Փաստ ինֆո

Հուլիսյան դեպքերի օրերին Սարի-թաղում ծառայողական պարտականությունները կատարելու ժամանակ ոստիկանի նկատմամբ կյանքի կամ առողջության համար վտանգավոր բռնություն գործադրելու դեպքի առթիվ հարուցված քրեական գործի նախաքննությունն ավարտվել է՝ գործը Էրեբունի և Նուբարաշեն վարչական շրջանների ընդհանուր իրավասության դատարանում է:

Գործի շրջանակներում մեղադրանք է առաջադրվել երկու անձի՝ Կարեն Վանոյանին և Սարգիս Արաբաջյանին:

«Փաստինֆո»-ի թղթակցի հետ զրույցում Կարեն Վանոյանի պաշտպան Անժելա Հոբոսյանը նշեց, որ Վանոյանն իրեն աջադրված մեղադրանքը չի ընդունում, վերջինս չի հերքել, որ դեպքի ժամանակ գտնվել է այդ վայրում, սակայն ոչ մեկի նկատմամբ բռնություն չի գործադրել:

Պաշտպանը հավելեց նաև, որ քննիչի կողմից ներկայացվող տեսանյութում ձեռքեր են երևում, սակայն ինչպես կարող են պնդել, որ դրանք Կարենի ձեռքերն են, եթե Կարենը չի երևում:

Ըստ մեղադրանքի՝ Կարեն Վանոյանը և Սարգիս Արաբաջյանը 2016թ. հուլիսի 19-ին ժամը 20:00-ի սահմաններում, Գլինկա և Որմնադիրներ փողոցների հատման վայրում, մի խումբ անձանց հետ, առողջության համար վտանգավոր բռնություն են գործադրել ՀՀ ոստիկանության ՊՊԾ գնդի տարածքի գրավման կապակցությամբ քաղաքացիների անվտանգությունն ու հասարակական կարգի պահպանությունն ապահովող, իրենց ծառայողական պարտականությունները կատարող, իշխանության ներկայացուցիչ համարվող ՀՀ ոստիկանության մի շարք ծառայողների նկատմամբ:

Կարեն Վանոյանին և Սարգիս Արաբաջյանին մեղադրանք է առաջադրվել ՀՀ քրեական օրենսգրքի 316-րդ հոդվածի 2-րդ մասով, նրանց երկուսի նկատմամբ էլ որպես խափանման միջոց է ընտրվել կալանավորումը:

Լուսանկարը՝ Ֆոտոլուրի

Աղբյուր` Փաստինֆո