Փաստ ինֆո

«Պատանի լրագրողների» դպրոցում դանակահարված 22-ամյա Լևոն Սահակյանը, ում կյանքը չկարողացան փրկել բժիշկները, հիվանդանոց էր գնացել անձամբ:

«Փաստինֆո»-ի տեղեկություններով` երիտասարդը դպրոցի տնօրեն Վահան Ղազարյանի հետ հանդիպման էր գնացել` վերջինիս առաջարկով, իսկ զրույցին ներկա է եղել նաեւ ընկերը: Զրույցի առարկան, ինչպես արդեն տեղեկացրել ենք, եղել է գործատուի կողմից իր պարտավորությունները չկատարելը:

«Փաստինֆո»-ին հայտնի դարձավ, որ երիտասարդի նշանածը ամռան ամիսներին սկսել է աշխատել Վ.Ղազարյանի մոտ, սակայն վերջինս խոստացված աշխատավարձը լիարժեք չի վճարել եւ աղջիկը դադարեցրել է համագործակցությունը: Հարցին միջամտել է տղան եւ գնացել-խոսել է տնօրենի հետ, ով պարտավորվել է վճարել աշխատավարձն ամբողջությամբ` նշելով անգամ հստակ ժամկետ: Հոկտեմբերի 20-ին հենց նա է դպրոց հրավիրել 22-ամյա Լեւոնին, ով հանդիպման է գնացել ընկերոջ հետ: Սակայն գումար վճարելու փոխարեն` դպրոցի տնօրենը հրահրել է վիճաբանություն: Գուցե մտադրվել էր տղայի աչքը վախեցնելով լուծել գումարային հարցերը, բայց ամեն ինչ շատ ավելի ողբերգական ավարտ ունեցավ` 39 տարեկան հասուն տղամարդը 22-ամյա երիտասարդի հետ վիճաբանության ժամանակ գործի է դրել դանակը. հարվածներից մեկը դիպել է ազդրին, մյուսը` կրծքավանդակին:

«Փաստինֆո»-ի տեղեկություններով` տղայի ընկները նրանց մի կերպ փորձել է բաժանել եւ դուրս են եկել դպրոցից. երիտասարդի գիտակցությունն այդ պահին դեռ տեղին է եղել եւ նա անձամբ է զանգել հոր հետ խոսել, ասել, որ դանակահարվել է եւ նկարագրել վնասվածքների բնույթը, ով խորհուդ է տվել անմիջապես գնալ հիվանդանոց: 22-ամյա Լեւոնն իր ավտոմեքենայով գնացել է բժշկական կենտրոն, որտեղ սակայն պարզվել է, որ վնասվածքն անհամեմատ լուրջ է. վնասվել էր տղայի սիրտն ու թոքը:

Ավելի վաղ տեղեկացրել ենք, որ դեպքի առթիվ Աջափնյակ և Դավթաշեն վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 1-ին մասով։ Վ.Ղազարյանը ձերբակալվել է, հանցագործության գործիք հանդիսացող ծալովի դանակը` հայտնաբերվել:

Աղբյուր` Փաստինֆո