Փաստ ինֆո

«Ռուսաստանի տուրիզմի և սերվիսի պետական համալսարանի» Երևանի մասնաճյուղի ավագ դասախոսի դեմ գործով ապացույցների առկա համակցությունը վկայում է դատարանի, մարդու ու մարդու իրավունքների նկատմամբ անհարգալից վերաբերմունքի մասին:

Այս մասին այսօրվա դատական նիստում մեղադրողի ռեպլիկի դեմ հակառեպլիկում հայտարարեց ամբաստանյալ Սուրեն Եզեկյանի պաշտպան, փաստաբան Ռոման Ահարոնյանը:

«Գտնում եմ, որ նման հիմքով չի կարելի մարդուն դատապարտել»,- ասաց պաշտպանը՝ հավելելով՝ արդարադատությունը պետք է լինի տեսանելի, շոշափելի ու նաև՝ կանխարգելիչ:

Ավելի վաղ պաշտպանն իր պաշտպանական ճառում անդրադարձել էր նախաքննական մարմնի կողմից իր կարծիքով թույլ տրված խախտումներին՝ պնդելով, որ օրենքի խախտմամբ ձեռք բերված ապացույցները պետք է անթույլատրելի ճանաչվեն:

Մասնավորապես, ի թիվս այլ ապացույցների պաշտպանը վիճարկում է իր պաշտպանյալի տանը կատարված խուզարկության օրինականությունը՝ խուզարկությունը կատարվել է օպերլիազորի կողմից: Ըստ նրա, եթե անգամ ընդունել, որ գրությունը քննչական մարմնի հանձնարարականն է հետաքննության մարմնին, ապա հանձնարարությունը պետք է տրվեր իրավասու անձի՝ քննիչի, այլ ոչ թե բաժնի պետի կողմից, ինչպես եղել է տվյալ գործի պարագայում:

Մեղադրող Հակոբ Մելքոնյանը գտնում է, որ խուզարկությունը կատարվել է օրենքի պահանջներին համապատասխան: Ըստ մեղադրողի, գործում առկա է ապացույցների անհրաժեշտ համակցություն, բոլոր ապացույցներն էլ թույլատրելի են: Մեղադրողի գնահատմամբ, պաշտպանը յուրովի է ներկայացրել այդ ապացույցները:

Հաջորդ դատական նիստում ամբաստանյալը հանդես կգա վերջին խոսքով, և դատարանը կհեռանա խորհրդակցական սենյակ՝ դատական ակտ կայացնելու:

Սուրեն Եզեկյանն, ըստ մեղադրանքի, իր լիազորությունների շրջանակում համալսարանի որոշ ուսանողների օգտին գործողություններ կատարելու, այն է` ստուգարքները և քննությունները դրական գնահատելու, դիպլոմային աշխատանքներն ուսանողի փոխարեն գրելու համար 2011-2014թթ. ժամանակահատվածում պահանջել է և «Ռուսաստանի տուրիզմի և սերվիսի պետական համալսարանի» Երևանի մասնաճյուղի ուսանողներից որպես կաշառք անձամբ ստացել է զգալի և խոշոր չափերով գումարներ:

Աղբյուր` Փաստինֆո