Փաստ ինֆո

Հայաստանի հավաքականի հարձակվող Էդգար Մանուչարյանն armsport.am-ի թղթակցի հետ զրույցում պատմել է վերջին ամիսներին ունեցած բարդությունների, իր մարզավիճակի, ինչպես նաեւ Հայաստանի հավաքականի վերջին խաղերի ու նորանշանակ գլխավոր մարզիչ Արթուր Պետրոսյանի մասին:

Խոսելով վերջին ամիսներին իր բարդությունների մասին Էդգարն ասաց.

«Վերջին ամիսներն ամենածանրն էին ինձ համար հոգեբանական ու ֆուտբոլային առումով: Շատ բան սովորեցի այս ընթացքում. հասկացա, որ պետք չէ այդքան ապահով զգալ քեզ: Սակայն շնորհակալ եմ, որ անցան այս 4 ամիսները: Կարիերայիս համար իհարկե շատ վատ էր այս դադարը, սակայն մյուս կողմից դասեր քաղեցի: Այս ընթացքում մարզվել եմ միայնակ, փորձել եմ պահպանել մարզավիճակս: Այժմ մարզվում եմ «Փյունիկի» հետ: Շնորհակալ եմ հարազատ ակումբիս նման հնարավորություն տալու համար: Հասկանալի է, որ միայնակ մարզվելիս հնարավոր չէ լավ մարազավիճակում լինել: Շատ ուրախ եմ, որովհետեւ միայնակ մարզվելուց վատ բան չկա»:

Ճիշտ է նա չմասնակցեց Հայաստանի հավաքականի վերջին խաղերին, ամեն դեպքում նրանից հարցրինք ազգային ընտրանու հանդիպումների վերաբերյալ: Մանուչարյանի կարծիքը հետեւյալն էր.

«Լեհաստանի հետ հանդիպումն այն խաղերից չէր, որում պետք է պարտվեինք: Մարդիկ ասում են, որ պարտություններից ավելի շատ դասեր ենք քաղում, քան հաղթանակներից: Կարող եմ ասել, որ երկրորդ կեսում կարող էինք 3-4 անգամ գրավել մրցակցի դարպասը եւ խուսափել լարվածությունից: Լեհաստանն այնպես չխաղաց, ինչպես բոլորն էին սպասում: Ինձ թվում է, որ դրա գլխավոր պատճառն այն է՝ մենք չթողեցինք:

Չեմ կարծում, որ Ռումինիայի հետ վատ խաղացինք, պարզապես հանդիպման սկզբում կարմիր քարտը վճռեց ամեն ինչ: 10 ֆուտբոլիստներով շատ բարդ է պաշտպանվել նույնիսկ մեկ խաղակես: Հազվադեպ է լինում, որ հաջողվում է դիմանալ»:

Խոսելով հավաքականի նորանշանակ գլխավոր մարզչի մասին` Մանուչարյանի տրամադրությունը լավատեսական էր.

«Արթուր Պետրոսյանին իմանալով թե՛ որպես ֆուտբոլիստ, թե՛ որպես մարզիչ լավատեսորեն եմ տրամադրված: Չնայած երիտասարդ տարիքին՝ նա մեծ փորձ ունի, եւ վստահ եմ, որ իր հետ մեծ հաջողությունների կհասնենք: Վարուժան Սուքիասյանի հետ մեզ մոտ չստացվեց, ոչ թե նրա համար, որ նա վատն է: Բոլորը գիտեն, որ նա փորձառու, լավ մնասնագետ է: Պարզապես միշտ չէ, որ մարզիչի մոտ ստացվում է, ինչին կան բազմաթիվ օրինակներ: Արթուր Պետրոսյանն այլ կերպ կաշխատի, կշտկի բացթողնումները: Տեսնենք, թե ինչ կստացվի, ժամանակը ցույց կտա, սակայն եղած թեկնածուների մեջ կարծում եմ՝ շատ ճիշտ ընտրություն է կատարվել»:

Վարուժան Սուքիասյանի ծրագրերից դուրս մնացած ֆուտբոլիստների վերադարձնելու (Արթուր Պետրոսյանի կողմից) հավանականության մասին Մանուչարյանի տեսակետը չեզոք էր.

«Այդ առումով ոչ մի բան չեմ կարող ասել, քանի որ ոչինչ չգիտեմ Արթուր Պետրոսյանի ծրագրերի մասին»:

Գեւորգ Հակոբյան

Աղբյուր` armsport.am