հետ կապված նույնպես գանգատ կներկայացվի ՄԻԵԴ:

Աղբյուր` Փաստինֆո