Փաստ ինֆո

Պետական գույքի կառավարման վարչության պետ Արման Սահակյանն ասօր հայտարարել է, թե էլեկտրոնային աճուրդների անհրաժեշտությունը կարեւորել է իր պաշտոնավարման առաջին իսկ ամիսներից, սակայն անբավարար ֆինանսական միջոցների պատճառով նոր համակարգի ներդրումը հետաձգվել է: Այդպիսով` ԱԺ Նախագահ Գալուստ Սահակյանի որդին Ա. Սահակյանը արձագանքել է վարչապետի վերջին նիստում հնչեցրած հանձնարարականին:

Հիշեցնենք, որ կառավարության՝ հոկտեմբերի 6-ի նիստում ՀՀ վարչապետ Կարեն Կարապետյանը, ի թիվս այլ հանձնարարականների, անդրադարձել էր նաև պետության կողմից քաղաքացիներին մատուցվող ծառայություններին, վստահեցրել, որ դրանց որակի և արդյունավետության բարելավման խնդիրը գործադիրի համար գերակայություն է, ինչի հետ կապված հանձնարարականներ են տրվել գերատեսչություններին:

Պետական գույքի կառավարման վարչությունում այսօր հրավիրված հերթական խորհրդակցությանը ներկայացվել են կառավարության ղեկավարի հանձնարարականների կատարման ընթացքը, նոր առաջարկություններն ու մոտեցումները:

«Վարչություն դիմող քաղաքացին պետք է իր բարձրացրած հարցերի պատասխանն ու լուծումը հնարավորինս արագ ստանա, իսկ ժամանակակից տեխնոլոգիաները պետք է նպաստեն, որ մարդը կարողանա իր խնդիրների լուծմանը հետամուտ լինել տնից, ընդհուպ մինչև էլեկտրոնային աճուրդների մասնակցելը». հայտարարել է ՀՀ ԿԱ պետական գույքի կառավարման վարչության պետ Արման Սահակյանը, հիշեցնելով, որ դեռևս իր պաշտոնավարման առաջին իսկ ամիսներից խոսել է էլեկտրոնային աճուրդների անհրաժեշտության մասին, սակայն անբավարար ֆինանսական միջոցների պատճառով նոր համակարգի ներդրումը հետաձգվել է: Ա. Սահակյանը հանձնարարել է համապատասխան ստորաբաժանումներին վերանայել մշակված հայեցակարգն ու այն ներկայացնել կառավարություն:

Վերջին տարիներին Վարչության պաշտոնական կայքի միջոցով հաջողությամբ կիրառվում է էլեկտրոնային հետադարձ կապը, ինչը թույլ է տալիս քաղաքացիներին դիմումները ներկայացնել էլեկտրոնային եղանակով և նույնկերպ հետևել դրանց ընթացքին:

Վարչության պետն անդրադարձել է նաև միասնական պահառության վայրում, ավտոմեքենաներից բացի, մնացած օտարվող շարժական գույքը ևս աստիճանաբար կենտրոնացնելու հարցին, այն նպատակով, որ քաղաքացիները տեղում կարողանան ծանոթանալ դրանց վիճակին և ցանկության դեպքում մասնակցել աճուրդներին:

Պետական գույքի կառավարման վարչությունը մի շարք ծառայություններ է մատուցում բնակչությանն ու իրավաբանական անձանց, որոնց շարքում արդիական է նաև հանրակացարանային տարածքների սեփականաշնորհումը: Վերջին տարիներին անհամեմատ արագացված ու հեշտացված այս գործընթացը Վարչության պետի ամենօրյա հսկողության տակ է, ինչի վերաբերյալ այսօր ևս նոր հանձնարարականներ են տրվել: Մասնավորապես, աշխատակիցներին առաջարկվել է մեծացնել նախաձեռնողականությունն ու լրացուցիչ իրազեկումը, որպեսզի հանրակացարաններում ապրող մեր քաղաքացիները շահագրգռված լինեն օր առաջ դիմել և սեփականատեր դառնալ:

«Չպետք է նստեք ու սպասեք, թե երբ սոցիալական լուրջ խնդիրներ ունեցող այդ մարդիկ իրենք կդիմեն ձեզ, որպեսզի նոր զբաղվեք իրենց խնդրով: Պետք է ինքներդ գնաք նրանց մոտ, օգնեք, որ սահմանված կարգով անհրաժեշտ տեղեկանքները և փաստաթղթերը հավաքեն, որոնց թիվը, ճիշտ է, նվազագույնի է հասցվել, սակայն, մարդիկ, այնուամենայնիվ, դժվարությամբ են ձեռք բերում դրանք». ասել է Արման Սահակյանը:

Վարչության պետը հանձնարարել է նաև Մասնավորեցման ծրագրում երկար տարիներ մնացած ընկերությունների առաջխաղացման և փաթեթային եղանակով դրանց սեփականաշնորհման վերաբերյալ առաջարկություններն ամբողջացնել` ՀՀ կառավարությանը ներկայացնելու համար:

Աղբյուր` Փաստինֆո