Փաստ ինֆո

Թուրքիայի վիճակագրական ծառայության (ԹՎԾ-TÜİK) հրապարակած տվյալների համաձայն՝ երկրում աղքատությունը գնալով ավելի ծանր դրսևորում է ստանում: «Deutsche Welle»-ի թուրքական ծառայության փոխանցմամբ՝ Թուրքիայում շուրջ 1.250.000 մարդ չի կարողանում ինչպես հարկն է լուծել օրվա հացի խնդիրը, իսկ նրանցից շուրջ 50.000-ը  ընդհանրապես սովի է մատնված: Այս մասին գրում է Ermenihaber.am-ը:

ԹՎԾ-ի հրապարակած զեկույցի համաձայն՝ Թուրքիայի բնակչության շուրջ 14.7 տոկոսի (մոտ 12 մլն մարդ) կենսապայմաններն աղքատության շեմից ցածր են: Ընդ որում, երկրի աղքատ բնակչությունը գնալով ավելի ու ավելի է աղքատանում, մեծանում է ծայրահեղ աղքատների ու մեծահարուստներ միջև տարբերությունը:

Երկրում աղքատության տարածման և աղքատների կենսապայմանների վատթարացման հիմնական պատճառը գործազրկությունն է: Վիճակագրության համաձայն՝ Թուրքիայում գործազուրկ է բնակչության 10.7 տոկոսը: Վերջին 3 ամսում երկրում գործազրկության աննախադեպ աճ է գրանցվել:

Թուրք պրոֆեսոր Սեյֆեթթին Գյուրսելի խոսքով՝ 2016թ. մայիսին գրանցվել է գործազրկության աճ 0.5 տոկոսով: Հունիսին գործազրկության աճը կազմել է  0.6 տոկոս: Սա 2008թ. տնտեսական ճգնաժամից հետո այս ոլորտում գրանցված ամենամեծ ցուցանիշն է:

Թուրք տնտեսագետ Մուստաֆա Սյոնմեզի համոզմամբ՝ առաջիկայում Թուրքիայում թե աղքատության, թե գործազրկության մաշտաբներն էլ ավելի կմեծանան:

Աղբյուր` Փաստինֆո