Փաստ ինֆո

ԱԺ ԲՀԿ խմբակցության ղեկավար Նաիրա Զոհրաբյանի կարծիքով՝ ժամանակավրեպ է հարցը, թե հրաժարականի դիմում ներկայացրած պատգամավոր Տիգրան Ուրիխանյանի փոխարեն ԲՀԿ ցուցակից ով է դառնալու պատգամավոր:

«Երբ Տիգրան Ուրիխանյանը 15 օր հետո կվերահաստատի իր մանդատից հրաժարվելու դիմումը, այն ժամանակ կխոսենք»,- ասաց Նաիրա Զոհրաբյանը՝ նշելով, որ չի հավատում, որ նա իրոք հրաժարական կտա։

«Խնդրում եմ Ուրիխանյանի հետ կապված բոլոր հարցերով դիմեք Ուրիխանյանին: ԲՀԿ-ն սովոր է աշխատել կոնկրետ փաստերի հետ, 15 օր ժամանակ կա ըստ ընթացակարգի: Մենք նման հարց չենք քննարկել և չենք էլ քննարկի, որովհետև ես չեմ հավատում, որ ինքը հրաժարական կտա»,- ասաց Զոհրաբյանը:

Հիշեցնենք, որ նախորդ նիստում Նաիրա Զոհրաբյանը հայտարարությամբ էր հանդես եկել՝ ըստ էության կոչ անելով, որ նրանք, ովքեր ԲՀԿ մանդատով են դարձել պատգամավոր, բայց այսօր ԲՀԿ-ից չեն,մանդատը վայր դնեն։

Ավելի վաղ հայտնել ենք, որ «Ալյանս» կուսակցության ղեկավար Տ.Ուրիխանյանը հոկտեմբերի 3-ին նախագահի պաշտոնից հրաժարականի դիմում է ներկայացրել կուսակցության վարչությանը։

Միևնույն ժամանակ նա պատգամավորական մանդատը վայր դնելու մասին դիմում է ներկայացրել ՀՀ ԱԺ նախագահին:

Աղբյուր` Փաստինֆո