Փաստ ինֆո

«Սահմանին կանգնած եզդի հերոսը» ծրագրի շրջանակներում սահմանագծին զոհված 4 եզդի հերոս զինվորների կյանքի մասին պատմող գիրք է հրատարակվել և ֆիլմեր են նկարահանվել:
«Արմենպրես»-ի հաղորդմամբ, հոկտեմբերի 7-ին գիրքն ու ֆիլմերը ներկայացվել են հանրությանը:

Ծրագիրը կյանքի է կոչել «Սինջար եզդիների ազգային միավորում» հասարակական կազմակերպությունը՝ ՀՀ Նախագահի աշխատակազմի կողմից հատկացվող դրամաշնորհի և ՀԵՀ-ի հայտարարած մրցույթի շրջանակներում։

ՀՀ Նախագահի աշխատակազմի կողմից հատկացվող դրամաշնորհային ծրագրի «Մերօրյա հերոսներ» անվանակարգի համակարգող Գայանե Մանուկյանի խոսքով՝ Սիդար Ալոյանի, Քյարամ Սլոյանի, Համլետ Հաջոյանի, Բորիս Օզմանյանի օրինակով մենք հասկացանք, որ հերոսը մեր կողքին ապրող երիտասարդն է։

«Մերօրյա հերոսների փառաբանումը» մեր կողմից հայտարարվող միակ անփոփոխ անվանակարգն է, որի շրջանակում իրականացվող ծրագրերի նպատակն է արժևորել հասարակության շրջանում զինվորի կերպարը՝ որպես երիտասարդ հերոսի մարմնացում… Մենք պետք է պահպանենք նրանց հիշատակը։ Նրանց թափած արյունը պետք է ուժեղացնի մեզ, երբ տեսնում ես, որ կողքիդ ապրող երիտասարդն ընդունակ է հերոսության, հերոսությունը դառնում է առարկայական: Մենք դաստիարակում ենք անկախության սերունդ, որի անկյունաքարն այսօրվա հերոսի կերպարն է: Սա մեր խոնարհումն է մեր եղբայր ժողովրդին՝ հայոց պետականության, մեր Հայրենիքի սահմանների պաշտպանության համար հայերի և եզդիների հերոս զավակների թափած արյան համար»,- ասաց Գայանե Մանուկյանը:

Ծրագրի ղեկավար Համլետ Սմոյանի ներկայացմամբ գիրքը կարևոր է ցույց տալու այն եզդիներին, ովքեր մինչև կյանքի վերջը կանգնեցին Հայաստանի սահմանին և պայքարեցին:

«Ֆիլմերի հեղինակը ես եմ: Դրանք 15 րոպեանոց վավերագրական ֆիլﬔր են, որոնք ցույց են տալիս տղաների կյանքի պատմությունը, ինչպես նաև ներկայացված են հարցազրույցներ հարազատների հետ»,- ասաց Սմոյանը:

Գրքում ներկայացված են ապրիլյան քառօրյա պատերազմի ժամանակ զոհված Քյարամ Սլոյանի, Համլետ Հաջոյանի, Բորիս Օզմանյանի, ինչպես նաև 2015 թվականի դեկտեմբերի 18-ի գիշերը ադրբեջանական 30 հոգանոց վարձու մարդասպանների կողմից իրականացված դիվերսիոն հարձակման հետևանքով զոհված Սիդար Ալոյանի կյանքն ու նրանց չիրականացած երազանքները:

Գրքի հեղինակներից մեկի՝ Բորիս Մուրազիի խոսքով, իրենք գրքի միջոցով փորձել են ներկայացնել, թե ինչպիսի մարդիկ են եղել նրանք:

«Քառօրյա պատերազﬕց հետո մենք լսեցինք անուններ, բայց չիմացանք, թե այդ անվան տակ ովքեր են: Փորձել ենք փակագծերը բացել և ներկայացնել, թե ինչպիսի քաղաքացիների կորցրեց Հայաստանի Հանրապետությունը»,- նշեց գրքի հեղինակը:

Բորիս Մուրազին նաև նկատեց, որ կար հետաքրքիր սիմվոլիկա, երբ ըստ պաշտոնական տեղեկատվության առաջինը, որպես զոհված հայտարարվեցին Քյարամ Սլոյանի, իսկ վերջում պայմանագրային զինծառայող Համլետ Հաջոյանի անունները: Իսկ վերջում հավելեց, որ գրքում պատմությունները ներկայացված են և հայերեն, և եզդիերեն: Դրանք բաժանելու են Հայաստանի գյուղերում: Գրքի համահեղինակներից է Զեմֆիրա Քալաշյանը։

Աղբյուր` Փաստինֆո