Փաստ ինֆո

Գյումրիում Ավետիսյանների ընտանիքի բոլոր անդամների դաժան սպանության գործով տուժողների իրավահաջորդների ներկայացուցիչ, փաստաբան Արամազդ Կիվիրյանը կարծում է, որ առաջին ատյանի դատարանի կայացրած դատավճռի դեմ բողոքներն ևս Վերաքննիչ դատարանը պետք է քննի ռուսաստանյան ռազմաբազայում տարածքում:

«Փաստինֆո»-ի լրագրողի հետ զրույցում փաստաբանը հիշեցրեց, որ առաջին ատյանի դատարանը գործը քննել է Գյումրիում տեղակայված ռազմաբազայի տարածքում և ոչ թե Շիրակի մարզի դատարանի վարչական շենքում՝ հաշվի առնելով, որ ռազմաբազայի նախկին զինծառայող Վալերի Պերմյակովը հանձնված չէ Հայաստանի Հանրապետության իրավազորությանը: «Այսինքն՝ Վերաքննիչ դատարանի դատավորները պետք է գնան ռազմաբազա և այնտեղ պետք է տեղի ունենա այդ դատական նիստը»,- ասաց Արամազդ Կիվիրյանը՝ հավելելով, որ իր պրակտիկայում ինքը նման նախադեպ չի ունեցել:

Նշենք, որ դատավճռի դեմ երեք բողոք է ներկայացվել Վերաքննիչ քրեական դատարան՝ մեկը պաշտպանական, երկուսը՝ տուժող կողմից:
Վալերի Պերմյակովի պաշտպան Էդուարդ Աղաջանյանը միջնորդում է բեկանել և փոփոխել ՀՀ Շիրակի մարզի ընդհանուր իրավասության դատարանի` Վալերի Պերմյակովի վերաբերյալ 23.08.2016թ. դատավճիռը, որով վերջինս մեղավոր է ճանաչվել մեղադրանքի ողջ ծավալով՝ ՀՀ քրեական օրենսգրքի 104-րդ հոդվածի 2-րդ մասի 1-ին, 5-րդ, 8-րդ կետերով (ավազակությամբ զուգորդված՝ առանձին դաժանությամբ երկու կամ ավելի անձանց սպանություն), 175-րդ հոդվածի 2-րդ մասի 3-րդ, 4-րդ կետերով (զենքի գործադրմամբ, բնակարան ապօրինի մուտք գործելով ավազակություն) և 34-329-րդ հոդվածի 1-ին մասով (պետական սահմանն ապօրինի հատելու փորձ) և դատապարտվել ցմահ ազատազրկման:

Պաշտպանը խնդրում է ՀՀ քրեական օրենսգրքի 34-329-րդ հոդվածի 1-ին մասով ամբաստանյալ Վ.Պերմյակովի նկատմամբ քրեական հետապնդումը դադարեցնել, նրա նկատմամբ նշանակել համաչափ մեղմ պատիժ:

Տուժողների իրավահաջորդների ներկայացուցիչներ Արթուր Սաքունցը և Արայիկ Զալյանը միջնորդում են բեկանել և փոփոխել հիշյալ դատավճիռը և գործն ուղարկել համապատասխան ստորադաս դատարան` նոր քննության:

Իսկ տուժողների իրավահաջորդների ներկայացուցիչ Արամազդ Կիվիրյանը միջնորդում է բեկանել և փոփոխել դատավճիռը և գործն ուղարկել ստորադաս դատարան նոր քննության՝ տուժողների իրավահաջորդների հայցն ընդդեմ Ռուսաստանի Դաշնության` ոչ նյութական վնասի հատուցման պահանջի մասին, քննելու համար:

Արամազդ Կիվիրյանը հայտնեց, որ Վերաքննիչ դատարանը դեռևս որոշում չի կայացրել բողոքները վարույթ ընդունելու վերաբերյալ, սակայն իրենք Շիրակի մարզի ընդհանուր իրավասության դատարանից ստացել են ծանուցում, որ գործն արդեն ուղարկվել է Վերաքննիչ դատարան: Շուտով գործը կմակագրվի դատավորների կազմին և նիստ կնշանակվի:

Արամազդ Կիվիրյանն ավելի վաղ բողոքարկել էր նաև բարոյական վնասի հատուցման պահանջով տուժող կողմի քաղաքացիական հայցն ընդունելուց հրաժարվելու մասին Շիրակի մարզի դատարանի որոշումը: Թեև ավելի վաղ դատարանը կայացրել էր արձանագրային որոշում քաղաքացիական հայցը վարույթ ընդունելու մասին, քաղաքացիական հայցվորներ ճանաչել տուժողների իրավահաջորդներին, իսկ քաղաքացիական պատասխանող՝ ՌԴ-ին, սակայն, ըստ Արամազդ Կիվիրյանի, հետագայում անհիմն, իրավական դաշտում որևէ կերպ չտեղավորվող որոշում էր կայացրել քաղաքացիական հայցն ընդունելուց հրաժարվելու մասին:

Այդ որոշումը տուժողների իրավահաջորդների ներկայացուցիչը բողոքարկել էր Վերաքննիչ քրեական դատարան, որը չէր քննել բողոքը՝ պատճառաբանելով, որ որոշումը ենթակա չէ բողոքարկման: «Չնայած մեր խորին համոզմամբ, այն ըստ էության ենթակա է բողոքարկման: Այդ հիմքով էլ մենք բողոք ենք ներկայացրել նաև Վճռաբեկ դատարան, և բոլոր դատական ատյանները սպառելուց հետո մենք կկարողանանք այդ մասով դիմել նաև Սահմանադրական դատարան՝ անձը պետք է ունենա այս հնարավորությունը այդ որոշումը բողոքարկելու համար»,- ասաց Արամազդ Կիվիրյանը՝ հավելելով, որ արդեն քանի ամիս է, ինչ որևէ տեղեկություն չկա Վճռաբեկ դատարանից:

Աղբյուր` Փաստինֆո