Փաստ ինֆո

Ազգային ժողովը սկսել է քննարկել քաղաքական համաձայնության արդյունքում ՀՀ ընտրական օրենսգրքում փոփոխություններ և լրացումներ կատարելու մասին օրենքի նախագիծը: Հիմնական
զեկուցողը՝ ՀՀ կառավարության աշխատակազմի ղեկավար-նախարար Դավիթ Հարությունյանը հիշեցրեց, որ ընտրություններից առաջ ընտրողների էլեկտրոնային նախագրանցման վերաբերյալ համաձայնության տապալումից հետո կառավարությունը շահագրգիռ քաղաքական ուժերի հետ շարունակեց քննարկումները՝ ընտրական գործընթացների օրինականության ապահովման նոր գործիքներ ներդնելու հարցով: «Արդյունքում մենք մի շարք առանցքային հարցերի շուրջ եկանք համաձայնության, ինչի արդյունքում էլ առաջ է եկել Ընտրական օրենսգրքում փոփոխություններ և լրացուﬓեր կատարելու անհրաժեշտություն»,- «Արմենպրես»-ի հաղորդմամբ՝ նշեց Հարությունյանը:

Հարությունյանը մանրամասնեց, որ նախագծով առաջարկվում է սահմանել, որ Ազգային ժողովի ընտրությունների ժամանակ կառավարության կողմից սահմանված կարգով անցկացված մրցույթի արդյունքում ընտրված մասնագիտացված կազմակերպությանը Կենտրոնական ընտրական հանձնաժողովը թույլատրում է իրականացնել բոլոր ընտրական տեղամասերից քվեարկության ընթացքի եւ քվեարկության արդյունքների ամփոփման գործընթացի տեսանկարահանում եւ մեաժամանակյա համացանցային հեռարձակում՝ ուղիղ ժամանակային ռեժիմում՝ հատուկ ստեղծված կայքի (կայքերի) միջոցով: Տեսանկարահանումը պետք է իրականացվի անշարժ տեսախցիկների միջոցով:

Տեսախցիկների տեսադաշտում պետք է լինեն քվեատուփը, տեղամասային կենտրոնն ու դրա մուտքը՝ մինչեւ 50 մետր շառավղով, ինչպես նաեւ ընտրողների գրանցման, քվեարկության ծրարների ու քվեաթերթիկների հատկացման եւ քվեարկության արդյունքների ամփոփման գործընթացները:

Տեսանկարահանումը եւ համացանցային հեռարձակումը պետք է իրականացվեն սույն օրենսգրքով սահմանված՝ քվեարկության գաղտնիության սկզբունքի պահպանմամբ: Տեղամասային կենտրոնի տարածքը տիրապետողը եւ ընտրական հանձնաժողովները պարտավոր են աջակցել մասնագիտացված կազմակերպությանը տեսանկարահանման եւ համացանցային հեռարձակման գործընթացը կազմակերպելու հարցում, սակայն պատասխանատվություն չեն կրում գործընթացի կազմակերպման եւ դրա որակի համար:

Հաջորդ կարևոր փոփոխությունն ընտրություններից հետո ստորագրված ընտրական ցուցակների հրապարակումն է: 

«Քվեարկությանը մասնակցած ընտրողների ցուցակները, բացառությամբ զորամասում, քրեակատարողական հիմնարկում եւ ձերբակալված անձանց պահելու վայրում կազմվող ընտրողների ստորագրված ցուցակների, հրապարակվում են սույն օրենսգրքով սահմանված կարգով»,- ասաց ՀՀ կառավարության աշխատակազմի ղեկավարը: Դավիթ Հարությունյանը նաև հավելեց, որ օրենսդրական նախաձեռնությամբ փոփոխություններ են առաջարկվում նաև ՀՀ քրեական օրենսգրքում և «Վարչական իրավախախտուﬓերի մասին» օրենքում: Փոփոխություններով խստացվում են ընտրախախտումնրի համար նախատեսված պատիժները:

Աղբյուր` Փաստինֆո