Փաստ ինֆո

ՀՀ արտգործնախարարի տեղակալ Շավարշ Քոչարյանը բավական կոշտ է արձագանքել Ղարաբաղյան հակամարտության կարգավորման գործընթացում Թուրքիայի հնարավոր դերակատարության վերաբերյալ հարցին:

«Թուրքիան իր բացահայտ միակողմանի դիրքորոշմամբ տեղ չունի և պետք է հեռու պահվի Լեռնային Ղարաբաղի բանակցային գործընթացից», - հայտարարել է Շավարշ Քոչարյանը` պատասխանելով news.am-ի հարցին:

Հիշեցնենք, որ ՌԴ ԱԳ նախարար Սերգեյ Լավրովը կարծիք էր հայտնել, թե Թուրքիան կարող է դրական դերակատարություն ունենալ ղարաբաղյան հակամարտության կարգավորման հարցում։

«Այն, որ Թուրքիան կարող է դրական դեր խաղալ, ապահովելով Լեռնային Ղարաբաղի ապաշրջափակումը, նորմալ տնտեսական փոխգործակցությունը տարածաշրջանում, շատ կարևոր գործոն է, որը մենք միշտ հաշվի ենք առնում», – հոկտեմբերի 14-ին Երեւանում հայտարարել է նա լրագրողներին։

Ինչից ոգեւորված Թուրքիայի ԱԳՆ-ն շտապել էր հայտարարել, թե «Հայաստանը ապակառուցողական դեր է խաղում ղարաբաղյան հակամարտության մեջ, ինչը ռիսկեր է ստեղծում տարածաշրջանում խաղաղության եւ կայունության համար»:

News.am-ը հետաքրքրվել է, թե ինչպես է Քոչարյանը մեկնաբանում Թուրքիայի ԱԳՆ արձագանքը ՌԴ արտագործնախարար Սերգեյ Լովրովի՝ հոկտեմբերի 14-ին Երևանում արված հայտարարությանը:

«Հոկտեմբերի 14-ին Երևանում ընդունված ՀԱՊԿ անդամ-երկրների նախագահների՝ Լեռնային Ղարաբաղի հիմնախնդրի կարգավորման վերաբերյալ հայտարարությունն աջակցություն է հայտնել Վիեննայի և Սանկտ Պետերբուրգի համաձայնություններին՝ ուղղված հակամարտության գոտում իրադրության սրում թույլ չտալուն, իրավիճակի կայունացմանը և խաղաղ գործընթացի առաջ մղման համար պայմանների ստեղծմանը», - ասել է Շ.Քոչարյանը` ավելացնելով. «Բացառապես խաղաղ կարգավորումը պետք է հիմնված լինի միջազգային իրավունքի երեք հանրահայտ սկզբունքների՝ ուժի կամ դրա սպառնալիքի չկիրառման, պետությունների տարածքային ամբողջականության և ժողովուրդների իրավահավասարության և ինքնորոշման իրավունքի վրա»:

«ՌԴ դիրքորոշումը Լեռնային Ղարաբաղի հակամարտության կարգավորման հարցում արտահայտված է այդ հայտարարությամբ, այլ ոչ թե ադրբեջանական լրատվամիջոցներով հրամցվող Թուրքիայի արտգործնախարարության կողմից Սերգեյի Լավրովի խոսքերի այլասերմամբ. որակավորում, որին նախկինում ԼՂ բանակցային գործընթացը խեղաթյուրելու համար արժանացել էր ադրբեջանական կողմը:

Թուրքիան իր բացահայտ միակողմանի դիրքորոշմամբ տեղ չունի և պետք է հեռու պահվի Լեռնային Ղարաբաղի բանակցային գործընթացից: Միակ դրական ազդեցությունը, որ Անկարան կարող է ունենալ ԼՂ կարգավորման հարցում, այն է, որ Թուրքիան բացի Հայաստանի հետ սահմանը և վերջ դնի Ադրբեջանի սադրիչ և ապակառուցողական քայլերի խրախուսումը», - ընդգծել է Շ.Քոչարյանը:

Աղբյուր` Փաստինֆո