Փաստ ինֆո

Ազգային ժողովի արտահերթ նիստում ՀՀ արդարադատության նախարար Արփինե Հովհաննիսյանը քիչ առաջ երկրորդ ընթերցմամբ ներկայացրեց «ՀՀ կառավարության կառուցվածքի մասին» օրենքում փոփոխությունների նախագիծը:

Նա հայտնեց, որ առաջին ընթերցմամբ ընդունված նախագիծը մնացել է անփոփոխ:

Ըստ նախարարի՝ խնդիրը առաջին ընթերցմամբ նախագծի քննարկման ժամանակ ԱԺ մի շարք պատգամավորների կողմից արված առաջարկությունների հետ կառավարության սկզբունքային անհամաձայնությունը չէ, այլ դրանք քննարկվել են՝ հետագայում ինստիտուցիոնալ վերանայման շրջանակներում դրանց անդրադարձ կատարելու համար:

«Հետագա քննարկումներում շարունականությունը կապահովվի, և, կապված նրա հետ, թե ինչպիսի տեսլականով առաջ կգնանք, եթե փոփոխությունների անհրաժեշտություն լինի, կներկայացնենք ձեր դատին»,-վստահեցրեց նախարարը՝ ընդգծելով, որ «այս պահի դրությամբ կառավարությունն այս կառուցվածքով է պատկերացնում իր ծրագրերի իրականացումը»:

Հիշեցնենք, որ արդյունավետ կառավարման անհրաժեշտությամբ պայմանավորված՝ գործադիրն առաջարկում է կառավարության կառուցվածքում ներառված Էկոնոմիկայի նախարարությունը վերանվանել Տնտեսական զարգացման և ներդրումների նախարարություն, Տրանսպորտի նախարարությունը՝ Տրանսպորտի, կապի և տեղեկատվական տեխնոլոգիաների նախարարություն, Էներգետիկայի և բնական պաշարների նախարարությունը՝ Էներգետիկ ենթակառուցվածքների և բնական պաշարների նախարարություն: Միաժամանակ առաջարկվում է հանել կառավարության կառուցվածքում ներառված ՀՀ քաղաքաշինության նախարարությունը:

Աղբյուր` Փաստինֆո