Փաստ ինֆո

ՀՀ Վարչապետ Կարեն Կարապետյանը գործադիրի նիստում հանձնարարեց պետական կառավարման բոլոր մարմիններին վերանայել իրենց կառավարման ոլորտում գտնվող ՊՈԱԿ-ների գործունեության նպատակահարմարությունը, և առաջարկություն ներկայացնել ՊՈԱԿ-ների թվաքանակի կրճատման և օպտիմալացման վերաբերյալ:

«Այն ՊՈԱԿ-ները, որոնց գործունեությունը համարում եք նպատակահարմար, պետք է լինի հիմնավորված, գործառույթները հստակ ու չկրկնվող: Ինչն է խնդիրը. երբ մենք բյուջեն էինք քննարկում՝ բազմաթիվ ՊՈԱԿ-ներ կան, որ ունեն հաստատուն ծախսեր՝ տարեցտարի, և գոնե ինձ համար առաջին պահին հասկանալի չէ, թե իրենց պրոդուկտը, օգուտը, մուլտիպլիկատիվ էֆեկտը որն է: Ելնելով դրանից՝ շատ խիստ, կոշտ պետք է այդ ամենը վերանայել, և յուրաքանչյուր լումա պետք է հիմնավորվի, թե ինքը ինչ նպատակի է ծառայում»,-«Արմենպրես»-ի փոխանցմամբ, կառավարության նիստից մեկնարկին ասաց ՀՀ վարչապետը:

Միաժամանակ, վարչապետ Կարապետյանը նշեց, որ նույնը վերաբերում է ԾԻԳ-երին: Կառավարության ղեկավարը հանձնարարեց Սպորտի ու երիտասարդության հարցերի, Արտակարգ իրավիճակների, Մշակույթի և Քաղաքաշինության նախարարներին մեկշաբաթյա ժամկետում քննարկել իրենց ենթակայության տակ գտնվող ԾԻԳ-երի լուծարման հարցը, և ներկայացնել առաջարկություն:

«Մենք պետք է ի վերջո ունենանք մի հրապարակ, որտեղ այդ գնուﬓերը կատարվեն: Մեր նախարարություններն «աութսորսինգի» վրա պետք է պատվիրեն այդ գնումները այդ կառույցին: Ընդհանրապես, մենք այս համակարգը պետք է նայենք, այս քայլերը սկսելուց հետո մի ամփոփ կոնցեպցիա պետք է ունենանք»,- ասաց վարչապետը:

Աղբյուր` Փաստինֆո