Փաստ ինֆո

2015թ.-ին Հայաստանում ընտանիքի անդամի կողմից կատարված սպանության 14 դեպք է գրանցվել։ «Փաստինֆո»-ի հարցման ի պատասխան հայտնեցին Քննչական կոմիտեից՝ հավելելով, որ նշված թիվը կազմում է 2015 թվականին կատարված ընդհանուր սպանությունների 15.2 տոկոսը:

Սա բավական լուրջ ցուցանիշ է և լուրջ մտորելու տեղիք է տալիս՝ հաշվի առնելով, որ բոլոր 14 մեղադրյալները գործազուրկ են եղել։ Նրանց մեջ կան նաեւ անձինք, ովքեր հոգեկան առողջության հետ կապված խնդիրներ են ունեցել և նախաքննական մարմնի որոշմամբ մեղադրական եզրակացությունները ուղարկվել են դատարան՝ բժշկական բնույթի հարկադրանքի միջոցներ կիրառելու միջնորդություններով:

«Փաստինֆո»-ի տեղեկություններով` ընտանեկան բռնությունների ծայրահեղ դրսեւորումների «մեծ բաժինը» ընկել է մայրաքաղաքին, Երևանում գրանցվել է 8 սպանություն, 6-ը՝ մարզերում, որոնցից 2-ը՝ Արագածոտնի մարզում, իսկ Կոտայքում, Շիրակում, Լոռիում և Սյունիքում գրանցվել է մեկական սպանություն:

Այս ծանր հանցագործությունը կատարած անձանցից ոչ մեկը նախկինում դատապարտված չի եղել, տարբեր տարիքային խմբի են պատկանում, նրանց մեջ կան ինչպես թոշակառուներ, հաշմանդամություն ունեցող անձ, այնպես էլ անչափահաս երեխաներ ունեցողներ, սակայն նրանցից ոչ մեկը աշխատանք չի ունեցել:

Կատարված ուսումնասիրությունների արդյունում պարզվել է, որ 14 քրեական գործերով մեղադրյալներից 11-ը տղամարդիկ են, 3-ը՝ կանայք, ցավալին այն է, որ վերընշված 14 քրեական գործերով տուժողներից 2-ը մանկահասակ երեխաներ են, որոնցից մեկը խորթ երեխա:

Սպանութուններն իրականացվել են տարբեր առարկաներով՝ ատրճանակ, դանակ, կացին, մուրճ, քար, իսկ մի դեպքով էլ տուժողը խեղդամահ է արվել:

Աղբյուր` Փաստինֆո