Փաստ ինֆո

Ոստիկանի նկատմամբ կյանքի կամ առողջության համար ոչ վտանգավոր բռնություն գործադրելու մեջ մեղադրվող Հիմնադիր խորհրդարանի անդամ Գևորգ Սաֆարյանի գործով այսօրվա դատական նիստում ևս ոստիկաններին չհաջողվեց դատարան ներկայացնել դատակոչի վերջին վկային՝ նրա տան դուռը նորից փակ է եղել:

Ամբաստանյալի պաշտպան Տիգրան Հայրապետյանը նշեց, որ դժվար չէ վկային բերման ենթարկել աշխատանքի վայրից, ուստի դատարանը դեռևս չքննարկեց նրա նախաքննական ցուցմունքները հրապարակելու հարցը, առաջիկայում էլ միջոցներ կձեռնարկվեն՝ նրան դատարան բերման ենթարկելու ուղղությամբ:

Ի պատասխան դատարանի հարցի՝ Գևորգ Սաֆարյանը նշեց, որ ցուցմունքներ կտա հետագայում՝ պաշտպանական կողմի միջնորդած վկաների հարցաքննությունից հետո:

Հաջորդ դատական նիստում ըստ ամենայնի կսկսվի պաշտպանական կողմի միջնորդությամբ դատարան հրավիրվելիք կամ ներկայացվելիք վկաների հարցաքննությունը:

Պաշտպան Տիգրան Հայրապետյանը հայտնեց, որ իրենց միջնորդած 13 վկաներից վեցը կալանավորված են «Սասնա Ծռեր»-ի ու «Սարի թաղ»-ի գործերով, կա ազատության մեջ գտնվող մեղադրյալ, ևս չորս հոգի ազատության մեջ են, մեկի մասին էլ տեղեկություններ չկան: Պաշտպանական կողմի միջնորդած վկաների թվում են, մասնավորապես, Գարեգին Չուքասզյանը, Վարուժան Ավետիսյանը, Հովհաննես Ղազարյանը, Սերգել Կյուրեղյանը, Կարո Եղնուկյանը և այլոք:

Դատական նիստի ավարտին Գևորգ Սաֆարյանը հանդես եկավ հայտարարությամբ՝ խնդրելով այն ընդունել որպես հանցագործության մասին հաղորդում: Հիմնվելով որոշ վկաների ցուցմունքների վրա, ամբաստանյալը բարձրաձայնեց քննիչի կողմից թույլ տրված կոպիտ խախտումների, Քրեական օրենսգրքով արգելված մեթոդների մասին՝ մասնավորապես, ըստ նրա, քննի՛չն է մատնացույց արել, թե ովքեր են եղել հարված ստացած ոստիկանն ու հարված հասցրած քաղաքացին, իսկ վկաներից մեկն էլ գնացել-եկել է, ցուցմունք տվել:

Գևորգ Սաֆարյանը կոչ արեց մեղադրանքը պաշտպանող դատախազին միջոցներ ձեռնարկել և ընթացք տալ հանցագործության մասին իր հաղորդմանը: Ամբաստանյալը հավելեց՝ «այս քրեական գործը որևէ կապ չունի իրավաբանության հետ, սա քաղաքական հետապնդում է»:

Մեղադրողն իր հերթին պարզաբանեց, որ հայտարարությունը կարող է որպես հանցագործության մասին հաղորդում քննության առնվել միայն սուտ մատնության մասին նախազգուշացվելուց հետո: Ըստ մեղադրողի, ասվածը զուտ գնահատողական բնույթի ամբաստանյալի կարծիքն է:

Մեղադրողն ընդգծեց, որ վկան հարվածողի ու հարված ստացողի անուններ չի տվել, ընդամենը ասել է, թե հարված հասցնողն ինչ հագուստով է եղել, իսկ մյուս վկան էլ ասել է, որ հարցաքննվել է, վատ զգալու պատճառով գնացել է, հետո է ստորագրել հարցաքննության արձանագրությունը:

Դատարանն այս կապակցությամբ հայտնեց, որ կողմերը վկաների ցուցմունքների վերաբերյալ իրենց գնահատականները կարող են տալ դատական վիճաբանությունների փուլում՝ ճառերում ու ռեպլիկներում:

Աղբյուր` Փաստինֆո