Փաստ ինֆո

85 կողմ, 7 դեմ, 6 ձեռնպահ ձայներով այսօր ԱԺ-ն հաստատեց Կառավարության ծրագիրը: 

Եզրափակիչ ելույթում ՀՀ վարչապետ Կարեն Կարապետյանը շնորհակալություն է հայտնել պատգամավորներին՝ շահագրգիռ քննարկման համար եւ նշել, որ անկախ քվեարկությունից՝ կառավարությունը բաց է առարկայական եւ գործնական առաջարկների ու քննադատությունների հարցում:

ԲՀԿ-ն հայտարարեց, որ չի մասնակցելու քվեարկությանը, իսկ ՕԵԿ-ը ձեռնպահ էր:

ԱԺ «Օրինաց երկիր» խմբակցության ղեկավար Հեղինե Բիշարյանը կարեւորեց մենաշնորհների եւ կոռուպցիայի դեմ իրական պայքարը, սակայն մտահոգություն հայտնեց, որ ծրագրում որեւէ կետ չկա այն մասին, թե ինչպես պետք է ետ բերվեն օֆշորային գոտիներ արտահանված ստվերային գումարները:

ԱԺ ԲՀԿ խմբակցության անդամ Միքայել Մելքումյանն անդրադարձել է բիզնեսի զարգացման խոչընդոտներին եւ կարծիք հայտնել, որ այդ հարցում ոչ թե հատվածական, այլ համալիր լուծումներ են անհրաժեշտ:

Ծրագրի ոչ ստանդարձ քայլերը դրական է գնահատել ՀՅԴ-ն։ Մասնավորապես Աղվան Վարդանյանը կարեւորել է ծրագրի իրագործման համար նախադրյալների ստեղծումը եւ վստահություն հայտնել, որ կառավարության՝ ոչ ստանդարտ եւ համարձակ քայլերով այս ծրագրի իրագործումը երկիրը մոտեցնելու է արժանապատիվ ապրելու նպատակին եւ երկրի երկարաժամկետ զարգացման կայուն հիմքեր է ստեղծելու: Նա նշել է , որ ՀՅԴ կուսակցությունն աջակից է լինելու ծրագրի իրականացմանը:

ԱԺ ՀԱԿ խմբակցության ղեկավար Լեւոն Զուրաբյանի կարծիքով, դեռեւս չկան հիմքեր՝ հավատալու ծրագրում նշված բազմաթիվ դրական դրույթների իրականացմանը, տեսանելի չեն քայլեր, որոնք ուղղված կլինեինկոռումպացված համակարգն արմատախիլ անելուն եւ տնտեսության զարգացմանը: Խմբակցության ղեկավարի կարծիքով, ծրագրում չկան նաեւ դրույթներ, թե ինչ արդյունքներ են ակնկալվում ծրագրի կենսագործումից։

ԱԺ ՀՀԿ խմբակցության ղեկավար Վահրամ Բաղդասարյանի գնահատմամբ՝ կառուցողական ծրագիր է ներկայացված: Նա զուգահեռներ է անցկացրել երկրի տնտեսական զարգացման եւ կրթական համակարգի միջեւ ու կարծիք հայտնել, որ պետք է կրթական համակարգում ուսումնասիրել մասնագիտությունների պահանջարկը եւ տեղայնացնել ըստ մարզերի: Վահրամ Բաղդասարյանն անդրադարձել է պատգամավորների ելույթներին, ծրագրի հանդեպ ժխտողական կեցվածքը համարել ոչ ճիշտ: Նա հորդորել է գործընկերներին կողմ քվեարկել նախագծին՝ համարելով, որ այն մեր երկրի զարգացման ծրագիրն է:

Վարչապետը բոլորին կոչ արեց մաքսիմալ կիրառական-պրագմատիկ խորհուրդներ տալ՝ հասկանալու համար՝ ինչ անել. «Շնորհակալություն ՀՅԴ-ին, ՀՀԿ-ին՝ աջակցության համար, գնահատում ենք այն շտանգան, որ բարձրացնելու ենք: Քաղաքացիական դիրքորոշումը որ ակտիվ պահենք, հաստատ հաջողություն կունենանք»:

Աղբյուր` Փաստինֆո