Փաստ ինֆո

Պաշտոնական Լոնդոնը գործընկերների հետ միասին քննարկում է, թե ինչպես կարելի է պատասխանատվության կանչել Ռուսաստանին Սիրիայում գործերի վիճակի սաստկացման համար:

«Մեզ համար պարզ է, որ Ռուսաստանի գործողությունները նպաստել են այդ հակամարտության երկարաձգմանն ու նրան, որ շարունակվեն սիրիացի ժողովրդի տառապանքները: Մենք մեր գործընկերների հետ քննարկում ենք հարցը, թե ինչպես կարելի է պատասխանատվության կանչել Ռուսաստանին»,- «INTERFAX»-ին հայտարարել է Մեծ Բրիտանիայի դեսպանության պաշտոնական ներկայացուցիչը՝ պատասխանելով հարցին, թե որքանով լուրջ է քննարկվում Սիրիայի հարցով դիրքորոշման պատճառով Ռուսաստանի դեմ նոր պատժամիջոցներ կիրառելու հնարավորությունը:

Ընդ որում գործակալության զրուցակիցն ընդգծել է, որ Մեծ Բրիտանիան ներկայումս սպառազինություն չի առաքում Սիրիայի և ոչ մի կողմին:

Պատասխանելով այն հարցին, թե կարո՞ղ է, արդյոք, Մեծ Բրիտանիան քննարկել զենքով Սիրիայի ընդդիմությանն օգնելու տարբերակը, գործակալության զրուցակիցը տեղեկացրել է, որ Լոնդոնն «օգնում է փրկարարական սարքավորումներով և քաղաքական աջակցություն ապահովում»:

«Մենք առաքել ենք փրկարարական սարքավորումներ մոտ 4 մլն ֆունտի արժեքով՝ ներառյալ կապի միջոցները, բժշկական և սարքավորումների ամբողջ սպեկտրը: Մենք սարքավորումներ ենք առաքել քիմիական զենքի կիրառմամբ հարձակումներից պաշտպանվելու համար, այդ թվում՝ 5000 ինքնափրկիչներ, ինչպես նաև նյարդապարալիտիկ գործողության թունավոր նյութերից պաշտպանվելու համար նախնական օգտագործման հաբեր և քիմիական զենքի հետքերի հայտնաբերման համար ինդիկատորային թուղթ»,- ասել է գործակալության զրուցակիցը:

Ավելի վաղ Financial Times-ը՝ հղելով աղբյուրին, գրել է, որ ԵՄ արտաքին քաղաքական գերատեսչությունների ղեկավարները մոտակա երկուշաբթի՝ հոկտեմբերի 17-ին, կքննարկեն Ռուսաստանի դեմ պատժամիջոցներ կիրառելու հարցը:

Ենթադրվում է, որ այնտեղ կքննարկվի նաև սիրիական նախագահ Բաշար Ասադի վարչակարգի 20 ներկայացուցիչների դեմ պատժամիջոցներ կիրառելու առաջարկությունը:

Աղբյուր` Փաստինֆո