Փաստ ինֆո

ՀՀ կենտրոնական բանկում` ԿԲ Այցելուների կենտրոնի 5-ամյակի շրջանակում, սեպտեմբերի 28-ին իր աշխատանքներն է սկսել «Այցելուների կենտրոնների/ թանգարանների դերը ժամանակակից Կենտրոնական բանկերի իմիջի ձևավորման գործընթացում» թեմայով կլոր սեղանը: Այս մասին «Արմենպրես»-ին տեղեկացրին ԿԲ հասարակայնության հետ կապերի ծառայությունից:

2011 թ-ի սեպտեմբերի 20-ին` ՀՀ Անկախության 20-ամյակի նախօրեին բացված ԿԲ Այցելուների Կենտրոնի 5-ամյակը լավ առիթ է կենտրոնի գործունեության ամփոփման և հետագա զարգացումների քննարկման, ինչպես նաև գործընկեր երկրների կենտրոնների գործունեությանը ծանոթանալու համար: ՀՀ կենտրոնական բանկի նախագահի տեղակալ Վախթանգ Աբրահամյանը, ողջունելով կլոր սեղանի մասնակիցներին, շնորհակալություն հայտնեց հրավերն ընդունելու համար և նշեց, որ ՀՀ ԿԲ-ն կարևորում է նման գործնական հանդիպումները, փոխադարձ այցերը ու փորձի փոխանակումը, որոնք փոխշահավետ գործակցության հիմքն են:

Վախթանգ Աբրահամյանը նաև նշեց, հյուրերից շատերն իրենց փորձով ու գիտելիքով օգնել են ՀՀ ԿԲ այցելուների կենտրոնի ստեղծման գործում, և այն իր հնգամյա պատմության ընթացքում ապացուցել է, որ գործում է որպես կայացած ու արդյունավետ կառույց: Կլոր սեղանին, որին մասնակցում են ՌԴ, Բելոռուսի, Ղրղզստանի, Լատվիայի, Լիտվայի, Լեհաստանի, Չեխիայի, Ֆինլանդիայի, Հոլանդիայի, Գերմանիայի և Մոնտենեգրոյի այցելուների կենտրոնների/թանգարանների ղեկավարները, քննարկվելու են այցելուների կենտրոնների/թանգարանների զարգացման միջազգային միտումներն ու հեռանկարները, ֆինանսական կրթության պոպուլյարիզացիայի հարցեր:

Կլոր սեղանի ընթացքում ներկայացվելու են ՀՀ, Լատվիայի, ՌԴ և Գերմանիայի կենտրոնական բանկերի այցելուների կենտրոնների/թանգարանների զարգացման ծրագրերը:

Աղբյուր` Փաստինֆո