Փաստ ինֆո

ՀՀ Ընտրական օրենսգրքում փոփոխություններ ուկատարել վերաբերյալ ԱԺ ՀԱԿ խմբակցության պատգամավորները ՀՀ կառավարությանը ներկայացրել են նոր առաջարկներ, որոնց մի մասը կընդունվի: Այս մասին ՀՀ Ընտրական օրենսգրքում փոփոխություններ և լրացումներ կատարելու մասին օրենքի նախագծի և հարակից նախագծերի փաթեթի երկրորդ ընթերցմամբ քննարկման ժամանակ ասաց ՀՀ կառավարության աշխատակազմի ղեկավար-նախարար Դավիթ Հարությունյանը:

Նա մանրամասնեց, թե առաջարկներից որոնք են ընդունվել, իսկ որոնք՝ մերժվել:

«Առաջին երկուսը վերաբերում են վստահված անձանց, դիտորների իրավունքներին, որոնք իրավունք ունեն քաղվածք կատարել ընտրական փաստաթղթերից: Առաջարկվում է ավելացնել նաև նշումներ անելու իրավունքը: Սա ընդունելի է: Հաջորդ առաջարկը վերաբերում է արգելքին, որ նույն անձը չի կարող միաժամանակ լինել տարբեր ընտրահանձնաժողովների անդամ: Գաղափարն ընդունելի է, այդ գաղափարը կարտացոլենք»,- «Արմենպրես»-ի հաղորդմամբ՝ ասաց Հարությունյանը:

Կառավարության աշխատակազմի ղեկավար-նախարարը նշեց, որ հաջորդ առաջարկը վերաբերում է նրան, թե ով կարող է ներկայացնել դիմում՝ բացակա անձի փոխարեն քվեարկելու համար: Նա նշեց, որ այս առաջարկը մերժվել է: Մերժվել է նաև ՀԱԿ-ի այն առաջարկը, որը վերաբերում է բողոքները ներկայացնելու ժամկետներին: «Մենք ասում ենք՝ քվեարկության հաջորդ օրը՝ ժամը 12:00-ից, բայց առաջարկվում է 9:00: Այս առաջարկը չենք ընդունում պրակտիկ տեսանկյունից:

Ընտրական հանձնաժողովներն ամբողջ գիշեր աշխատում են ու ,որպես կանոն, հաջորդ օրն առավոտյան աշխատանքը չի կարող կազմակերպվել»,- նշեց Հարությունյանը:

Կառավարության ներկայացուցիչն ասաց, որ ՀԱԿ-ն առաջարկում է փոփոխություններ կատարել նաև ընտրողների՝ ստորագրված ցուցակների մասով, որ փաթեթը, որի մեջ դրվում է փաստաթուղթը, ստորագրվի ոչ միայն հանձնաժողովի քարտուղարի, նախագահի կողմից, այլև մնացած անդամների, դիտորդների և այլոց կողմից ևս: Դավիթ Հարությունյանը նշեց, որ օրենքում այս դրույթն արդեն իսկ կա և բոլոր նրանք, ովքեր ցանկանում են ստորագրել փաթեթի վրա, կարող են դա անել:

«Առաջարկվում է նաև սկանավորել ընտրացուցակը, որ լինի նաև որոնման, տպագրման հնարավորություն: Նախագծում մենք ձևակերպել ենք ներբեռնելն ու որոնելը: Առաջարկվում է տպագրել, բայց կարիքը չկա, որովհետև պետք է ներբեռնես, որ տպագրես: Առաջարկ կա նաև տեսախցիկների հափշտակման և դրանց սնուցող համակարգերի հափշտակման համար կետ ավելացնել: Ձևակերպումն այդքան էլ հաջողված չէ, բայց կարող ենք սա ընդունել՝ ամրագրելով համապատասխան հաջող ձևակերպում»,- եզրափակեց ՀՀ կառավարության աշխատակազմի ղեկավար-նախարարը:

Աղբյուր` Փաստինֆո