Փաստ ինֆո

Տաքսի մեքենայի մեջ՝ վարորդի ներկայությամբ, Լևոն Բունիաթյանի սպանության գործով երկրորդ դատաքննության շրջանակում հոկտեմբերի 26-ին հարցաքննվեց հիշյալ մեքենայի տերը: Վկան հայտնեց, որ մեքենան վարձակալությամբ տվել էր Արթուր Եղիազարյանին, վերջինս էլ իրեն պատմել է դեպքի մասին:

Վկան հայտնեց, որ Ա.Եղիազարյանը պատմել է իրեն, որ հետևի նստատեղին նստած ուղևորը կրակել է առջևում, վարորդի կողքի նստատեղին նստածի վրա, մեքենայի սրահն արյունոտվել է: Ինչո՞ւ է վարորդը լվացել մեքենան հարցին ի պատասխան վկան հայտնեց, որ Ա.Եղիազարյանն իրեն ասել է, որ վախեցել է, չի իմացել ինչ անի:

Արթուր Եղիազարյանը, ով գործով առանցքային վկա է, առաջին դատաքննության ընթացքում այդպես էլ չի ներկայացել դատարան: Երկրորդ դատաքննության շրջանակում այսօրվա դատական նիստին էլ, ըստ ոստիկանության գրության, հնարավոր չի եղել ապահովել վկայի ներկայությունը՝ վերջինս ուայբերի միջոցով հայտնել է, որ ինքը ՌԴ Մոսկվա քաղաքում է, մոտ ժամանակներս չի վերադառնալու, սակայն բացատրական աշխատանքներից հետո խոստացել է, որ որոշ ժամանակ աշխատելուց և որոշակի գումար վաստակելուց հետո կներկայանա դատարան:

Իսկ ՍԵԿՏ համակարգի տվյալների համաձայն, վկա Եղիազարյանը 10.03.2016թ. մուտք է գործել Հայաստանի Հանրապետություն, դրանից հետո տեղեկություններ չկան:

Մեղադրողը նշեց, որ չեն սպառվել վկայի ներկայությունն ապահովելու բոլոր հնարավորությունները, իսկ պաշտպանական կողմը հայտարարեց, որ վկայի ներկայությունը դատարանում պարտադիր է, քանի որ Մարդու իրավունքների եվրոպական կոնվենցիայի 6-րդ հոդվածի՝ արդար դատաքննության իրավունք, 3-րդ մասի «Դ» կետի համաձայն, քրեական հանցագործություն կատարելու մեջ մեղադրվող յուրաքանչյուր ոք իրավունք ունի հարցաքննել իր դեմ ցուցմունքներ տված վկաներին:

Դատարանը որոշեց հիշեցում ուղարկել ոստիկանությանը վկայի ներկայությունն ապահովելու մասին:

Դատարանը՝ լսելով կողմերի կարծիքը, ապացույցների հետազոտման կարգի մեջ փոփոխություն կատարեց, հետազոտվեցին 4 հատոր կազմող քրեական գործի գրավոր ապացույցները:

Մասնավորապես, հրապարակվեց լուսանկարով Տարոն Գալուստովի ճանաչման արձանագրությունը: Ամբաստանյալի պաշտպանը հայտարարեց, որ արձանագրությունը որևէ ապացուցողական նշանակություն չունի, քանի որ Տ.Գալուստովն ինքնակամ է ներկայացել իրավապահ մարմիններին:

Հրապարակված փաստաթղթերի թվում էր նաև Տ.Գալուստովի նկատմամբ ստացիոնար դատահոգեբուժական փորձաքննության եզրակացությունը, ըստ որի ամբաստանյալը հոգեկան հիվանդությամբ չի տառապել ու չի տառապում, կարող է գիտակցել ու ղեկավարել իր գործողությունները, այսինքն՝ մեղսունակ է:

Հաջորդ դատական նիստում կշարունակվի վկաների հարցաքննությունը:

Հիշեցնենք, որ ըստ մեղադրական եզրակացության, Տարոն Գալուստովը 2014թ. հոկտեմբերի 11-ին, 01.00-ի սահմաններում տաքսի ավտոմեքենայի մեջ ատրճանակով պարտքուպահանջային խնդիր ունենալու պատճառով սպանել է Լևոն Բունիաթյանին՝ կրակելով վերջինիս գլխի հատվածի ձախ քունքային շրջանին: Ապա դիակը նույն ավտոմեքենայով տեղափոխվել է գնացքի գծերի մոտ, որտեղ ամբաստանյալը մեկ ստուգողական կրակոց է արձակել սպանվածի ծոծրակին, և այնտեղ թողնելով դիակը՝ հեռացել:

Գործով սա երկրորդ դատաքննությունն է. առաջին դատաքննությունն անց է կացվել դատավոր Լևոն Ավետիսյանի նախագահությամբ, սակայն դատավորի լիազորությունները դադարեցնելու հետ կապված տեղի է ունեցել դատարանի կազմի փոփոխություն, գործը մակագրվել է դատավոր Արթուր Մկրտչյանին, ում նախագահությամբ էլ ընթանում է գործով երկրորդ դատաքննությունը:

Աղբյուր` Փաստինֆո