Փաստ ինֆո

Ռաֆայել Կարագյոզյանի և Արեգ Սադոյանի դեմ զանգվածային անկարգությունների վերաբերյալ գործի այսօրվա դատական նիստը տեղի չունեցավ՝ մեղադրողի բացակայության պատճառով, դատական նիստը հետաձգվեց:

Ըստ մեղադրանքի, Ռաֆայել Կարագոզյանը 2016թ. հուլիսի 20-ին Երևանում տեղի ունեցած հասարակական անվտանգությունը վտանգած բռնությամբ, ջարդելով, գույք ոչնչացնելով և վնասելով արտահայտված զանգվածային անկարգությունների ընթացքում բռնություն է գործադրել ոստիկանության աշխատակիցների նկատմամբ` ոտքով բազմաթիվ հարվածներ է հասցրել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցներին, քաշել և փորձել է խլել մեկ այլ ոստիկանության աշխատակցի վահանը:

Իսկ ըստ Արեգ Սադոյանին առաջադրված մեղադրանքի, 2016թ. հուլիսի 20-ին Երևան քաղաքում տեղի ունեցած հասարակական անվտանգությունը վտանգած բռնությամբ, ջարդելով, գույք ոչնչացնելով և վնասելով արտահայտված զանգվածային անկարգությունների ընթացքում, բռնություն է գործադրել ոստիկանության աշխատակիցների նկատմամբ` քաշել է ոստիկանական պատնեշում կանգնած, իր ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակցի պաշտպանիչ վահանից:
Ամբաստանյալները մեղադրվում են ՀՀ քրեական օրենսգրքի 225-րդ հոդվածի 2-րդ մասով:

«Փաստինֆո»-ի լրագրողի հետ զրույցում ամբաստանյալ Արեգ Սադոյանի պաշտպան, փաստաբան Վարդան Զուռնաչյանը նշեց, որ մեղադրանքը բացարձակապես անհիմն է, չկան հիմնավոր ապացույցներ: Ըստ պաշտպանի, ներկայացված մեղադրանքով ընդամենը ցույց են տալիս մի տեսաժապավեն, որտեղ երևում է ինչ-որ անձի գլխի հետևի մաս ու «ասում են, որ դա Արեգ Սադոյանն է. որն իբր ոստիկանի վահանից է քաշում»: Այս առումով Վ.Զուռնաչյանը գտնում է, որ դա հիմնավոր ապացույց չէ. անձի դեմքը չի երևում, ինչպե՞ս են որոշում, որ դա Արեգ Սադոյանն էր:

Այլ ապացույցներ էլ ձեռք են բերվել օրենքի կոպիտ խախտումներով: «Դրա վերաբերյալ բողոք եմ ներկայացրել դատարան, հիմա բողոքը քննարկվում է առանձին վարույթով, այդ ապացույցները պետք է անթույլատրելի ճանաչեին: Ի վերջո, տեսնենք, հասկանանք այս իրավական պետություն որ ասում եք, այս իրավական պետությունում իրենց ասած պայմանները գործո՞ւմ են, թե՞ չէ»,- ասաց փաստաբանը:

Պաշտպանը նշեց նաև, որ դատարանը թույլատրել էր խուզարկություն կատարել Արշակ Սադոյանի տանը (Արեգ Սադոյանը հայտնի քաղաքական գործիչ Արշակ Սադոյանի որդին է), խուզարկությամբ, ըստ ներկայացված միջնորդության, պետք է հայտնաբերվեր կամ չհայտնաբերվեր գլխարկ ու սպիտակ վերնաշապիկ:

«Գալիս են, խուզարկություն են անում ու հանկարծ որոշում են, որ չէ, համակարգիչը պետք է տանեն: Արշակ Սադոյանին պատկանող համակարգիչը տանում են, այնտեղից ինչ-որ լուսանկար են գտնում, որպես ապացույց դնում գործի մեջ: Սա խայտառակ փաստ է, որովհետև և Վճռաբեկ դատարանի նախադեպային որոշումներ կան, որ կոնկրետ դու՝ քննիչ, պարտավոր ես անել այն, ինչ դատարանը քեզ թույլ է տվել: Տվյալ դեպքում դատարանը քո միջնորդությամբ քեզ թույլ է տվել խուզարկությամբ հայտնաբերել միայն գլխարկ և մայկա, չես հայտնաբերել, բա ինչո՞ւ ես ուրեմն առգրավում համակարգիչը: Սա աբսուրդ է, և սա ապացույց է դարձել, որը, հույս ունեմ, դատարանը հիմք չի ընդունի»:

Ըստ Վարդան Զուռնաչյանի, հակառակ կողմը «աբսուրդի մեջ է» նաև տուժողների հետ կապված: «Այս տուժողներն ընդհանուր քրեական գործով են ճանաչվել այդ օրվա դեպքերից տուժողներ: Եվ այս տուժողներին բերել, Արեգ Սադոյանի գործով տուժող են ճանաչել: Ուրեմն ստացվում է, որ Արեգ Սադոյանի գործողություններից 46 հոգի տուժե՞լ են»,- ասաց պաշտպանը՝ հավելելով, որ նախաքննական մարմնի արածի իմաստն այն է, որ հաստատեն, որ տեղի են ունեցել մասսայական անկարգություններ, և 46 հոգի տուժող եղել են: «Այդ դեպքում մյուս բոլոր գործերով այս բոլոր տուժողներին տանեն, նույն ձևով հարցաքննեն, ու իրենք են ընկնելու աբսուրդի մեջ»,- ասաց Վարդան Զուռնաչյանը:

Լուսանկարը՝ Ֆոտոլուրի

Աղբյուր` Փաստինֆո