Փաստ ինֆո

«Երևան-Կենտրոն» քրեակատարողական հիմնարկը անտեսում է ՀՀ պաշտպանության նախկին փոխնախարար Վահան Շիրխանյանի առողջական վիճակի հետ կապված բժիշկների ուղիղ ցուցումները, մերժում կամ անպատասխան թողնում պաշտպանի դիմումները: Այս մասին «Փաստինֆո»-ի լրագրողին հայտնեց Վ.Շիրխանյանի պաշտպան, փաստաբան Հայկ Ալումյանը:

Պաշտպանը հայտնեց, որ դեռևս սեպտեմբերի 16-ին դիմել է քրեակատարողական հիմնարկի պետին՝ հայտնելով, որ գնալով ավելի շատ մտահոգություն է հարուցում իր պաշտպանյալի առողջական վիճակը: Պաշտպանը նշել է նաև, որ Վ.Շիրխանյանի հարազատները պատրաստակամություն են հայտնել «Աղաբեկյան» ախտորոշիչ կլինիկայում հետազոտություն անցկացնելու համար անհրաժեշտ վճարումները կատարել:

Հ.Ալումյանը պարզաբանեց, որ դա այն կլինիկան է, որը Վ.Շիրխանյանի մոտ թոքերի ինֆարկտը ժամանակին էր ախտորոշել, նա վիրահատվել էր, և նրա կյանքը փրկվել էր:

Քրեակատարողական հիմնարկը մերժել է փաստաբանի այդ դիմումը:
Հ.Ալումյանը անդրադարձավ նաև բժիշկների ուղիղ ցուցումներին: Թոքերի ինֆարկտի հետ կապված վիրահատությունից ավելի քան վեց ամիս անց, մասնավորապես, հայտնի անոթաբան Սուլթանյանը, ով ժամանակին բուժօգնություն է ցուցաբերել Վ.Շիրխանյանին, հարազատների կողմից ներկայացված բժշկական փաստաթղթերի հիման վրա սեպտեմբերի 26-ին ուղիղ բժշկական ցուցում է տվել՝ անհրաժեշտ է անցկացնել դուպլեքս,արյան, ինչպես նաև ռենտգեն հետազոտություններ:
Նույն օրն իսկ՝ սեպտեմբերի 26-ին, Հայկ Ալումյանն անմիջապես դիմում է գրել՝ ուղղված քրեակատարողական հիմնարկին, պահանջելով բժշկի ցուցումի հիման վրա անհապաղ անցկացնել հետազոտություն: Սակայն քրեակատարողական հիմնարկը հապաղում է՝ 4 օր է անցել և դեռևս դիմումին որևէ պատասխան չի տրվել:

Իսկ Վահան Շիրխանյանին այդ կապակցությամբ ասվել է, որ պետպատվերի շրջանակում չեն կարող հետազոտություն անցկացնել:

Դա առաջին բժշկական ցուցումը չէ, դեռևս օգոստոսի 11-ին նյարդաբան Ռուզաննա Բաբաջանյանի կողմից Վ.Շիրխանյանը հետազոտվել է, որից հետո բժիշկը ցուցում է տվել՝ «Ելնելով բացասական դինամիկայից՝ ցուցված է հիվանդի հետագա բուժումը կազմակերպել ստացիոնար պայմաններում, նպատակահարմար է՝ բազմապրոֆիլ կլինիկայում՝ միաժամանակ կազմակերպելով անոթաբանի, սրտաբանի և թոքաբանի դինամիկ հսկողություն»:

Հայկ Ալումյանը նկատեց, որ օգոստոսի 11-ից անցել է մեկ ամիս ու 19 օր, և ՔԿՀ-ն հրաժարվում է այդ ցուցումը կատարելուց: Ըստ պաշտպանի, եթե Վ.Շիրխանյանի առողջական վիճակը ավելի վատթարանա, կյանքի ցուցումով վիրահատության անհրաժեշտություն առաջանա, բոլոր նրանք, ովքեր այս ընթացքում անգործություն են դրսևորել, պետք է ենթարկվեն քրեական պատասխանատվության:
«Այսօրվա դրությամբ իրենք շատ կոպիտ խախտում են մարդու իրավունքը՝ հրաժարվում են բուժօգնություն ցուցաբերելուց»,- ասաց Հ.Ալումյանը՝ հիշեցնելով, որ իր մեկ այլ պաշտպանյալ Աշոտ Հարությունյանի հետ կապված նմանատիպ հանգամանքներում ՄԻԵԴ վճռով «16 հազար եվրո վճարվեց մեր գրպանից»:

«Թող հերթական վարչապետը չզարմանա, թե ինչու են պետբյուջեից գումարներ գանձվում»,- հայտարարեց Հայկ Ալումյանը՝ հավելելով, որ Վ.Շիրխանյանի առողջական վիճակի հետ կապված իրենց գանգատը դեռևս երկու շաբաթ առաջ գրանցվել է ՄԻԵԴ-ում, և «այս կոպիտ խախտումներով ուղղակի ամրապնդվում է մեր գանգատը, ու նրանք հավակնում են դատված լինելու»:

Պաշտպանը հայտնեց նաև, որ թեև դեռևս սեպտեմբերի 20-ին հայտարարվել է հանցավոր համագործակցության վերաբերյալ քրեական գործի նախաքննության ավարտի մասին, սակայն առայսօր գործի նյութերն իրենց չեն տրամադրվել:

Լուսանկարը՝ Ֆոտոլուրը

Աղբյուր` Փաստինֆո