Փաստ ինֆո

Ամանորի գիշերը Երևանի Ազատության հրապարակում ոստիկանի նկատմամբ կյանքի կամ առողջության համար ոչ վտանգավոր բռնություն գործադրելու մեջ մեղադրվող, Հիմնադիր խորհրդարանի անդամ Գևորգ Սաֆարյանի գործով այսօրվա դատական նիստում վկայի հարցաքննությունն ավելի շատ հարցեր առաջացրեց:

Վկան տարածքի ավտոկայանատեղիի աշխատակից է, ըստ նրա, հիշողության հետ որոշակի խնդիրներ ունի: Ակնհայտորեն վկան խառնում էր դեպքերի ժամանակագրությունը:

Մասնավորապես, ըստ վկայի, ինքը ձայներ է լսել ու «զուտ հետաքրքրության համար» բարձրացել է վերև, այսինքն՝ Ազատության հրապարակ, որ տեսնի, թե ինչ է կատարվում: Այնտեղ տեսել է, որ քաղաքացիների ու ոստիկանների միջև վիճաբանություն է տեղի ունենում: Վկան դժվարացավ նշեց, որ կողմն էր թվային առումով գերակշռում, չի կարող ասել նաև, թե ինչից է սկսվել վիճաբանությունը:

Վկան հայտնեց, որ տեսել է քաղաքացիներ-ոստիկաններ երկկողմանի քաշքշուկ, ինչպես նաև, թե ինչպես է քաղաքացին հարվածել ոստիկանին, ով վայր է ընկել:

Վկան հստակ հիշում էր քաղաքացու հագուկապը՝ կապույտ գույնի բաճկոն և սպիտակ գույնի շալվար, ու թեև թե՛ հարվածողի, և թե՛ հարված ստացող ոստիկանի դեմքերը չի տեսել, սակայն հստակ նշել է նրանց մոտավոր տարիքը:

Վկան բավականին ուշացումով հիշեց, որ տեսել է, թե ինչպես է հրապարակ մտնում տոնածառի հանդերձանքով տղամարդը:

Ամբաստանյալն ու նրա պաշտպան Տիգրան Հայրապետյանը բարձրաձայնեցին ցուցմունքների անարժանավատ լինելու մասին: Ըստ կողմի, եթե վկան վերև է բարձրացել արդեն իսկ աղմուկ լսելուց հետո, ապա չէր կարող տեսնել Տոնածառ-մարդու մուտքը հրապարակ, քանի որ աղմուկ-աղաղակն եղել է այն բանից հետո, երբ ոստիկանները վայր են գցել Տոնածառ-մարդուն:

Պաշտպանական կողմի այս դիտարկմանը վկան պատասխանեց. «Սաղ խառնել եմ իրար»:

Գևորգ Սաֆարյանն իր հերթին տարակուսանք հայտնեց, թե ինչպե՛ս կարելի մարդու տարիքն ասել առանց նրա դեմքը տեսնելու:

Նախաքննության ժամանակ վկան հայտնել էր այլ հարվածների մասին ևս: Ի պատասխան հարցերի՝ վկան հայտնեց, որ բացի վերոհիշյալ մեկ հարվածից, մյուս դեպքերում չի կարող կոնկրետացնել, թե ով ում է հարվածել, «որովհետև խառնաշփոթ վիճակ էր»:

Դատարանը կողմերին հայտնեց, որ հարցաքննվել են դատակոչի ցուցակից բոլոր վկաները՝ բացի մեկից, վերջինիս դուռը փակ է եղել: Դատարանը կրկին նրան բերման ենթարկելու որոշում կկայացնի, նրա հարցաքննությունից հետո կսկսվի պաշտպանական կողմի միջնորդած վկաների հարցաքննությունը:

Ի դեպ, Գևորգ Սաֆարյանը, դժվարությամբ էր քայլում: Ամբաստանյալի պաշտպան Տիգրան Հայրապետյանը լրագրողներին հայտնեց, որ արդեն երրորդ ամիսն է, որ ամբաստանյալը ոտքի լուրջ խնդիր ունի՝ ոտքը գետին դնելուց ուժգին ցավում է: Ոտքի հիվանդությունն, ըստ նրա պաշտպանյալի, քրեկատարողական հիմնարկի պայմանների հետևանք է: «Մենք դիմել ենք, բայց որևէ բան չի ձեռնարկվում ՔԿՀ-ի կողմից: Որևէ հետազոտություն չի անցկացվում ու բուժում էլ չի ստանում: Ուղղակի հարազատները ինչ-որ դեղեր են տանում, որոնք չեն օգնում, իսկ քրեակատարողական հիմնարկն անգործություն է դրսևորում»,- ասաց պաշտպանը:

Աղբյուր` Փաստինֆո