Փաստ ինֆո

«Սասնա Ծռեր»-ի գործով մեղադրյալ Արայիկ Խանդոյանի կալանքի ժամկետը երկարացնելու և գրավ կիրառելու միջնորդությունը մերժելու առաջին ատյանի դատարանի որոշումների դեմ պաշտպանական կողմի վերաքննիչ բողոքն այսօր մերժվել է:

Այս մասին «Փաստինֆո»-ին հայտնեց Արայիկ Խանդոյանի («Միայնակ գայլ») պաշտպան, «Ընդդեմ իրավական կամայականության» ՀԿ փաստաբան Արա Ղարագյոզյանը՝ հավելելով, որ որոշման հրապարակմանը ոչ ինքը, ոչ էլ իր պաշտպանյալը ներկա չեն եղել. Արայիկ Խանդոյանը հեռացվել է, իսկ ինքը լքել է դատական նիստերի դահլիճը:

Ըստ պաշտպանի, Արայիկ Խանդոյանը դատական նիստի ընթացքում հայտարարել է, որ  նպատակ է ունեցել փրկել հայ ժողովրդին, այդ թվում՝ դատավորին: Վերջինս վրդովվել է, որից հետո մեղադրյալը նորից հայտարարել է, որ ինքը ցանկացել է փրկել հայ ազգը, «Ձեզ, Ձեր երեխաներին»: Այդ խոսքերից հետո դատարանը դատական սանկցիա է կիրառել մեղադրյալի հանդեպ ու նրան հեռացրել նիստերի դահլիճից:

Դրան հետևել է նաև պաշտպանի հայտարարությունը՝ ինքը չի կարող մնալ դատական նիստերի դահլիճում, քանի որ որևէ գործողություն չի կարող կատարել իր պաշտպանյալի բացակայությամբ: Եվ թեև դատարանը թույլ չի տվել նրան հեռանալ, պաշտպանը լքել է դատական նիստերի դահլիճը:

Աղբյուր` Փաստինֆո