Փաստ ինֆո

ՀՀ կառավարության աշխատակազմի ղեկավար-նախարար Դավիթ Հարությունյանը վստահեցնում է, որ Ընտրական օրենսգրքում փոփոխությունների նախագծում կառավարությունը չի շեղվել քաղաքական համաձայնության արդյունքում ստորագրված համաձայնագրից: Ազգային ժողովում Ընտրական օրենսգրքում փոփոխություններ և լրացումներ կատարելու մասին օրենքի նախագծի և հարակից նախագծերի փաթեթի քննարկման ժամանակ Դավիթ Հարությունյանն անդրադարձավ քաղաքական համաձայնագրի տակ ստորագրած ընդդիմադիր գործիչների հայտարարություններին, թե ներկայացված նախագծով կառավարությունը շեղվել է համաձայնագրից:

«Ես կարծում եմ, որ ոմանք այդ համաձայնագիրը չեն կարդացել և ստորագրել են դրա տակ: Որովհետև այլ պարագայում նման բարձրագոչ հայտարարություններ այս ամբիոնից չէին հնչի: Ես հիմա ամենայն պատասխանատվությամբ և հրապարակային հայտարարում եմ, որ մենք այս նախագծում չենք շեղվել համաձայնագրից: Նախագծում արտացոլված են համաձայնագրով ձեռք բերված բոլոր պայմանավորվածությունները»,- «Արմենպրես»-ի հաղորդմամբ՝ նշեց Հարությունյանը՝ հավելելով, որ խոսքն ուղղում էբո լոր նրանց, ովքեր քննադատում են իրենց իսկ ստորագրված համաձայնագրի արդյունքում խորհրդարանի քննարկմանը ներկայացված օրենսդրական նախաձեռնությունը:

Դավիթ Հարությունյանն ընթերցեց ուրիշի փոխարեն քվեարկելու վերաբերյալ կեղծ հայտարարության դեպքում քրեական պատասխանատվություն սահմանելու համապատասխան հատվածները, որոնք արտացոլված են համաձայնագրում և տեղ են գտել նաև ներկայացված օրենսդրական նախաձեռնության մեջ, իսկ նախագծի քննարկուﬓերի ժամանակ ենթարկվել են
ընդդիմադիր գործիչների քննադատությանը:

«Եթե որոշել եք հետ կանգնել համաձայնագրից, նորմալ է, կարող եմ հասկանալ, որ մարդիկ ցանկանում են հետ կանգնել համաձայնագրից, բայց այդ դեպքում ես ցանկանում եմ նշել, որ
ցանկացած համաձայնագրում յուրաքանչյուր դրույթ բալանսավորված է մեկ այլ դրույթով: Մենք համաձայնագրում ամրագրել ենք մի դրույթ, որն աննախադեպ է: Ես օրինակ բերեմ, որ բոլորի համար հասկանալի լինի: Ենթադրենք որևէ անձ իրականում քվեարկել և դրանից հետո թաքնվել է: Դրանից հետո որևէ մեկը դիմում է ներկայացնում, որ այդ անձը չի քվեարկել: Եվ դրանից հետո, եթե իշխանությանը չհաջողվի գտնել համապատասխան ապացույցներ, որոնք հակառակը կապացուցեն, ընտրական գործընթացների տեսանկյունից կհամարվի, որ դիմումը ճիշտ է: Այսինքն, դիմումատուի խոսքին տրվում է այդքան մեծ կշիռ: Ասացեք խնդրեմ, կարելի է արդյո՞ք սա ի չար օգտագործել: Իհարկե, կարելի է: Հազարավոր մարդիկ կարող են ուղղակի անհետանալ այդ օրը և նրանց վերաբերյալ լինի դիմում ու լրիվ օրինական հիմքով կհամարվի, որ այդ մարդիկ չեն մասնակցել քվեարկությանը այն դեպքում, երբ նրանք մասնակցել են: Այս պահանջը ներկայացվել է ոչ թե մեր, այլ ընդդիմության կողմից: Մենք էլ ասել ենք, որ համաձայն ենք մի պայմանով, եթե լրացուցիչ բեռ է դրվելու դիմումատուի վրա: Մենք ասում ենք, որ եթե հետագայում կեղծ քվեարկության վերաբերյալ դիմումի համաձայն տարվում է քննություն և պարզվում է, որ դիմողը չի գործադրել բավարար ջանքեր իր ասածի ճշմարտությունը պարզելու համար, ապա նա պետք է ենթարկվի պատասխանատվության: Սա կարող է բալանսավորել հավաստիության կանխավարկածի վերաբերյալ դրույթը»,- մանրամասնեց ՀՀ կառավարության աշխատակազմի ղեկավար-նախարարը: Նա հավելեց, որ պատրաստ է քննարկել կեղծ քվեարկության վերաբերյալ սուտ տեղեկատվության համար նախատեսված քրեական պատասխանատվության մասին դրույթը հանելու հարցը, սակայն այդ դեպքում պետք է հանվի նաև դրան հակակշիռ հանդիսացող դրույթը, որը ևս քննարկվել է 4+4+4 ձևաչափով քննարկման ժամանակ:

«Խոսքը գնում է երեք դրույթների մասին: Դուք պնդել եք, որ քրեական պատասխանատվություն պետք է սահմանվի սուտ հայտարարության, կեղծ դիմումի և կրկնաքվեարկության համար, դրանք պետք է հավասարեցվեն և տուգանքները նման դեպքերում հանվեն: Եթե դուք հետ եք կանգնում համաձայնագրից, ապա մենք պետք է հրաժարվենք նաև հավաստիության կանխավարկածից: Այսինքն, եթե անձը ներկայացրել է դիմում և ասում է, որ հարևանը, եղբայրը կամ որդին բացակայում է ու չի մասնակցել քվեարկությանը, մենք դա որպես հավաստի տեղեկատվություն չենք ընդունում և պահանջում ենք այլ օբյեկտիվ ապացույցներ: Եթե մենք փոխում ենք, պետք է փոխենք համակարգային: Հակառակ դեպքում չի լինում այդպես, որ մենք համաձայնագրով պայմանավորվում ենք, հետո դուք ասում եք կլինի՞ դուք մեր ուզածը տաք, իսկ հակառակը, այն, ինչ մենք ենք դրան հակակշիռ առաջարկում, չտանք: Չի լինի: Ընդունում եմ, որ կարող եք փոխել ձեր կարծիքը, պատրաստ եմ քննարկումների, բայց հաշվի առեք, հարցը վերաբերելու է կոմպլեքսային լուծմանը: Իսկ գնդակը ձեր դաշտում է»,- եզրափակեց Հարությունյանը:

Աղբյուր` Փաստինֆո