Փաստ ինֆո

«Պատանի լրագրողներ» դպրոցի տնօրեն Վահան Ղազարյանը ուրբաթ-լույս շաբաթ գիշերը ինքնասպանության փորձ է կատարել՝ լսելով 22-ամյա Լևոն Սահակյանի մահվան լուրը:

Այդ մասին «Փաստիֆո»-ի թղթակցի հետ զրույցում ասաց Վահան Ղազարյանի պաշտպան Մարինե Ֆարմանյանը: Պաշտպանը նշեց, որ իրենք մասնակցել են քննչական գործողության, և երբ Վահանը տեղեկացել է 22-ամյա Լևոնի մահվան մասին, հոգեբանական ծանր վիճակում է հայտնվել և քննչական փորձարարությունից հետո ինքնասպանության փորձ է կատարել՝ կուլ տալով ամրակներ:

Մարինե Ֆարմանյանի խոսքով՝ իր պաշտպանյալին մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով, սակայն նա առաջադրված մեղադրանքում իրեն մեղավոր չի ճանաչում:

«Փաստինֆո»-ի տեղեկություններով՝ Վահան Ղազարյանը, երբ մասնակցել է քննչական գործողությունների նկարագրել է, թե ինչպես է դեպքը տեղի ունեցել, ընդունել է դանակահարելու փաստը, սակայն չի ընդունում Լևոնին սպանելու դիտավորությունը, ըստ նրա՝ կրծքավանդակին հարվածը պատահմամբ է եղել:

Ավելի վաղ «Փաստինֆո»-ն գրել էր, որ «Պատանի լրագրողներ» դպրոցի տնօրենի աշխատասենյակում հոկտեմբերի 19-ին դանակահարվել է 22-ամյա երիտասարդ, ապագա բժիշկ Լեւոն Սահակյանը:

«Փաստինֆո»-ի տեղեկություններով` երիտասարդը դպրոցի տնօրեն Վահան Ղազարյանի հետ հանդիպման էր գնացել վերջինիս առաջարկով, իսկ զրույցին ներկա է եղել նաև Լևոնի ընկերը: Զրույցի առարկան, ինչպես արդեն տեղեկացրել ենք, եղել է գործատուի կողմից իր պարտավորությունները չկատարելը:

Երիտասարդի նշանածը ամռան ամիսներին սկսել է աշխատել Վ.Ղազարյանի մոտ, սակայն վերջինս խոստացված աշխատավարձը լիարժեք չի վճարել և աղջիկը դադարեցրել է համագործակցությունը:

Հարցին միջամտել է տղան եւ գնացել-խոսել է տնօրենի հետ, ով պարտավորվել է վճարել աշխատավարձն ամբողջությամբ` նշելով անգամ հստակ ժամկետ:

Հոկտեմբերի 19-ին հենց նա է դպրոց հրավիրել 22-ամյա Լեւոնին, ով հանդիպման է գնացել ընկերոջ հետ: Սակայն գումար վճարելու փոխարեն` դպրոցի տնօրենը հրահրել է վիճաբանություն, որի ժամանակ էլ 39 տարեկան հասուն տղամարդը 22-ամյա երիտասարդին դանակի երկու հարված է Լևոնին ՝ հարվածելով մեկը` ազդրին, մյուսը` կրծքավանդակին:

Հարվածի հետևանքով վնասվել է տղայի սիրտն ու թոքը: Նրա կյանքը փրկել չհաջողվեց. տղան առանց գիտակցության գալու հոկտեմբերի 21-ի երեկոյան մահացավ:

Վահան Ղազարյանը կալանավորված է:

Լուսանկարը՝ Shamshyan.com-ի

Աղբյուր` Փաստինֆո