Փաստ ինֆո

Կառավարությունը քայլեր է ձեռնարկում՝ ներդրողների համար օրենսդրական վստահության և պաշտպանության դաշտ ապահովելու ուղղությամբ: Ազգային ժողովում լրագրողների հետ զրույցում այս մասին ասաց ՀՀ տնտեսական զարգացման և ներդրումների նախարար Սուրեն Կարայանը:

«Մոտ ժամանակներս արդեն մենք կառավարության քննարկմանը կներկայացնենք ներդրումների մասին նոր օրինագիծ»,-«Արմենպրես»-ի հաղորդմամբ՝ ընդգծեց նախարարը: Սուրեն Կարայանը դժվարացավ պատասխանել Հայաստանում ներդրումների նվազման պատճառների մասին հարցին:

«Դժվարանում եմ պատասխանել, թե ինչու նվազեցին, որովհետև դա կարող է պայմանավորված լինել մի քանի հանգամանքներով: Առաջինը, դա կարող է պայմանավորված լինել այն հանգամանքով, որ մեր հիմնական գործընկեր երկրները տնտեսական աճ չապրեցին, այլ հակառակը, տնտեսական միտումները բացասական էին:

Երկրորդը, ինչպես մենք նշում էինք, պետք է բարելավենք մեր ներդրումային միջավայրը»,- ասաց Կարայանը: Նախարարը նշեց, որ ներդրումների նվազումը ոչ թե ԵԱՏՄ-ին Հայաստանի անդամակցության հետ է կապված, այլ այն բանի հետ, որ Հայաստանի հիմնական գործընկեր երկրներում տնտեսական զարգացումներն այդքան բարենապաստ չէին:

«Որպեսզի մեր հիմնական գործընկեր երկրներից ներդրումների ներհոսք լինի Հայաստան, առաջինը պետք է և մնր ներդրումային միջավայրը լինի լավ ու պաշտպանված, երկրորդը, մեր գործընկեր երկրներում պետք է տնտեսական զարգացումները լինեն բարենպաստ»,- նշեց նա:

Կարայանը նաև ասաց, որ նոր կառավարությունը վեր է հանելու բոլոր այն խոչընդոտները, որոնք այսօր խանգարում են գործարարության զարգացմանն ու ներդրումների ներգրավմանը: Հարցին, թե կոնկերտ ի՞նչ քայլեր են անելու, նախարարը պատասխանեց, որ այդ կոնկրետ քայլերը կառավարության գործունեության ծրագրում նշված են:

«Մենք ասել ենք, որ կստեղծենք հիմնադրամ, որն ուղղակի օժանդակության միջոցով փորձելու է աջակցել գործարար միջավայրին: Նմանատիպ այլ քայլեր կան»,- եզրափակեց նա:

Աղբյուր` Փաստինֆո