Փաստ ինֆո

Մալաթիայի նախկին թաղապետ Վահան Զատիկյանի որդու՝ Սեդրակ Զատիկյանի սպանության պատվերի վերաբերյալ գործով այսօր ևս դատարան չներկայացվեց նույն սպանության պատվերի մեկ այլ գործով դատապարտյալ Ստեփան Հակոբյանը:

Ըստ ուղեկցող դասակի ոստիկանի, «Դատապարտյալների հիվանդանոց» քրեակատարողական հիմնարկում իրենց ասել են, որ դատապարտյալը «շատ ծանր վիճակում է», դրա համար հնարավոր չի եղել Ստեփան Հակոբյանին ներկայացնել դատարան: Ընդ որում, քրեակատորաղական հիմնարկից որևէ բժշկական փաստաթուղթ դատարանին չի հղվել դատապարտյալի առողջական վիճակի մասին:

Նշենք, որ դատաքննությունը լրացնելու փուլում Ստեփան Հակոբյանին հարցաքննելու միջնորդությամբ հանդես էր եկել պաշտպանական կողմը, դատարանը բավարարել էր այդ միջնորդությունը: Նարեկ Խաչատրյանի պաշտպան Վարդուհի Էլբակյանն այսօր  միջնորդեց հետաձգել դատական նիստը  և հաջորդ դատական նիստին ապահովել դատապարտյալի ներկայությունը:

Դատավարության մասնակիցները նշեցին, որ դատարանի պահանջը պարտադիր է բոլոր մարմինների համար, ուստի քրեակատարողական հիմնարկը պետք է  համապատասխան փաստաթուղթ ներկայացնի, թե ինչու հնարավոր չի եղել դատարան ներկայացնել դատապարտյալին` նա դժվարանում է տեղաշարժվել, թե ի վիճակի չէ ցուցմունք տալ: Ըստ մեղադրողի, եթե տեղաշարժվելու դժվարություն կա. ուրեմն կարելի է քննարկել արտագնա դատական նիստ անցկացնելու հարցը:

Սկզբնապես Ստեփան Հակոբյանը գտնվում էր «Էրեբունի» բժշկական կենտրոնում, ավելի ուշ դատարանին տեղեկացրել էին, որ բժշկական կենտրոնից նա տեղափոխվել է «Դատապարտյալների հիվանդանոց» քրեակատարողական հիմնարկ:

Ի դեպ, դատապարտյալի պաշտպան Երեմ Սարգսյանը դիմել էր դատարանին` խնդրելով, որ Ստեփան Հակոբյանը հարցաքննվի իր ներկայությամբ, պաշտպանը ծանուցվել էր այսօրվա նիստի մասին, նա կծանուցվի նաև հաջորդ դատական նիստի մասին:

Աղբյուր` Փաստինֆո