Փաստ ինֆո

Սարի թաղում բռնություն գործադրելով զուգորդված խուլիգանություն կատարելու, ինչպես նաև «Արմենիա» հեռուստաընկերության լրագրողի օրինական գործունեությանը խոչընդոտելու գործով այսօրվա դատական նիստն հետաձգվեց՝ հաջորդ դատական նիստում ամբաստանյալների պաշտպանի ներկայությունը ապահովելու նպատակով:

Գործով չորս ամբաստանյալներն էլ՝ Սեյրան Կարապետյանը, Վլադիմիր Մխիթարյանը, Դավիթ Սարգսյանը ու Կարեն Գրիգորյանը պաշտպաններ չունեն: Այսօրվա դատական նիստում նրանք ցանկություն հայտնեցին, որ իրենց պաշտպանությունն իրականացնի նույն փաստաբանը՝ Վահե Ամիրջանյանը, ում ներկայությունը հաջորդ դատական նիստում դատարանը պետք է ապահովի:

Մինչ այդ դատական նիստում ճշտվեցին ամբաստանյալների անձնական տվյալները: Այսպես, 1973թ. ծնված Սեյրան Կարապետյանն ունի ութնամյա կրթություն, խնամքին երկու անձ կա՝ 24-ամյա որդին ու կինը:

Ամբաստանյալ, 1994թ. ծնված Դավիթ Սարգսյանը նույնպես ունի ութամյա կրթություն, ամուսնացած չէ ու նախկինում դատված չի եղել:

1989թ. ծնված, նախկինում դատված ու դատվածությունը մարած Վլադիմիր Մխիթարյանը Ֆիզիկական կուլտուրայի համալսարանի ուսանող է: Հետաքրքրական է, որ ամբաստանյալը պատրաստվում է դառնալ մարզական լրագրող: Ամբաստանյալի խնամքին կինն ու 3-ամսյա երեխան են:

1992թ. ծնված Կարեն Գրիգորյանը խնամքին մեկ տարեկան երեք ամսական դուստրն է:

Ըստ մեղադրանքի, Սեյրան Կարապետյանը 29.07.2016թ. ժամը 22-ից 23-ի սահմաններում Վլադիմիր Մխիթարյանի, Դավիթ Սարգսյանի ու Կարեն Գրիգորյանի հետ, Երևան քաղաքի Սարի թաղում գտնվող Գլինկայի փողոցում կատարել է բռնություն գործադրելով զուգորդված խուլիգանություն, ինչպես նաև խոչընդոտել է «Արմենիա» հեռուստաընկերության լրագրող Ա.Գալստյանի մասնագիտական օրինական գործունեությանը:

Բոլոր չորս ամբաստանյալներին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով՝ մի խումբ անձանց կամ կազմակերպված խմբի կողմից կատարված խուլիգանություն, և 164-րդ հոդվածի 1-ին մասով՝ լրագրողի մասնագիտական օրինական գործունեությանը խոչընդոտելը:

Աղբյուր` Փաստինֆո